బీఆర్ఎస్ ఉదాసీన‌తే కృష్ణా జ‌లాల్లో న‌ష్టం చేసింది

అప్ర‌మ‌త్తం కాక‌పోతే ఇక పూర్తిగా అన్యాయం

(హైద‌రాబాద్,న్యూస్ఇన్‌)

రాష్ట్ర విభ‌జ‌న అనంత‌రం తెలంగాణాకు రావాల్సిన నీటి వాటా విష‌యంలో అప్ప‌టి బీఆర్ ఎస్ ప్ర‌భుత్వం ఉదాసీనంగా వ్య‌వ‌హ‌రించ‌డంతోనే రాష్ట్రానికి అన్యాయం జ‌రిగింద‌ని కేంద్ర జ‌ల‌వ‌న‌రుల మంత్రిత్వ శాఖ మాజీ స‌ల‌హా దారు వెదిరె శ్రీరాం ఆరోపించారు. తెలంగాణకు కనీసం 500 టీఎంసి నీళ్ల కోసం గట్టిగా పట్టుబట్టాల్సిన సమయంలో, అప్పటి బీఆర్ఎస్ ప్రభుత్వం కేవలం 299 టీఎంసికే ఒప్పుకుని సంతకాలు చేయడం తెలంగాణకు తీవ్ర న‌ష్టం చేసింద‌న్నారు. కృష్ణా జలాలపై భారతీయ జనతా పార్టీ రాష్ట్ర కార్యాలయంలో వెదిరె శ్రీరామ్ పవర్ పాయింట్ ప్రజంటేషన్ ఇచ్చారు.తెలంగాణ తరఫున సమర్థంగా వాదించి ఉంటే, కనీసం 400–450 టీఎంసి వరకు నీళ్లు పొందే అవకాశం ఉండేది. 2015లో కృష్ణా జలాల వాటా ఒప్పందంలో 299 టీఎంసికి సంతకం చేయడం గత 10 ఏళ్లుగా తెలంగాణకు ‘మరణ శాసనం’గా మారిందని బీఆర్ ఎస్ తీరును త‌ప్పుబ‌ట్టారు. 299 టీఎంసి అనేది ఒక్క సంవత్సరానికే అన్న వాదన పూర్తిగా అవాస్తవమని, 2016 అపెక్స్ కౌన్సిల్ సమావేశంలో కూడా మరో ఏడాది పాటు అదే ఒప్పందాన్ని కొనసాగిస్తూ అప్పటి ముఖ్యమంత్రులు సంతకాలు చేశారని అధికారిక డాక్యుమెంట్లతో సహా ఆధారాలు ఉన్నాయ‌న్నారు.

చెప్పారు. గత 10 ఏళ్లలో ఒక్క సంవత్సరం కూడా తెలంగాణ 299 టీఎంసి నీళ్లను పూర్తిగా వినియోగించుకోలేకపోయిందని చెప్పారు.ప్రాజెక్టులు పూర్తయ్యాయని చెబుతున్నప్పటికీ, కెనాల్స్, డిస్ట్రిబ్యూటరీలు, కమాండ్ ఏరియా డెవలప్‌మెంట్ లేకుండా ఒక్క ఎకరాకు కూడా నీళ్లు అందని పరిస్థితి రాష్ట్రంలో ఉంద‌ని వ్యాఖ్యానించారు. ఏపీ రీఆర్గనైజేషన్ యాక్ట్‌లోని పరిమితుల వల్ల తెలంగాణకు అన్యాయం జరిగింది, దీనిని సరిదిద్దేందుకు మోదీ ప్రభుత్వం 6 అక్టోబర్ 2023న గెజెట్ నోటిఫికేషన్ జారీ చేసి కొత్త టర్మ్స్ ఆఫ్ రిఫరెన్స్ ఇచ్చింది.కొత్త ట్రిబ్యునల్ ప్రక్రియలో తెలంగాణ ప్రభుత్వం సమర్థంగా వాదించి ఉంటే, 600–700 టీఎంసి వరకు నీళ్లను తెలంగాణకు తీసుకొచ్చే అవకాశం ఉండేదన్నారు.కేంద్ర ప్రభుత్వం ఇచ్చిన కొత్త ట్రిబ్యునల్ టర్మ్స్ ఆఫ్ రిఫరెన్స్ ద్వారా కృష్ణా బేసిన్ మొత్తాన్ని శాస్త్రీయంగా పునర్విభజించే అవకాశం ఏర్పడింది, అయితే రాష్ట్ర ప్రభుత్వం సమర్థవంతమైన టెక్నికల్, లీగల్ వాదనలు వినిపించకపోతే ఈ అవకాశాన్ని కూడా కోల్పోయే ప్రమాదం ఉంద‌ని హెచ్చ‌రించారు.