మూడు విడతల రైతుబంధు బకాయి – యాసంగి పెట్టుబడి సాయం ఇవ్వాలని డిమాండ్..
ఆదిలాబాద్ రైతు గర్జనలో కాంగ్రెస్ ప్రభుత్వంపై ఫైర్
(ఆదిలాబాద్,న్యూస్ఇన్‌)
తెలంగాణ రైతులకు పెండింగ్‌లో ఉన్న మూడు విడతల రైతుబంధు బకాయిలతోపాటు ప్రస్తుత యాసంగి పంట పెట్టుబడి సాయాన్ని కలిపి ఎకరానికి రూ.60 వేల చొప్పున వెంటనే చెల్లించాలని బీఆర్ఎస్ వర్కింగ్ ప్రెసిడెంట్ కేటీఆర్ డిమాండ్ చేశారు. ఎన్నికల సమయంలో ఇచ్చిన హామీలను అమలు చేయడంలో కాంగ్రెస్ ప్రభుత్వం విఫలమైందని ఆరోపించారు. రాష్ట్రంలో నెలకొన్న కరువు పరిస్థితులకు ప్రకృతి కంటే ప్రభుత్వ నిర్లక్ష్యమే ప్రధాన కారణమని విమర్శించారు.ఆదిలాబాద్ పట్టణంలోని డైట్ కళాశాల మైదానంలో నిర్వహించిన రైతు గర్జన సభలో కేటీఆర్ ప్రసంగించారు.
రైతులకు ఇచ్చిన హామీలేమయ్యాయి..?
కేసీఆర్ ప్రభుత్వ హయాంలో రైతులకు ఏడాదికి ఎకరానికి రూ.10 వేల చొప్పున రైతుబంధు అందించామని కేటీఆర్ గుర్తుచేశారు. అధికారంలోకి వస్తే రూ.15 వేలు ఇస్తామని కాంగ్రెస్ ప్రకటించినప్పటికీ ఆ హామీని నిలబెట్టుకోలేదన్నారు. మూడు విడతల పెట్టుబడి సాయం పెండింగ్‌లో ఉందని ఆరోపించారు.
2022లో వరంగల్ రైతు డిక్లరేషన్ సందర్భంగా ప్రకటించిన హామీలను అమలు చేయాలని డిమాండ్ చేశారు. రూ.2 లక్షల రుణమాఫీ, కౌలు రైతులకు ఆర్థిక సాయం, రైతు కూలీలకు ఇందిరమ్మ ఆత్మీయ భరోసా అమలుపై ప్రభుత్వాన్ని ప్రశ్నించారు.
నీళ్లున్నా పంటలు ఎండుతున్నాయి…
తెలంగాణలో నెలకొన్న పరిస్థితులను కేటీఆర్ తప్పుబట్టారు. రాష్ట్రంలో సాగునీటి వనరులు అందుబాటులో ఉన్నప్పటికీ వాటిని సమర్థంగా వినియోగించుకోవడం లేదన్నారు. కాళేశ్వరం, పాలమూరు–రంగారెడ్డి ప్రాజెక్టులను సక్రమంగా ఉపయోగించుకుంటే రైతులకు సాగునీటి ఇబ్బందులు ఉండేవి కావని పేర్కొన్నారు.
కన్నెపల్లి పంప్‌హౌస్ వద్ద గోదావరి జలాలు అందుబాటులో ఉన్నా ఎత్తిపోతల చర్యలు చేపట్టడం లేదని ఆరోపించారు. ప్రాజెక్టుల విషయంలో రాజకీయాలకు అతీతంగా రైతుల ప్రయోజనాలకు ప్రాధాన్యం ఇవ్వాలని సూచించారు.
ఆదిలాబాద్ పరిశ్రమలపై నిర్లక్ష్యం…
ఆదిలాబాద్ సీసీఐ పరిశ్రమను పునరుద్ధరించడంలో కేంద్ర, రాష్ట్ర ప్రభుత్వాలు విఫలమయ్యాయని కేటీఆర్ విమర్శించారు. స్థానిక పరిశ్రమలను కాపాడటానికి కాంగ్రెస్, బీజేపీ ప్రజాప్రతినిధులు ఎందుకు ప్రయత్నించడం లేదని ప్రశ్నించారు.సింగరేణి సంస్థను ఆర్థికంగా దెబ్బతీస్తున్నారని ఆరోపించారు. తెలంగాణలో సాగునీరు, విద్యుత్, పారిశ్రామిక రంగాలు సంక్షోభాన్ని ఎదుర్కొంటున్నాయని పేర్కొన్నారు.
రైతుల పక్షాన పోరాటం కొనసాగిస్తాం…
కాంగ్రెస్, బీజేపీ పరస్పరం విమర్శించుకుంటున్నప్పటికీ తెలంగాణ ప్రయోజనాలను విస్మరిస్తున్నాయని కేటీఆర్ ఆరోపించారు. రైతులకు రావాల్సిన బకాయిలను వెంటనే విడుదల చేయాలని డిమాండ్ చేశారు.కాగా, ఆదిలాబాద్ రిమ్స్ ఆసుపత్రిలో జరిగిన అగ్నిప్రమాదంలో ఐదుగురు చిన్నారులు మృతి చెందిన ఘటనపై కేటీఆర్ విచారం వ్యక్తం చేశారు. బాధిత కుటుంబాలకు బీఆర్ఎస్ తరఫున ఒక్కొక్కరికి రూ.లక్ష చొప్పున ఆర్థిక సహాయం అందించారు.రైతులు అధైర్యపడవద్దని, వారి సమస్యల పరిష్కారం కోసం బీఆర్ఎస్ పోరాటం కొనసాగిస్తుందని స్పష్టం చేశారు.
