(న్యూస్ఇన్,హైదరాబాద్)
యాదాద్రి థర్మల్ కేంద్రంలో విద్యుత్ ఉత్పత్తికి జీ-9 గ్రేడ్ బొగ్గు అవసరమని అధికారులు వివరించారు. అయితే సింగరేణిలో జీ-9 బొగ్గు ఉత్పత్తి చేసే బ్లాకులు లేవని, సమీప భవిష్యత్తులోనూ అక్కడి నుంచి జీ-9 బొగ్గు లభించే అవకాశం లేదని తెలిపారు. జీ-9 బొగ్గు అందుబాటులో లేనప్పుడు ఆ సాంకేతికతతో యాదాద్రి థర్మల్ కేంద్రాన్ని ఎందుకు నిర్మించారంటూ సీఎం, డిప్యూటీ సీఎం అధికారులను ప్రశ్నించారు.
ఎంసీఆర్ హెచ్ఆర్డీలో విద్యుత్ శాఖపై నిర్వహించిన సమీక్షలో యాదాద్రి థర్మల్ విద్యుత్ కేంద్రం పనితీరు, బొగ్గు సరఫరా తదితర అంశాలపై వారు ఆరా తీశారు. యాదాద్రి థర్మల్ విద్యుత్ కేంద్రంలో పూర్తి స్థాయిలో విద్యుత్ ఉత్పత్తి ఎందుకు జరగడం లేదనే అంశంపై ముఖ్యమంత్రి ఎ. రేవంత్ రెడ్డి, ఉప ముఖ్యమంత్రి భట్టి విక్రమార్క అధికారులను ప్రశ్నించారు.
బొగ్గు గనుల సమీపంలోనే విద్యుత్ కేంద్రాన్ని నిర్మించే పిట్హెడ్ విధానాన్ని అనుసరించకుండా, గనులకు దూరంగా యాదాద్రి ప్లాంట్ను ఎందుకు ఏర్పాటు చేశారో వివరణ కోరారు. గతంలో రాజకీయ కారణాలతోనే పిట్హెడ్కు దూరంగా ప్లాంట్ నిర్మించినట్లు అధికారులు వెల్లడించారు. యాదాద్రికి బొగ్గు తరలించడం వల్ల తెలంగాణపై సుమారు రూ.40 వేల కోట్ల అదనపు భారం పడుతోందని అధికారులు తెలిపారు.
గత ప్రభుత్వం బొగ్గు బ్లాకుల వేలంలో పాల్గొనకపోవడంతో సింగరేణి నుంచి జీ-9 బొగ్గు సరఫరా జరగలేదని అధికారులు వివరించారు. సింగరేణిలో ఇప్పటికే 14 బొగ్గు బ్లాకులు మూతపడ్డాయని తెలిపారు.
రాష్ట్ర విద్యుత్ అవసరాలను దృష్టిలో పెట్టుకుని మహానది కోల్ఫీల్డ్స్, కోల్ ఇండియా నుంచి బొగ్గు కొనుగోలుకు వెంటనే చర్యలు ప్రారంభించాలని సీఎం, డిప్యూటీ సీఎం ఆదేశించారు. కేంద్ర బొగ్గు గనుల శాఖ మంత్రి కిషన్ రెడ్డితో తక్షణమే చర్చించాలని భట్టి విక్రమార్కకు రేవంత్ రెడ్డి సూచించారు. దసరాలోపు యాదాద్రి థర్మల్ విద్యుత్ కేంద్రం పూర్తి స్థాయిలో విద్యుత్ ఉత్పత్తి చేసేలా చర్యలు తీసుకోవాలని అధికారులను ఆదేశించారు.
Leave a Reply