సర్ ‘గో’ బ్యాక్ నినాదంతో దేశం ఏకమవుతుంది: సీఎం రేవంత్ రెడ్డి

(న్యూస్ఇన్‌,న్యూఢిల్లీ)

రాబోయే రోజుల్లో ‘సర్ గో బ్యాక్’ నినాదంతో దేశం ఏకమవుతుందని తెలంగాణ ముఖ్యమంత్రి ఎ. రేవంత్‌రెడ్డి అన్నారు. ఢిల్లీలో అస్సాం దినపత్రిక ‘ప్రతిదిన్’ నిర్వహించిన కాంక్లేవ్‌లో ‘ఇండియాస్ నెక్ట్స్ చాప్టర్’ అంశంపై ఆయన మాట్లాడారు. ఎన్నికల విధానం, ఎస్‌ఐఆర్, డీలిమిటేషన్‌తో పాటు తెలంగాణ అభివృద్ధి, విద్య, నైపుణ్యాలపై తన అభిప్రాయాలను వెల్లడించారు.సైమన్ కమిషన్‌ను వ్యతిరేకిస్తూ గతంలో దేశవ్యాప్తంగా ఉద్యమం జరిగిందని రేవంత్‌రెడ్డి గుర్తు చేశారు. ప్రస్తుత పరిస్థితుల్లో ఎన్నికల సంఘాన్ని సైమన్ కమిషన్ తరహాలో ఉపయోగించుకునే ప్రయత్నం జరుగుతోందని ఆయన ఆరోపించారు. ఎస్‌ఐఆర్ ప్రక్రియ గతంలో ఓటు హక్కు కల్పించేందుకు చేపట్టగా.. ఇప్పుడు ఓటు హక్కు తొలగించేందుకు ఉపయోగిస్తున్నారని విమర్శించారు. ఓటర్ల జాబితా నుంచి పెద్ద సంఖ్యలో పేర్లు తొలగిస్తున్నారని, దీనిపై కేంద్ర ఎన్నికల సంఘం వివరణ ఇవ్వాలని అన్నారు.ఎన్నికల సంఘం నిర్ణయాలపై కూడా రేవంత్‌రెడ్డి తీవ్ర వ్యాఖ్యలు చేశారు. ఓట్ల తొలగింపులో ఏఐ సాంకేతికతను ఉపయోగిస్తున్నారని ఆరోపించారు. ఈ అంశం కాంగ్రెస్ పార్టీకి సంబంధించిన సమస్య కాదని, దేశ ప్రజాస్వామ్యానికి సంబంధించిన విషయమని పేర్కొన్నారు.

ప్రతిపక్షాలు ఏకమవుతాయి…..

రానున్న రోజుల్లో వివిధ ప్రతిపక్ష పార్టీలు ఒకే వేదికపైకి వచ్చే అవకాశం ఉందని రేవంత్‌రెడ్డి అన్నారు. మమతా బెనర్జీ, శరద్ పవార్, ఉద్ధవ్ ఠాక్రే, స్టాలిన్ వంటి నేతలు ఎవరైనా కలిసి వచ్చే పరిస్థితి ఉంటుందని వ్యాఖ్యానించారు.

విద్య, నైపుణ్యాలపై దృష్టి….

తెలంగాణలో ప్రభుత్వ విద్యా వ్యవస్థను బలోపేతం చేయాల్సిన అవసరం ఉందని సీఎం అన్నారు. ప్రభుత్వ పాఠశాలల నుంచి విద్యార్థులు ప్రైవేటు విద్యాసంస్థలకు వెళ్లడానికి కారణాలను అధ్యయనం చేస్తున్నామని తెలిపారు. ఇంగ్లిష్ మీడియం, కమ్యూనికేషన్ స్కిల్స్‌పై తల్లిదండ్రులు కోరుతున్నారని, అందుకు అనుగుణంగా విద్యా విధానంలో మార్పులు చేస్తున్నామని చెప్పారు.

యువతకు ఉద్యోగ అవకాశాలు కల్పించే నైపుణ్యాలపై దృష్టి సారిస్తున్నామని, యంగ్ ఇండియా స్కిల్స్ యూనివర్సిటీని ఏర్పాటు చేసినట్లు తెలిపారు. పరిశ్రమల అవసరాలకు అనుగుణంగా కోర్సులను రూపొందిస్తున్నామని వివరించారు.

తెలంగాణ అభివృద్ధిపై కేంద్ర సహకారం కోరుతూ..

తెలంగాణకు కేంద్రం నుంచి ఆశించిన స్థాయిలో సహకారం అందడం లేదని రేవంత్‌రెడ్డి అన్నారు. రీజినల్ రింగ్ రోడ్డు, మెట్రో రైలు, జాతీయ రహదారుల విస్తరణ వంటి అంశాలను ప్రస్తావించారు. పెట్టుబడులు, పరిశ్రమల విషయంలో రాష్ట్రానికి ఉన్న మానవ వనరులు, విద్యా సంస్థలను వివరించారు.

డీలిమిటేషన్ వల్ల దక్షిణాది రాష్ట్రాలకు రాజకీయంగా నష్టం జరిగే అవకాశం ఉందన్న ఆందోళనను కూడా ఆయన వ్యక్తం చేశారు. జనాభా నియంత్రణను అమలు చేసిన రాష్ట్రాలకు ప్రాతినిధ్యం విషయంలో అన్యాయం జరగకుండా లోక్‌సభ స్థానాల పునర్విభజనపై విస్తృత చర్చ అవసరమని అభిప్రాయపడ్డారు.