తెలంగాణలో పాలసీ పెరాలసిస్ లేదు.. పెట్టుబడులకు సంపూర్ణ భద్రత: సీఎం రేవంత్ రెడ్డి
2034 నాటికి లక్ష కోట్ల డాలర్ల ఆర్థిక వ్యవస్థే లక్ష్యం.. 2047 నాటికి మూడు ట్రిలియన్ డాలర్లకు చేరాలి
(హైదరాబాద్, న్యూస్ఇన్)
తెలంగాణలో పెట్టుబడులకు అనుకూలమైన వాతావరణం ఉందని, పారిశ్రామికవేత్తలకు ప్రభుత్వం సంపూర్ణ భద్రత, సహకారం అందిస్తుందని ముఖ్యమంత్రి ఎ. రేవంత్ రెడ్డి స్పష్టం చేశారు. రాష్ట్రంలో పాలసీ పెరాలసిస్ లేదని, పరిశ్రమలకు అవసరమైన భూములు, నీళ్లు, అనుమతులు, మౌలిక సదుపాయాలు కల్పించేందుకు ప్రభుత్వం సిద్ధంగా ఉందని తెలిపారు. విద్య, వైద్యం, పరిశ్రమలు, సేవారంగాల అభివృద్ధికి ప్రత్యేక ప్రాధాన్యత ఇస్తున్నామని చెప్పారు.
తెలంగాణ రైజింగ్ 2047 లక్ష్యం
తెలంగాణను 2034 నాటికి ఒక ట్రిలియన్ డాలర్ల ఆర్థిక వ్యవస్థగా, 2047 నాటికి మూడు ట్రిలియన్ డాలర్ల ఆర్థిక వ్యవస్థగా తీర్చిదిద్దడమే లక్ష్యమని సీఎం వెల్లడించారు. దేశ జీడీపీలో రాష్ట్ర వాటాను 10 శాతానికి పెంచాలని సంకల్పించినట్లు తెలిపారు. డిసెంబర్ 7, 8, 9 తేదీల్లో తెలంగాణ గ్లోబల్ సమ్మిట్ నిర్వహించనున్నట్లు చెప్పారు.
ఔటర్ రింగ్ రోడ్డు లోపల సేవారంగాన్ని మరింత విస్తరిస్తూ, రీజినల్ రింగ్ రోడ్డు పరిధిలో సుమారు 10 వేల చదరపు కిలోమీటర్ల మేర తయారీ రంగాన్ని అభివృద్ధి చేయనున్నట్లు వివరించారు. రాష్ట్ర ఆదాయంలో సుమారు 65 శాతం హైదరాబాద్ పరిసర ప్రాంతాల నుంచే వస్తోందని, రంగారెడ్డి జిల్లా దేశంలోనే అత్యధిక తలసరి ఆదాయం కలిగిన జిల్లాగా నిలిచిందని పేర్కొన్నారు.

ఫార్మా, విద్యారంగాలకు ప్రాధాన్యత
హైదరాబాద్ అభివృద్ధికి గత ప్రభుత్వాలు తీసుకున్న మంచి నిర్ణయాలను కొనసాగిస్తున్నామని సీఎం చెప్పారు. నెహ్రూ, ఇందిరాగాంధీ, రాజీవ్ గాంధీ, పీవీ నరసింహారావు తీసుకొచ్చిన విధానాలు దేశాభివృద్ధికి పునాదులయ్యాయని గుర్తుచేశారు. ఐఎస్బీ, నల్సార్ వంటి విద్యాసంస్థలు హైదరాబాద్కు అంతర్జాతీయ గుర్తింపు తీసుకొచ్చాయని తెలిపారు.
హైదరాబాద్లో దేశ బల్క్ డ్రగ్స్ ఉత్పత్తిలో 40 శాతం జరుగుతోందని, ఎలీ లిల్లీ సంస్థ ఒక బిలియన్ డాలర్ల పెట్టుబడికి ముందుకొస్తోందని వెల్లడించారు. రాఫెల్ యుద్ధ విమానాల విడిభాగాల తయారీ కూడా హైదరాబాద్లో జరుగుతోందని చెప్పారు.
వైద్య రంగంలో రూ.12 వేల కోట్ల పెట్టుబడి
వైద్య మౌలిక సదుపాయాల అభివృద్ధికి ప్రభుత్వం రూ.12 వేల కోట్లు ఖర్చు చేస్తోందని సీఎం తెలిపారు. సనత్నగర్ టిమ్స్ను ప్రారంభించామని, మిగతా టిమ్స్ ఆస్పత్రులను అందుబాటులోకి తెస్తామని చెప్పారు. గోషామహల్లో కొత్త ఉస్మానియా ఆస్పత్రి నిర్మాణం చేపట్టామన్నారు. ఆరోగ్యశ్రీ, ముఖ్యమంత్రి సహాయనిధి ద్వారా ఏటా రూ.2,500 కోట్లు ఖర్చు చేస్తున్నట్లు వెల్లడించారు.
ఫ్లోరైడ్, మూసీ కాలుష్యం నల్గొండ ప్రజల ఆరోగ్యంపై చూపుతున్న ప్రభావాన్ని ప్రస్తావిస్తూ మూసీ ప్రక్షాళన అవసరాన్ని వివరించారు. పీహెచ్ఎఫ్ఐ ప్రాజెక్టును 2028 జూన్ 2 నాటికి పూర్తి చేయాలని లక్ష్యంగా పెట్టుకున్నట్లు తెలిపారు. ఈ సంస్థకు ప్రభుత్వం పూర్తి సహకారం అందిస్తుందని, హైదరాబాద్కు అంతర్జాతీయ వైద్య రంగంలో గుర్తింపు తీసుకొచ్చేందుకు తాను బ్రాండ్ అంబాసిడర్గా వ్యవహరిస్తానని రేవంత్ రెడ్డి ప్రకటించారు.
