స్నేహానికన్న మిన్న లోకాన లేదురా.. కడ దాక నీడ లాగ నిను వీడి పోదురా.. ఏ సందర్బంలో కవి మనసులో ఈ పదాలు కదలాడాయో తెలియదు గానీ దాని అర్థం లోని మాధుర్యం మాత్రం సూర్యచంద్రులు ఉన్నంత వరకు పదిలంగా ఉంటుంది. స్నేహానికి సంబంధించిన అతి గొప్ప నిర్వచనం ఆ కవితలో పొందుపరిచాడు ఆ మహాకవి. అంతటి గొప్ప స్నేహానికి సజీవి సాక్షాలుగా మేమున్నామంటారు కొంత మంది స్నేహితులు. ఆ స్నేహానికి భాషా భేదం గానీ, ప్రాంతీయ భేదం గానీ, పేదధనిక భేదం గానీ ఏవీ ఉండవు. ఉన్నదల్లా స్నేహాన్ని ప్రాణంలా కాపాడుకోవడం. దుఖంలో, సంతోషంలో సగభాగం అవ్వడం. జీవితంలో రక్తసంబంధం కడదాకా నిలుస్తుందో లేదో చెప్పలేం కానీ స్నేహ బంధం మాత్రం ఖచ్చితంగా చివరి శ్వాస వరకు వెంటే ఉంటుంది. ఇలాంటి స్నేహితులు చాలా అరుదుగా కనిపిస్తుంటారు. పురాణాల్లో చాలామంది స్నేహానికి చిరునామా గా మారారు. స్నేహమే జీవితం అని నిరూపించారు. ప్రస్తుతం తెలంగాణ రాజకీయాల్లో ఇలాంటి అరుదైన ఘట్టం చోటుచేసుకుంది. ఒకనాడు తన స్నేహితుడికి ఎమ్మెల్సీ పదవి ఇప్పించి చట్టసభలకు పంపించాలనుకున్న మరో స్నేహితుడుకి అనేక అవరోధాలెదురై భవిష్యత్ ప్రశ్నార్ధకంగా మారింది. రాజకీయ మనుగడ కష్టంగా మారిన మరుక్షణం నుండి ఆ స్నేహం విడిపోలేదు సరికదా మరింత బలపడింది. ఆ విడదీయలేని స్నేహితులే ప్రస్తుత సీఎం రేవంత్ రెడ్డి.., వేం నరేందర్ రెడ్డి.
స్నేహమంటే ఇదేరా.. రేవంత్, వేం నరేందర్ విడదీయరాని అనుబంధం..
వీరిద్దరి జీవితాల్లో సంతోషం ఎంత ఉందో కష్టం, కన్నీళ్లు కూడా సమపాళ్లలో ఉన్నాయి. తెలుగుదేశం పార్టీ వేదిక మీద బలపడిన వీరి బంధం ఈ క్షణం వరకూ స్నేహపూర్వకంగానే ముందుకు సాగుతోంది. వేం నరేందర్ రెడ్డిని ఎమ్మెల్సీ గా గెలిపించుకోవాలనే పట్టుదలతో ముందుకు వెళ్తున్న రేవంత్ రెడ్డికి ఎదురైన రాజకీయ పరిణామాలు చూసి వేం నరేందర్ రెడ్డి ఏమాత్రం భయపడలేదు. స్నేహితుడా నేనున్నాను నీకు అండగా అంటూ బుజం తట్టి నిలబడ్డాడు. స్నేహితుడి కష్టాల్లో పాలు పంచుకున్నాడు. వేం నరేందర్ రెడ్డికి ఎమ్మెల్సీ పదవి కోసం చేస్తున్న ప్రయత్నాల వల్ల తన రాజకీయ భవిత సమస్యాత్మకంగా మారిందని, జైలుకు కూడా వెళ్లాల్సివచ్చిందని రేవంత్ రెడ్డి ఏనాడూ భావించలేదు. స్నేహ ధర్మానికి వందకు వెయ్యి శాతం న్యాయం చేసాడు రేవంత్ రెడ్డి. కష్టాలను కన్నీళ్లను, కేసులను అనుభవిస్తూనే రాజకీయాల్లో వినూత్న అడుగులు వేసారు. తెలుగుదేశం నుండి కాంగ్రెస్ పార్టీలోకి మారి అంచెలంచెలుగా ఎదిగారు రేవంత్ రెడ్డి. వర్కింగ్ ప్రెసిడెంట్ గా, పీసీసీ అద్యక్షుడిగా, రాష్ట్ర రెండవ ముఖ్యమంత్రిగా ఉన్నత శిఖరాలకు చేరుకున్నారు రేవంత్ రెడ్డి. ఐనప్పటికీ స్నేహానికి ఇచ్చే విలువలో ఏమాత్రం తేడా చూపించలేదు సీఎం రేవంత్ రెడ్డి.
మిత్రమా.. ఆనాడు ఎమ్మెల్సీ మిస్సయింది.. కానీ ఇప్పుడు రాజ్యసభకు పంపిస్తున్నాను..
ఆనాడు స్నేహితుడిని ఎమ్మెల్సీ చేసుకోలేక పోయాననే కసి, పట్టుదల రోజురోజుకూ ఎవరెస్టు శిఖరంలా పెరిగిపోయింది తప్ప ఏమాత్రం సన్నగిల్ల లేదు. అందుకే అవకాశం కోసం ఎదురుచూస్తున్న సీఎం రేవంత్ రెడ్డి తన స్నేహితుడుని రాజ్యసభకు పంపించాలనుకున్నారు. ఖాళీ అవుతున్న రెండు సీట్లలో ఒక సీటును తన మిత్రుడు వేం నరేందర్ రెడ్డికి ఇవ్వాలని భావించారు రేవంత్ రెడ్డి. రాజ్యసభ సీటును ఆశిస్తున్న ఆశావహులు పెద్ద సంఖ్యలో ఉన్నప్పటికీ, రాజ్యసభ అభ్యర్ధిత్వానికి తీవ్ర పోటీ నెలకొన్నప్పటికీ మిత్రధర్మానికి విలువిచ్చారు రేవంత్ రెడ్డి. అదిష్టానంతో విశ్వసనీయ చర్చలు జరిపి, ఎక్కడా కూడా లీకులకు ఆస్కారం లేకుండా చివరి నిమిషం వరకూ హుందాగా వ్యవహరించారు రేవంత్ రెడ్డి. నామినేషన్ చివరి రోజున రాజ్యసభకు ఎంపికైనట్టు తన మిత్రుడు వేం నరేందర్ రెడ్డి పేరును మీడియాలో చెప్పించారు రేవంత్ రెడ్డి. స్నేహం కోసం, మిత్రధర్మం కోసం రేవంత్ రెడ్డి పడ్డ తపన కంట తడి పెట్టించక మానదు.
అవమానం నుండి వచ్చిన కసి, పట్టుదల.. స్నేహధర్మం అంటే ఇదే..
ఒకప్పుడు ఇదే చట్టసభ సీటు కోసం చేసిన ప్రయత్నాలు ప్రతికూల ఫలితమివ్వగా నేడు అవే ప్రయత్నాలు అందలం ఎక్కించాయి. కాలం వీరులకే సలాం కొడుతుందన్నట్టు రేవంత్ రెడ్డి సాహసానికి, రాజకీయ చతురతకు కాలం జై కొట్టింది. కాంగ్రెస్ పార్టీని అధికారంలోకి తెచ్చి ఏఐసీసీ పెద్దల చేత శభాష్ అనిపించుకున్న రేవంత్ రెడ్డికి అదిష్టానం పూర్తిస్తాయిలో సహాయ సహకారాలు అందిస్తోంది. ఆనాడు తన మిత్రుడు కేవీపీని రాజ్యసభ సభ్యుడిని చేసుకోవడానికి వైఎస్ఆర్ కు ఆరేళ్ల సమయం తీసుకుంటే అదే పని రేవంత్ రెడ్డికి కేవలం రెండేళ్లు పట్టింది. అంటే సీఎం రేవంత్ రెడ్డికి అధిష్టానం వద్ద మంచి గుర్తింపు ఉందని స్పష్టమవుతోంది. ఇందులో భాగంగానే మిత్రుడు వేం నరేందర్ రెడ్డిని రాజ్యసభ అభ్యర్థిగా గెలిపించుకుని స్నేహం లోని మాధుర్యాన్ని చాటి చెప్పడమే కాకుండా నేటి తరానికి స్నేహం విలువను కూడా ఉద్బోధించారు సీఎం రేవంత్ రెడ్డి.
అప్పట్లో వై ఎస్ రాజశేఖర్ రెడ్డి తన మిత్రడు కేవీపీ కి రాజ్యసభ కట్టబెట్టేందుకు ఐదేళ్లకు పైగా సమయం తీసుకుంటే ప్రస్తుత సీఎం రేవంత్ రెడ్డి తన అప్త మిత్రుడికి రెండేళ్లకే పెద్దల సభకు పంపడంలో విజయవంతం అయ్యారన్న టాక్ కాంగ్రెస్ వర్గాల్లో వినిపిస్తోంది.
రిపోర్ట్: కృష్ణహరి
Leave a Reply