పోలీస్ నియామకాల్లో పారదర్శకత రాష్ట్రం ఆదర్శం

(హైదరాబాద్,న్యూస్ఇన్‌)

తెలంగాణా పోలీస్ రిక్రూట్మెంట్ బోర్డు అమ‌లు చేస్తున్న విధానం దేశంలోనే ఆద‌ర్శంగా కొన‌సాగుతుంద‌ని డీజీపీ సీవీ ఆనంద్ అభిప్రాయ ప‌డ్డారు. పోలీస్ నియామకాలు, శిక్షణ, సాంకేతిక సేవలపై డీజీపీ స‌మీక్ష నిర్వ‌హించారు. పోలీస్ నియామక ప్రక్రియ అత్యంత పారదర్శకంగా, విశ్వసనీయంగా కొనసాగుతోందని పేర్కొన్నారు. త్వరలో చేపట్టనున్న నియామక ప్రక్రియను కూడా అదే స్థాయిలో నిష్పాక్షికంగా నిర్వహించాలని అధికారులకు సూచించారు. 1989–91 కాలంలో జరిగిన పోలీస్ సబ్ ఇన్‌స్పెక్టర్ నియామకాలను గుర్తు చేసుకుంటూ, అప్పట్లోనే అత్యంత పారదర్శకంగా నియామకాలు జరిగాయని చెప్పారు. ఆ నియామకాల్లో తన స్నేహితులు ఎస్‌ఐలుగా ఎంపిక కాగా, తాను ఐపీఎస్‌గా ఎంపికైన విషయాన్ని గుర్తుచేసుకున్నారు.

నియామ‌కాల‌పై పీపీపీ……

2015-16, 2018-19, 2021, 2022-23 సంవత్సరాల్లో చేపట్టిన నియామకాల వివరాలను వెల్లడించారు. 2025-16 లో 10,980 పోస్టులు భర్తీ చేయగా, 2017లో 17,297 పోస్టులకు నియామక ప్రక్రియ చేపట్టినట్లు తెలిపారు. 2021 లో 92 ప్రాసిక్యూషన్ పోస్టులను, 2022-23లో రాష్ట్ర చరిత్రలోనే అతిపెద్ద పోలీస్ నియామక ప్రక్రియ నిర్వహించి 16,654 పోస్టులను భర్తీ చేసినట్లు వివరించారు. ఇప్పటి వరకు జరిగిన నియామకాల్లో 5 శాతం సబ్ ఇన్‌స్పెక్టర్ పోస్టులు, 95 శాతం కానిస్టేబుల్ స్థాయి పోస్టులేనని తెలిపారు.2025 సంవత్సరానికి సంబంధించిన నోటిఫికేషన్ల వివరాలను కూడా చైర్మన్ వివరించారు. 118 అసిస్టెంట్ పబ్లిక్ ప్రాసిక్యూటర్ పోస్టులు, 1743 డ్రైవర్ ఆపరేటర్ పోస్టులు, ఫింగర్ ప్రింట్ సంబంధిత పోస్టుల భర్తీ ప్రక్రియ కొనసాగుతోందని చెప్పారు. తొలిసారిగా నిర్వహించిన ఫింగర్ ప్రింట్ పోస్టుల నియామకంలో 60 పోస్టులకు గాను 57 మంది ఎంపికైనట్లు వెల్లడించారు. అదేవిధంగా ఆర్టీసీ విభాగానికి సంబంధించిన 198 సూపర్వైజర్ పోస్టుల భర్తీ ప్రక్రియ కూడా త్వరలో పూర్తి చేస్తామన్నారు.

పరీక్షల విధానంలో సంస్కరణలు…..

రిక్రూట్మెంట్ ప్రక్రియను మరింత పారదర్శకంగా, అభ్యర్థులకు అనుకూలంగా మార్చేందుకు చేపట్టిన సంస్కరణలను కూడా సమావేశంలో వివరించారు.2015–16లో 33 1/2% రిజర్వేషన్ అమలు చేయడం, శారీరక పరీక్షల్లో 5 కిలోమీటర్ల పరుగుకు బదులుగా 2.5 కిలోమీటర్ల పరుగును ప్రవేశపెట్టడం, బయోమెట్రిక్ వెరిఫికేషన్, ఆన్‌లైన్ దరఖాస్తు విధానం అమలు చేయడం వంటి కీలక మార్పులు చేపట్టినట్లు తెలిపారు.2018లో మరిన్ని సాంకేతిక సంస్కరణలు అమలు చేసినట్లు పేర్కొన్నారు. ఆర్‌ఎఫ్‌ఐడీ (RFID) టెక్నాలజీ, మొబైల్, ఈ-మెయిల్ ఆధారిత రిజిస్ట్రేషన్ వ్యవస్థ, పరీక్షల్లో ¼ నెగెటివ్ మార్కింగ్ విధానం ప్రవేశపెట్టినట్లు వివరించారు.