(న్యూస్ఇన్,హైదరాబాద్)
జూరాల ప్రాజెక్టులో నీరు అందుబాటులో ఉన్నా రైతులకు సాగునీరు ఎందుకు ఇవ్వడం లేదని బీఆర్ఎస్ వర్కింగ్ ప్రెసిడెంట్ కేటీఆర్ ప్రశ్నించారు. మీడియాతో మాట్లాడిన ఆయన.. రైతుల సమస్యను ప్రభుత్వం రాజకీయం చేయకుండా వెంటనే నీటిని విడుదల చేయాలని డిమాండ్ చేశారు.తెలంగాణకు ఈ ఏడాది వచ్చిన కృష్ణా జలాల్లో 248 టీఎంసీలకు గాను రాష్ట్రం కేవలం 28 టీఎంసీలు మాత్రమే వినియోగించుకుందన్నారు.
జూరాల ఆయకట్టు ఎండిపోతే అందుకు కాంగ్రెస్ ప్రభుత్వమే బాధ్యత వహించాల్సి ఉంటుందని హెచ్చరించారు. రైతుల ప్రయోజనాలను దృష్టిలో ఉంచుకుని కన్నేపల్లి, నార్లాపూర్ పంపులను వెంటనే ప్రారంభించాలని డిమాండ్ చేశారు. కర్ణాటక ప్రభుత్వంతో చర్చించి 10 టీఎంసీల నీటిని తెలంగాణాకు తెచ్చి పంటలను కాపాడాలని కోరారు.
రైతు సమస్యలపై ఆందోళనకు వెళ్లిన బీఆర్ఎస్ నేతలను అరెస్టు చేయడాన్ని కేటీఆర్ తప్పుబట్టారు. అరెస్టులతో సమస్యను ప్రభుత్వం పక్కదారి పట్టించలేదన్నారు. ప్రభుత్వం వైఖరిని మార్చుకోకపోతే పెద్ద ఎత్తున ఉద్యమం చేపడతామని, అవసరమైతే ప్రభుత్వ కార్యాలయాలను దిగ్బంధిస్తామని హెచ్చరించారు. రైతుల విషయంలో రాజకీయ ప్రయోజనాల కంటే రైతు ప్రయోజనాలకే ప్రాధాన్యం ఇవ్వాలన్నారు.
తమ కుటుంబ సభ్యుల ఆస్తులతో పాటు ముఖ్యమంత్రి రేవంత్ రెడ్డి ఆస్తులపై సిట్టింగ్ జడ్జితో విచారణకు సిద్ధమని తాను చేసిన సవాల్పై ప్రభుత్వం ఇప్పటివరకు స్పందించలేదన్నారు. సిరిసిల్ల పర్యటనలో ముఖ్యమంత్రి ఏం మాట్లాడతారో చూడాలన్నారు. సిరిసిల్లలో 8 వేల ఎకరాల భూముల అంశాన్ని సీఎం ప్రస్తావించిన విషయాన్ని గుర్తుచేసిన కేటీఆర్.. ఆ ఆరోపణలకు ఆధారాలు చూపించాలని, లేదంటే చేసిన వ్యాఖ్యలపై క్షమాపణ చెప్పాలని కోరారు.
FALLOW US ON……
Leave a Reply