బాలాపూర్ లడ్డూకు రూ.39 లక్షలు.. అంత ధర ఎందుకు ?

(న్యూస్ఇన్,హైద‌రాబాద్)

హైదరాబాద్‌ గణేష్‌ ఉత్సవాల్లో బాలాపూర్ లడ్డూ వేలం మరోసారి ప్రత్యేక ఆకర్షణగా నిలిచింది. ప్ర‌తి ఏటా ఉత్కంఠగా సాగే వేలంలో ఈసారి లడ్డూ రూ.39 లక్షలు పలికింది. సామ ప్రణీత్‌ రెడ్డి ఈ ఏడాది లడ్డూను దక్కించుకున్నారు. గతేడాది రూ.35 లక్షలు పలికిన ధరతో పోలిస్తే ఈసారి మరో రూ.4 లక్షలు పెరిగింది.

రూ.450 నుంచి రూ.39 లక్షలకు..

బాలాపూర్‌ లడ్డూ వేలం 1994లో ప్రారంభమైంది. అప్పట్లో లడ్డూ కేవలం రూ.450కే వేలం పాడి ద‌క్కించుకున్నారు. ఆ తర్వాత ప్రతి ఏడాది ధర క్రమంగా పెరుగుతూ వచ్చింది. 2002లో లక్ష రూపాయల మార్కును దాటిన ధర.. 2015లో రూ.10 లక్షలు దాటింది. 2024లో రూ.30.01 లక్షలు, 2025లో రూ.35 లక్షలకు చేరింది. ఇప్పుడు రూ.39 లక్షలతో కొత్త రికార్డు నమోదైంది.

లడ్డూకు ఇంత డిమాండ్ ఎందుకు..?

బాలాపూర్ లడ్డూను గణేశుడి ప్రసాదంగా భక్తులు భావించడం ప్రధాన కారణాల్లో ఒకటి. ఈ లడ్డూను దక్కించుకుంటే శుభం, ఐశ్వర్యం కలుగుతుందనే న‌మ్మ‌కం భ‌క్తుల్లో ఉంది.వేలంలో పాల్గొనే వారు లడ్డూ పరిమాణం లేదా మార్కెట్‌ విలువను మాత్రమే కాకుండా దానికి ఉన్న ఆధ్యాత్మిక ప్రాధాన్యాన్ని పరిగణనలోకి తీసుకుంటారు.

పోటీ.. సంప్రదాయం.. సామాజిక సేవ…

ఏటా జరిగే వేలం గణేష్‌ ఉత్సవాల్లో ఒక ప్రధాన ఘట్టంగా మారింది. ఇటీవలి సంవత్సరాల్లో వేలంలో పాల్గొనేవారికి ముందస్తు డిపాజిట్‌ నిబంధన గ‌ణేష్ క‌మిటీ విధించ‌డంతో….ఇది మ‌రింత ప్ర‌త్యేక‌త సంత‌రించుకుంది. వేలంలో పాల్గొనే వారి సంఖ్య త‌గ్గిన ధ‌ర మాత్రం పెరుగుతోంది. ఈ ల‌డ్డూ కొన‌ల‌నే ఆస‌క్తి ఉన్న వారు మాత్ర‌మే డిపాజిట్ ముందుగా చేసి వేలంలో పాల్గొంటున్నారు.

వేలం ద్వారా వచ్చిన మొత్తాన్ని ఆలయ, గ్రామాభివృద్ధి కార్యక్రమాలతోపాటు సంక్షేమ, విద్యా సంబంధిత కార్యక్రమాలకు వినియోగిస్తున్నట్లు నిర్వాహకులు చెబుతున్నారు. 1994లో రూ.450తో మొదలైన ఈ లడ్డూ వేలం.. మూడు దశాబ్దాలకుపైగా సాగుతూ ఇప్పుడు రూ.39 లక్షలకు చేరింది.

రిచ్ మండ్ విల్లాస్ లో పేరుకు త‌గ్గ ధ‌రే…

న‌గ‌ర శివార్ల‌లోని రిచ్ మండ్ విల్లాస్ లో వేలం రికార్డు స్థాయి ధ‌ర ప‌లికింది.ఈ క‌మ్యూనిటీలో జ‌రిగిన వేలంపాటలో 5 కిలోల లడ్డూ రూ.1.01 కోట్ల ధర పలికింది. కీర్తి రిచ్‌మండ్ విల్లాస్‌ వినాయకుడి లడ్డూ ల‌డ్డూ గ‌త ఏడాది కోట్ల‌లోనే ధ‌ర ప‌లికి దేశం దృష్టిని ఆక‌ర్షించింది. గ‌త ఏడాది 2 కోట్ల‌కు పైగా ధ‌ర ప‌లికినా… ఈ ఏడాది 1.01 కోట్ల‌కు అదే క‌మ్యూనిటీకి చెందిన శ‌క్తిమాన్ బృందం వేలంలో ల‌డ్డూను ద‌క్కించుకుంది.

FALLOW US ON….https://whatsapp.com/channel/0029Vb7fQokJENxuemz6EL3X