(హైదరాబాద్,న్యూస్ఇన్)
తెలంగాణలో భారతీయ జనతా పార్టీ అధికారంలోకి రావడానికి సింగరేణి ప్రాంతం నాంది కావాలని బీజేపీ తెలంగాణ రాష్ట్ర అధ్యక్షులు ఎన్. రాంచందర్ రావు పిలుపునిచ్చారు. ‘సింగరేణి భరోసా యాత్ర’లో భాగంగా మంచిర్యాల పట్టణంలో నిర్వహించిన పార్టీ కార్యకర్తల విస్తృత స్థాయి సమావేశంలో ఆయన ముఖ్య అతిథిగా పాల్గొని ప్రసంగించారు. సింగరేణి నుంచే తెలంగాణ అభివృద్ధికి కొత్త అధ్యాయం ప్రారంభమవుతుందని, అదే సింగరేణి నుంచే రాష్ట్రంలో బీజేపీ అధికారానికి బలమైన పునాది పడాలని ఆయన కార్యకర్తలకు దిశా నిర్దేశం చేశారు. రాష్ట్రంలోని ప్రస్తుత కాంగ్రెస్ ప్రభుత్వానికి, గత బీఆర్ఎస్ ప్రభుత్వ పాలనకు విధాన పరంగా ఎలాంటి తేడా లేదని విమర్శించారు. అవినీతి చేయడంలో, ప్రజలను వంచించడంలో, ఇచ్చిన ఎన్నికల హామీలను గాలికి వదిలేయడంలో రెండు పార్టీలు ఒకే విధంగా వ్యవహరిస్తున్నాయని మండిపడ్డారు. కాంగ్రెస్ ప్రభుత్వానికి ప్రజా సంక్షేమం, రాష్ట్ర అభివృద్ధి కంటే అవినీతిపైనే ఎక్కువ ఆసక్తి ఉందని ఆరోపించారు. కేవలం కమిషన్ల కోసమే ప్రాజెక్టులపై మాట్లాడుతున్నారే తప్ప, ప్రజలకు మేలు చేయాలనే ఆలోచన ఈ ప్రభుత్వానికి లేదన్నారు. విద్యార్థులు, రైతులు, నిరుద్యోగుల సమస్యలను పరిష్కరించడంలో కాంగ్రెస్ ప్రభుత్వం ఘోరంగా విఫలమైందని ఫైరయ్యారు. రాష్ట్ర ప్రభుత్వం రైతు బంధు (రైతు భరోసా) వంటి పథకాల అమలు సరిగ్గా అమలు చేయకుండా తీవ్ర జాప్యం చేస్తూ రైతులను ఇబ్బంది పెడుతుంటే, కేంద్రంలోని నరేంద్ర మోదీ ప్రభుత్వం మాత్రం ‘ప్రధానమంత్రి కిసాన్ సమ్మాన్ నిధి’ నిధులను నేరుగా, సకాలంలో రైతుల ఖాతాల్లో జమ చేస్తోందని గుర్తు చేశారు.
సింగరేణికి పూర్వవైభవం….
తాడిచెర్ల–2 కోల్ బ్లాక్ను సింగరేణికి కేటాయించడం ద్వారా సంస్థను మరింత బలోపేతం చేసి, నష్టాల నుంచి లాభాల్లోకి తీసుకురావడమే కేంద్ర ప్రభుత్వ సంకల్పమని స్పష్టం చేశారు. గతంలో దశాబ్దాల పాటు కాంగ్రెస్ పార్టీ కేంద్రంలోనూ, రాష్ట్రంలోనూ అధికారంలో ఉన్నప్పటికీ సింగరేణి సంస్థకు ఇటువంటి కోల్ బ్లాక్ల కేటాయింపులు ఎందుకు తీసుకురాలేకపోయిందని నిలదీశారు. తెలంగాణ సమగ్ర అభివృద్ధి, సింగరేణి సంస్థ బలోపేతం కోసం మోదీ ప్రభుత్వం కృషిచేస్తోందని స్పష్టం చేశారు.
బీజేపీ అధికారంలోకి రావడం ఖాయం….
గతంలో బీఆర్ఎస్కు, ఇప్పుడు కాంగ్రెస్కు అవకాశం ఇచ్చి మోసపోయిన తెలంగాణ ప్రజలు, రాబోయే రోజుల్లో రాష్ట్ర భవిష్యత్తు కోసం ఒక్క అవకాశం భారతీయ జనతా పార్టీకి ఇవ్వాలని ప్రజలు ఆశగా ఎదురుచూస్తున్నారని రాంచందర్ రావు గారు గుర్తుచేశారు. రానున్న రోజుల్లో తెలంగాణలో బీజేపీ ప్రభుత్వం ఏర్పాటు కావడం ఖాయమని, ప్రజా రంజక పాలనను అందిస్తామని ఆయన ధీమా వ్యక్తం చేశారు.
Leave a Reply