(న్యూస్ఇన్,హైదరాబాద్)
బీఆర్ ఎస్ పట్టభద్రుల మండలి అభ్యర్థుల కోసం వేట మొదలు పెట్టింది. అభ్యర్థులను ఖరారు చేయడంపై ముమ్మరంగా కసరత్తు చేస్తోంది. రాష్ట్రంలో మరోసారి ఎన్నికల వాతావరణ క్రమంగా వేడెక్కుతోంది. రెండు పట్టభద్రుల ఎమ్మెల్సీ స్థానాలతో పాటు ఖైరతాబాద్ అసెంబ్లీ ఉప ఎన్నికపై బీఆర్ఎస్ దృష్టి సారించింది. పట్టభద్రుల ఎమ్మెల్సీ స్థానాలకు కాంగ్రెస్ పార్టీ అభ్యర్థులను ప్రకటించింది. బీఆర్ఎస్లో అభ్యర్థుల ఎంపికపై కసరత్తు కొనసాగుతోంది. ముఖ్యంగా మహబూబ్నగర్–రంగారెడ్డి–హైదరాబాద్ గ్రాడ్యుయేట్ ఎమ్మెల్సీ స్థానాన్ని మరోసారి దక్కించుకోవడంతో పాటు ఖైరతాబాద్లో పార్టీ తరఫున ఎవరిని బరిలోకి దించాలన్న దానిపై నాయకత్వం దృష్టి సారించింది.
కాంగ్రెస్ అభ్యర్థులు ఖరారు……
మహబూబ్నగర్–రంగారెడ్డి–హైదరాబాద్, నల్గొండ–ఖమ్మం–వరంగల్ పట్టభద్రుల ఎమ్మెల్సీ స్థానాలకు కాంగ్రెస్ పార్టీ అభ్యర్థులను ఖరారు చేసింది. సామ రామ్మోహన్రెడ్డి, రాంరెడ్డి సర్వోత్తమ్రెడ్డిని అభ్యర్థులుగా వెల్లడించింది.అభ్యర్థుల ప్రకటనతో కాంగ్రెస్ ఎన్నికల క్షేత్రంలో ఓ అడుగు ముందుగా నడుస్తోంది. ఓటర్ల నమోదు, నియోజకవర్గాల వారీగా పార్టీ శ్రేణులను సమన్వయం చేసుకోవడంపై పార్టీ దృష్టి పెట్టింది. కాంగ్రెస్ వేగాన్ని అందుకునేందుకు బీఆర్ఎస్లోనూ అభ్యర్థుల ఎంపిక తో ఎన్నికలకు సన్నద్ధం కావడంపై వెంటనే దృష్టి పెట్టాల్సి వస్తోంది.
వాణీదేవి స్థానంలో ఎవరు?
ఖైరతాబాద్ ఎమ్మెల్యే స్థానంతో పాటు, మహబూబ్నగర్–రంగారెడ్డి–హైదరాబాద్ పట్టభద్రుల ఎమ్మెల్సీ స్థానం బీఆర్ఎస్కు ప్రాధాన్యతగా మారింది. ఈ రెండు స్థానాలను నిలబెట్టుకునేందుకు బీఆర్ ఎస్ పావులు కదుపుతోంది.పట్టభద్రుల మండలి స్థానంలో సురభి వాణీదేవి ప్రాతినిధ్యం వహిస్తున్నారు.ఖైరతాబాద్ లో బీఆర్ ఎస్ నుంచి పోటీ చేసి విజయం దక్కించుకున్న దానం నాగేందర్ పార్టీ మారడంతో కొద్ది రోజుల క్రితం ఆయనపై అనర్హత వేటు పడింది. దీంతో రెండు సిట్టింగ్ స్థానాలు బీఆర్ ఎస్ ప్రతిష్టాత్మకంగా మారాయి.
ఎమ్మెల్సీ వాణిదేవి ఆరోగ్య సమస్యల నేపథ్యంలో ఈ స్థానాన్ని తన కూతురుకు ఇవ్వాలని పార్టీ పెదల ముందు ప్రతిపాదనలు ఉంచినట్లు తెలుస్తోంది. పార్టీ మాత్రం బలమైన అభ్యర్థిని రంగంలోకి దించాలన్న లక్ష్యంగా అడుగులు వేస్తోంది. మాజీ మంత్రి శ్రీనివాస్ గౌడ్ ను అభ్యర్థిగా దించాలని భావిస్తున్నా…మాజీ మంత్రి పోటీకి నిరాకరిస్తున్నట్లు సమాచారం. గత ఎన్నికల్లో చేవెళ్ల ఎంపీగా పోటీ చేసిన కాసాని జ్ఙానేశ్వర్ కుటుంబ సభ్యుడైన కాసాని వీరేష్ తనకు పోటీ చేసే అవకాశం ఇవ్వాలని పార్టీ పెద్దలను కోరుతున్నట్లు తెలుస్తోంది. రంగారెడ్డి జిల్లాకు చెందిన ఒక్కరిద్దరు నేతలు ఈ స్థానం పై ఆశలు పెంచుకున్నా….కాంగ్రెస్ కు ధీటుగా అభ్యర్తిని బరిలో దించాలని గులాబీ పార్టీ భావిస్తోంది.
ఓటర్ల నమోదుపై ప్రత్యేక దృష్టి
పట్టభద్రుల ఎమ్మెల్సీ ఎన్నికల్లో ఓటర్ల నమోదు కీలకం కావడంతో….అర్హత ఉన్న పట్టభద్రులు ఓటర్లుగా నమోదు చేసుకునేలా పార్టీ నియోజకవర్గాల వారిగా సమీక్షలు నిర్వహిస్తోంది.దీనిపై పార్టీ వర్కింగ్ ప్రెసిడెంట్ కేటీఆర్ నేతలతో సమీక్షలు నిర్వహిస్తూ సమాయత్తం చేస్తున్నారు. ఈ అంశంపై పార్టీ ప్రత్యేకంగా దృష్టి పెట్టింది.
జిల్లాల వారీగా సమీక్షలు…
ఎన్నికల సన్నాహాల్లో భాగంగా బీఆర్ఎస్ జిల్లాల వారీగా సమీక్షలు నిర్వహిస్తోంది. నియోజకవర్గ పరిధిలోని పార్టీ నేతలతో సమావేశాలు ఏర్పాటు చేసి క్షేత్రస్థాయి పరిస్థితులపై ఆరా తీస్తోంది. వరంగల్-నల్గొండ- ఖమ్మం స్థానంలో గతంలో పోటీ చేసిన రాకేష్ రెడ్డి పోటీ చేసేందుకు ఆసక్తి చూపుతున్నారు. మరికొంత మంది నేతలు తమకు పోటీ చేసే అకవాశం ఇవ్వాలని పార్టీ హై కమాండ్ ను కోరుతున్నారు. అధికార పార్టీ అభ్యర్థిగా రంగంలోకి దిగి విజయం సాధించకలేకపోయిన రాకేష్ రెడ్డి…ఈ విడత ప్రభుత్వంపై నిరుద్యోగులు, యువత, ఉద్యోగుల్లో ఉన్న అసంతృప్తి కలిసి వస్తుందనన్న ధీమాతో ఉన్నట్లు తెలుస్తోంది. రెండు పట్టభద్రుల స్థానాల్లో కాంగ్రెస్ పార్టీ ఒకే సామాజిక వర్గానికి చెందిన నేతలను ఎంపిక చేయడంతో బీఆర్ ఎస్ సామాజిక సమీకరణలు కూడా పరిగణలోకి తీసుకుని అభ్యర్థులను ఖరారు చేసే అవకాశం కనిపిస్తోంది.
ఖైరతాబాద్లోనూ అభ్యర్థి కోసం కసరత్తు….
ఖైరతాబాద్ అసెంబ్లీ ఉప ఎన్నికపైనా బీఆర్ఎస్ దృష్టి పెట్టింది. బీఆర్ఎస్ తరఫున ఎవరిని బరిలోకి దించాలన్న అంశంపై పార్టీ సర్వేలు నిర్వహిస్తోంది. దానం నాగేందర్ కు ధీటైన అభ్యర్థిని రంగంలోకి దించాలన్న యోచనలో పార్టీ కసరత్తు చేస్తున్నట్లు సమచారం. రాబోయే ఎన్నికల్లో పోటీ చేసే కాంగ్రెస్ అభ్యర్థులను ప్రకటించడంతో బీఆర్ఎస్ వ్యూహంపై ఆసక్తి నెలకొంది. అభ్యర్థి ఎంపికతో పాటు ఓటర్ల నమోదు, పార్టీ నాయకుల సమన్వయం, క్షేత్రస్థాయిలో ప్రచార వ్యవస్థను సిద్ధం చేయడంపై బీఆర్ఎస్ దృష్టి పెట్టింది.
Leave a Reply