హైదరాబాద్‌ గ్లోబల్ నాలెడ్జ్ హబ్‌..ప్రఖ్యాత వర్సిటీలతో ఒప్పందాలు

(న్యూస్ ఇన్, హైద‌రాబాద్ )

హైదరాబాద్‌ను విద్య, నైపుణ్యాభివృద్ధికి ప్రపంచస్థాయి కేంద్రంగా తీర్చిదిద్దే దిశగా తెలంగాణ ప్రభుత్వం కీలక అడుగులు వేస్తోంది. హైదరాబాద్‌ను దేశంలోనే అత్యంత ప్రతిష్టాత్మకమైన ‘గ్లోబల్ నాలెడ్జ్ హబ్‌’గా అభివృద్ధి చేయాలన్న లక్ష్యంతో ప్రభుత్వం ముందుకు సాగుతోంది.ఐటీ, పరిశ్రమలు, ఫార్మా, లైఫ్ సైన్సెస్, పరిశోధన, డిఫెన్స్ రంగాల్లో ఇప్పటికే అంతర్జాతీయ గుర్తింపు సాధించింది.ముఖ్యమంత్రి ఎ. రేవంత్ రెడ్డి నేతృత్వంలోని ‘తెలంగాణ రైజింగ్’ ఉన్నతస్థాయి ప్రతినిధి బృందం ఇటీవల బ్రిటన్‌, అమెరికాలో చేపట్టిన పర్యటనలో సాధించిన పురోగతిపై ప్రభుత్వం నియమించిన ఉన్నతస్థాయి కమిటీ సమగ్ర నివేదికను సోమవారం సీఎంకు అందజేసింది. ప్రపంచ ప్రఖ్యాత విద్యాసంస్థలతో జరిగిన చర్చలు, కుదిరిన అవగాహన ఒప్పందాలు (MoUs), లెటర్ ఆఫ్ ఇంటెంట్‌ (LoI)లకు సంబంధించిన వివరాలను నివేదికలో పొందుపరిచారు.

అంతర్జాతీయ వర్సిటీల క్యాంపస్‌లు……

కమిటీ నివేదిక ప్రకారం అమెరికాకు చెందిన నార్త్ ఈస్టర్న్ యూనివర్సిటీ, బ్రిటన్‌లోని 17 స్వతంత్ర విద్యాసంస్థల సమాఖ్య అయిన యూనివర్సిటీ ఆఫ్ లండన్‌ భారత్‌లో తమ తొలి ఆఫ్‌షోర్ క్యాంపస్‌లను హైదరాబాద్‌లో ఏర్పాటు చేసేందుకు అంగీకారం తెలిపాయి.నార్త్ ఈస్టర్న్ యూనివర్సిటీ తమ క్యాంపస్‌ను ‘భారత్ ఫ్యూచర్ సిటీ’లో ఏర్పాటు చేసే అవకాశాలను పరిశీలిస్తోంది. దీనికి సంబంధించి తదుపరి కార్యాచరణపై పురోగతి సాధించే అవకాశం ఉందని నివేదిక పేర్కొంది.

ప్రపంచ ప్రఖ్యాత హార్వర్డ్ యూనివర్సిటీ కూడా హైదరాబాద్‌లోని డాక్టర్‌ బి.ఆర్‌. అంబేద్కర్‌ తెలంగాణ స్టేట్ ఇన్‌స్టిట్యూట్ ఆఫ్ అడ్మినిస్ట్రేషన్ (డాక్టర్ MCR HRD ఇన్‌స్టిట్యూట్) వేదికగా ప్రభుత్వ ఉన్నతాధికారులు, ప్రజాప్రతినిధులు, కార్పొరేట్ రంగ ప్రతినిధుల కోసం ప్రత్యేక ఎగ్జిక్యూటివ్ ఎడ్యుకేషన్ కోర్సులు నిర్వహించేందుకు అంగీకరించింది. ఈ అంతర్జాతీయ కోర్సులు నవంబర్‌ నుంచి హైదరాబాద్‌లో ప్రత్యక్షంగా ప్రారంభం కానున్నాయి.

ఆక్స్‌ఫర్డ్‌, కేంబ్రిడ్జ్‌, MITతో చర్చలు……

విదేశీ పర్యటనలో భాగంగా తెలంగాణ ప్రతినిధి బృందం లండన్ స్కూల్ ఆఫ్ ఎకనామిక్స్ (LSE), స్కూల్ ఆఫ్ ఓరియంటల్ అండ్ ఆఫ్రికన్ స్టడీస్ (SOAS), ఆక్స్‌ఫర్డ్, కేంబ్రిడ్జ్, మసాచుసెట్స్ ఇన్‌స్టిట్యూట్ ఆఫ్ టెక్నాలజీ (MIT), లండన్ బిజినెస్ స్కూల్, వర్జీనియా టెక్, ఇంపీరియల్ కాలేజ్ లండన్ వంటి ప్రముఖ విద్యాసంస్థల అధిపతులతో విస్తృత చర్చలు జరిపింది.ఆక్స్‌ఫర్డ్ యూనివర్సిటీతో సంయుక్త పరిశోధనా కేంద్రాలు, సెంటర్ ఆఫ్ ఎక్సలెన్స్‌ల ఏర్పాటుపై చర్చలు జరిగాయి. ఆయా అంతర్జాతీయ విద్యాసంస్థలకు చెందిన నిపుణుల బృందాలు త్వరలో హైదరాబాద్‌లో పర్యటించి, ఇక్కడి మౌలిక వసతులను పరిశీలించనున్నాయి.

ఉద్యోగ, ఉపాధి అవకాశాలకు ఊతం…..

హైదరాబాద్‌లో అంతర్జాతీయ విద్యా కేంద్రం ఏర్పాటైతే ప్రపంచస్థాయి మల్టీనేషనల్ కంపెనీలు, గ్లోబల్ క్యాపబిలిటీ సెంటర్లు (GCC) మరింతగా తెలంగాణకు వచ్చే అవకాశం ఉంటుందని ఐటీ, పరిశ్రమల శాఖ మంత్రి డి. శ్రీధర్ బాబు తెలిపారు. దీనివల్ల యువతకు విస్తృత ఉద్యోగ, ఉపాధి అవకాశాలు లభించడంతో పాటు తయారీ, పరిశోధన రంగాలు వేగంగా అభివృద్ధి చెందుతాయని పేర్కొన్నారు.డాక్టర్ MCR HRD ఇన్‌స్టిట్యూట్ వైస్ ఛైర్‌పర్సన్ శాంతకుమారి, సీఎం సలహాదారు కె. రామకృష్ణరావు నాలెడ్జ్ హబ్ ఏర్పాటుకు అవసరమైన మౌలిక వసతుల కల్పన పనులను వేగవంతం చేస్తున్నట్లు తెలిపారు.

ఇదిలా ఉండగా, డిసెంబర్‌ 7, 8, 9 తేదీల్లో ప్రభుత్వం నిర్వహించనున్న ‘ఇన్వెస్ట్ తెలంగాణ గ్లోబల్ సమ్మిట్‌’లో ప్రపంచ విద్యాసంస్థల భాగస్వామ్యం, క్రీడా రంగ అభివృద్ధిపై ప్రత్యేక కార్యక్రమాన్ని నిర్వహించనున్నట్లు ఉన్నతాధికారులు తెలిపారు.