840 ఎక‌రాల ప్ర‌భుత్వ భూమిని కాపాడిన హైడ్రా

(హైద‌రాబాద్‌, న్యూస్ఇన్‌)

హైద‌రాబాద్‌, రంగారెడ్డి, మేడ్చ‌ల్ – మ‌ల్కాజిగిరి జిల్లాల్లో ఒకే రోజు 840 ఎక‌రాల ప్ర‌భుత్వ భూమిని హైడ్రా కాపాడింది.
న‌గ‌రం న‌లువైపులా హైడ్రా భారీ ఆప‌రేష‌న్ల‌ను నిర్వ‌హించింది. వీటి విలువ రూ. 30 వేల కోట్ల‌కు పైగా ఉంటుంద‌ని అంచ‌నా. భారీ పోలీసు బందోబ‌స్తు మ‌ధ్య రెవెన్యూ అధికారుల‌తో క‌లిసి హైడ్రా ఈ భారీ ఆప‌రేష‌న్ల‌ను పూర్తి చేసింది. త‌ప్పుడు ప‌త్రాల‌తో, స‌ర్వే నంబ‌ర్ల‌తో వంద‌ల ఎక‌రాలు కాజేయాల‌ని చేస్తున్న వారి ప్ర‌య‌త్నాల‌కు హైడ్రా శ‌నివారం చెక్ పెట్టింది. ఇందులో రంగారెడ్డి జిల్లా శంషాబాద్ మండ‌లం బ‌హదూర్‌గూడ గ్రామంలోని 25, 26 స‌ర్వే నంబ‌ర్ల‌లో 650 ఎక‌రాల ప్ర‌భుత్వ భూమి ఉండ‌గా.. ఇదే జిల్లాలోని శేరిలింగంప‌ల్లి మండ‌లం రాయ‌దుర్గంలో 84 ఎక‌రాల ప్ర‌బుత్వ భూమికి హైడ్రా ఫెన్సింగ్ వేసింది. మేడ్చ‌ల్ – మ‌ల్కాజిగిరి, హైద‌రాబాద్ జిల్లాల ప‌రిధిలోని కంటోన్మెంట్‌ 106 ఎక‌రాల ప్ర‌భుత్వ భూమి స్వాధీనం చేసుకుంది. శేరిలింగంప‌ల్లి మండ‌లం రాయ‌దుర్గం విలేజ్‌లోని స‌ర్వే నంబ‌రు 46లో ఉన్న 84 ఎక‌రాల ప్ర‌భుత్వ భూమి స్వాధీనం చేసుకుని ఫెన్సింగ్ వేసింది. ఇలా మొత్తం 840 ఎక‌రాల ప్ర‌భుత్వ భూమిని శ‌నివారం హైడ్రా కాపాడింది.

అరెక‌రం కొని.. …

రాయ‌దుర్గంలోని మ‌ల్కం చెరువు ఎదురుగా కొండ‌లు, గుట్ట‌లు, ప‌చ్చ‌ని చెట్ల‌తో స‌హ‌జ సిద్ధంగా ఉన్న ప్ర‌భుత్వ భూమిని కాజేయాల‌ని చాలామంది ప్ర‌య‌త్నం చేస్తుండ‌గా. ప్రైవేటు ప‌ట్టాకు చెందిన అర ఎక‌రం భూమిని ఓ సంస్థ‌కు ఆ స్థ‌ల య‌జ‌మాని అమ్మారు. ఆ ప‌క్క‌నే ఉన్న ప్ర‌భుత్వ భూమి కూడా త‌క్కువ ధ‌ర‌కు అమ్మేయ్ నేను కొనేస్తాను అని ఒప్పందం కుదుర్చుకున్నారు. ఇలా స‌ర్వే నంబ‌రు 46లోని 84 ఎక‌రాల ప్ర‌భుత్వ భూమిలోకి చొర‌బ‌డి ఎక‌రం భూమి వ‌ర‌కూ కాజేశారు. రిజిస్ట్రేష‌న్ కూడా జ‌రిగిపోయింది.

వ‌ణ్య‌ప్రాణుల‌కు ముప్పుగా …..

సికింద్రాబాద్ కంటోన్మెంట్‌లోని మేడ్చ‌ల్‌ – మ‌ల్కాజిగిరి, హైద‌రాబాద్ జిల్లాల ప‌రిధిలో 106 ఎక‌రాల ప్ర‌భుత్వ భూమిని కూడా క‌బ్జాదారులు వాటాలేసుకుని కాజేయాల‌ని ప్ర‌య‌త్నించారు. కంటోన్మెంట్ ప్రాంతంలో గ‌ల‌ జీఎల్ ఆర్‌( జ‌న‌ర‌ల్ ల్యాండ్ రిజిస్ట‌ర్‌) నంబ‌రు 243, 255ల‌లో ఉన్న 106 ఎక‌రాల ప్ర‌భుత్వ భూమిలోకి వేరే స‌ర్వే నంబ‌ర్ల‌తో ఎంట‌ర్ అయి ఏకంగా లే ఔట్ వేసేశారు.ఈ 106 ఎక‌రాల చుట్టూ హైడ్రా ఫెన్సింగ్ వేసింది. దీంతో స్థానికులు సంబ‌రాలు చేసుకున్నారు. పెద్ద‌యెత్తున హైడ్రాకు మ‌ద్ధ‌తుగా ర్యాలీలు తీశారు. ట‌పాసులు పేల్చి హైడ్రా జిందాబాద్ అంటూ ప్ర‌భుత్వానికి అనుకూలంగా నినాదాలు చేశారు.

వ్య‌వ‌సాయ భూమిగా….

రంగారెడ్డి జిల్లా బ‌హ‌దూర్‌గూడ‌లో 1954 ఖాస్రా ప‌హాణీ ప్ర‌కారం సర్వే నంబర్లు 25, 26లో ఉన్న 650 ఎక‌రాలు ప్రభుత్వ భూమిగా రికార్డులు చెబుతున్నాయి. ప్రాంతం కావడంతో భూముల కేటాయింపుపై నిషేధం ఉందని పేర్కొంది. దీంతో క్రమబద్ధీకరణ అంశం పూర్తిగా ముగిసిన అంశంగా రికార్డుల‌కెక్కింది. ప్రస్తుతం కూడా ప్రభుత్వం తమదిగా పేర్కొంటున్న భూముల్లో గ్రామ‌స్తుల‌తో పాటు.. ప‌లువురు ఫామ్ హౌస్‌లు క‌ట్టుకుని వ్య‌వ‌సాయం చేస్తూ కొన‌సాగుతున్నారు. ఈ మేర‌కు వారిని ఖాళీ చేయించి ప్ర‌భుత్వ భూమి చుట్టూ ఫెన్సింగ్ వేసి హైడ్రా కాపాడింది.