మైనర్ల కు వాహ‌నాలు న‌డిపిస్తే..ఇక అంతే..!

(హైద‌రాబాద్,న్యూస్ఇన్‌)

మైనర్ పిల్లలకు వాహనాలు ఇచ్చే తల్లిదండ్రులు, సంరక్షకులకు తెలంగాణ ప్రభుత్వం తీవ్ర హెచ్చరిక జారీ చేసింది. 18 సంవత్సరాల లోపు వయస్సు గల పిల్లలను ద్విచక్ర లేదా ఇతర మోటారు వాహనాలు నడపడానికి అనుమతిస్తే కఠిన చట్టపరమైన చర్యలు తప్పవని రవాణా శాఖ స్పష్టం చేసింది. రాష్ట్రవ్యాప్తంగా ఈ నిబంధనల అమలును మరింత కట్టుదిట్టం చేయాలని చెకింగ్ అధికారులకు ఆదేశాలు జారీ చేసింది. రవాణా శాఖ తెలిపిన వివరాల ప్రకారం, మోటారు వాహనాల చట్టం-1988లోని సెక్షన్ 199-ఏ (2019 సవరణ) ప్రకారం మైనర్ వాహనం నడుపుతూ పట్టుబడితే, ఆ వాహన యజమాని లేదా సంరక్షకుడినే నేరస్తుడిగా పరిగణించి చట్టపరమైన చర్యలు తీసుకుంటారు.

అంతేకాకుండా, నేరానికి ఉపయోగించిన వాహనం రిజిస్ట్రేషన్‌ను 12 నెలల పాటు రద్దు చేస్తారు. అదే సమయంలో, వాహనం నడిపిన మైనర్‌కు 25 సంవత్సరాల వయస్సు వచ్చే వరకు డ్రైవింగ్ లైసెన్స్ మంజూరు చేయరు. దీంతో చిన్న వయస్సులో చేసిన ఒక తప్పిదం వల్ల భవిష్యత్తులో డ్రైవింగ్ హక్కును పొందడంలో ఏడు సంవత్సరాలకు పైగా ఆలస్యం ఎదురయ్యే అవకాశం ఉంటుందని అధికారులు పేర్కొన్నారు.

భద్రత కోసమే నిర్ణయం….

మైనర్ల భద్రతను దృష్టిలో పెట్టుకొని రవాణా శాఖ ఈ నిర్ణయం తీసుకుందని జాయింట్ ట్రాన్స్ పోర్టు క‌మిష‌న‌ర్ చంద్ర‌శేఖ‌ర్ గౌడ్ తెలిపారు. ఇటీవల మైనర్లకు తల్లిదండ్రులు ఎక్కువగా వాహనాలు ఇవ్వ‌డంపై ప్ర‌భుత్వ నిబంధ‌న‌లు ఖ‌చ్చితంగా అమ‌లు చేస్తామ‌న్నారు.