(న్యూస్ఇన్‌,న్యూఢిల్లీ)
తెలంగాణలో మళ్లీ బీఆర్ఎస్ ప్రభుత్వమే అధికారంలోకి వస్తుందని, పార్టీ అధినేత కేసీఆర్‌ మరోసారి ముఖ్యమంత్రి అవుతారని బీఆర్ఎస్ వర్కింగ్‌ ప్రెసిడెంట్‌ కేటీఆర్ అన్నారు. కొచ్చిలో జరిగిన ఇండియా టుడే కాంక్లేవ్ సౌత్‌-2026లో పాల్గొన్న ఆయన.. బీజేపీతో పొత్తు, డీలిమిటేషన్, ఎస్‌ఐఆర్‌, కాంగ్రెస్‌ పాలన, యువత సమస్యలపై తన అభిప్రాయాలను స్పష్టం చేశారు.
బీజేపీతో పొత్తు ఉండదు….
రాబోయే ఎన్నికల్లో బీజేపీతో బీఆర్‌ఎస్‌కు పొత్తు ఉండదని కేటీఆర్ స్పష్టం చేశారు. గత 26 ఏళ్లలో బీజేపీతో తమ పార్టీ ఒక్కసారి కూడా పొత్తు పెట్టుకోలేదన్నారు. 2014, 2018, 2023 ఎన్నికల్లో బీఆర్ఎస్ ఒంటరిగానే పోటీ చేసిందని గుర్తుచేశారు. సైద్ధాంతికంగా బీఆర్ఎస్ బీజేపీకి వ్యతిరేకమన్నారు.
డీలిమిటేషన్‌పై అభ్యంతరం…
జనాభా ప్రాతిపదికన డీలిమిటేషన్ చేపడితే జనాభా నియంత్రణను సమర్థవంతంగా అమలు చేసిన దక్షిణాది రాష్ట్రాలకు నష్టం జరిగే అవకాశం ఉందని కేటీఆర్ అన్నారు. పార్లమెంట్‌ స్థానాలు పెంచే ప్రతిపాదన ఉంటే అసెంబ్లీ స్థానాలను కూడా పెంచాలని డిమాండ్ చేశారు. దామాషా ప్రకారం సీట్ల పెంపు జరిగితేనే తమ మ‌ద్ద‌తు ఉంటుంద‌న్నారు. అస్సాం, జమ్మూకశ్మీర్‌లో అసెంబ్లీ స్థానాలు పెంచినప్పుడు తెలంగాణ, ఆంధ్రప్రదేశ్‌లో ఎందుకు పెంచలేదని ప్రశ్నించారు. డీలిమిటేషన్ తో రాష్ట్రాలకు అన్యాయం జరగదని కేంద్ర హోంమంత్రి అమిత్‌ షా ఇచ్చిన హామీపై తమకు నమ్మకం లేదన్నారు.
కాంగ్రెస్‌ ప్రభుత్వంపై విమర్శలు….
తెలంగాణలో కాంగ్రెస్‌ ప్రభుత్వంపై ప్రజల్లో అసంతృప్తి పెరుగుతోందని కేటీఆర్ అభిప్రాయ‌ప‌డ్డారు. 2023 ఎన్నికల సమయంలో కాంగ్రెస్‌ 420కి పైగా హామీలు ఇచ్చిందని, వాటిలో ఏ ఒక్క హామీని పూర్తిగా అమలు చేయలేదని విమర్శించారు. రాష్ట్రంలో ‘ఆర్‌ఆర్‌ఆర్‌ (Recall, Regret and Revolt)’ పరిస్థితి కనిపిస్తోందని అన్నారు.
కాంగ్రెస్‌కు ఓటేసిన ప్రజలు తమ నిర్ణయంపై పునరాలోచిస్తున్నారని, తెలంగాణ ప్రజలు మళ్లీ కేసీఆర్‌ను ముఖ్యమంత్రిగా చూడాలని కోరుకుంటున్నార‌న్నారు. సీఎం రేవంత్‌రెడ్డి తెలంగాణ ప్రయోజనాల కంటే ఢిల్లీ నాయకత్వానికి విధేయత చూపుతున్నారని ఆరోపించారు.
ఎస్‌ఐఆర్‌పై పారదర్శకత ఉండాలి…..
ఓటర్ల జాబితాను ఎప్పటికప్పుడు సవరించడం అవసరమేనని అయితే ఎస్‌ఐఆర్‌ ప్రక్రియ పూర్తిగా పారదర్శకంగా జరగాలన్నారు. బీఆర్ఎస్ గెలిచిన 39 నియోజకవర్గాల్లోనే అత్యధిక ఓట్లు తొలగించారని ఆరోపించారు.ఎన్నికల సంఘం విశ్వసనీయతపై ఎన్నో అనుమానాలు క‌లుగుతున్నాయ‌ని, సుప్రీంకోర్టు సుమోటోగా విచారణ చేపట్టాలని, సుప్రీంకోర్టు న్యాయమూర్తితో స్వతంత్ర దర్యాప్తు జరిపించాలని డిమాండ్ చేశారు.
యువత సమస్యలపై దృష్టి పెట్టాలి…
దేశంలో యువత ఉద్యమించడం కొత్తేమీ కాదని, తెలంగాణ ఉద్యమం కూడా యువత భాగస్వామ్యంతోనే సాగిందని కేటీఆర్ గుర్తు చేశారు. ప్రస్తుతం ఉద్యోగాలు, ఉపాధి అవకాశాల కోసం జెన్‌జీ యువత ప్రశ్నిస్తోందని పేర్కొన్నారు.
యువత సమస్యలకు సమాధానం చెప్పకుండా మతపరమైన అంశాలతో బీజేపీ ప్రజల దృష్టిని మళ్లించడం సరికాదన్నారు.
Leave a Reply