(న్యూస్ఇన్,న్యూఢిల్లీ)
దేశంలో ప్రస్తుతం రెండు పరివార్ల మధ్య పోరాటం జరుగుతోందని ముఖ్యమంత్రి ఎ. రేవంత్ రెడ్డి అన్నారు. ఒకటి సంఘ్ పరివార్ కాగా.. మరొకటి గాంధీ పరివార్ అని పేర్కొన్నారు. కేరళలోని నిలంబూర్లో శుక్రవారం జరిగిన ఆర్యదాన్ ముహమ్మద్–2026 బెస్ట్ పబ్లిక్ సర్వెంట్ అవార్డు కార్యక్రమంలో సీఎం రేవంత్ రెడ్డి మాట్లాడారు.
సంఘ్ పరివార్ దేశాన్ని మతం, భాష, సంస్కృతి, కులం తదితర అంశాల ఆధారంగా విభజిస్తోందని రేవంత్ రెడ్డి ఆరోపించారు. మరోవైపు గాంధీ పరివార్ దేశం కోసం ఎన్నో త్యాగాలు చేసిందని గుర్తు చేశారు. మహాత్మా గాంధీ, ఇందిరాగాంధీ, రాజీవ్ గాంధీ దేశం కోసం ప్రాణత్యాగం చేశారని గుర్తు చేశారు.
సోనియా గాంధీ, రాహుల్ గాంధీ, ప్రియాంక గాంధీలు కూడా పదవుల విషయంలో త్యాగాలు చేశారని రేవంత్ రెడ్డి పేర్కొన్నారు. దేశాన్ని సంఘ్ పరివార్ నుంచి రక్షించేందుకు గాంధీ పరివార్కు ప్రజలు అండగా నిలవాలని కోరారు.
సంఘ్ పరివార్ దేశానికి, ప్రజాస్వామ్యానికి అతిపెద్ద ప్రమాదకారి అని రేవంత్ రెడ్డి వ్యాఖ్యానించారు. దేశాన్ని సంఘ్ పరివార్ నుంచి రక్షించేందుకు గాంధీ పరివార్ కోసం తన ప్రాణాలను సైతం త్యాగం చేసేందుకు సిద్ధంగా ఉన్నానన్నారు.
రైతులు, వెనుకబడిన వర్గాలు, ఇతర సామాజిక వర్గాల సంక్షేమం కోసం తెలంగాణలో చేపట్టిన కార్యక్రమాలు, నాయకత్వాన్ని పరిగణనలోకి తీసుకుని రేవంత్ రెడ్డిని ఆర్యదాన్ ముహమ్మద్–2026 బెస్ట్ పబ్లిక్ సర్వెంట్ అవార్డుకు ఎంపిక చేసినట్లు ఫౌండేషన్ తెలిపింది.
Leave a Reply