రాయలసీమలో రక్తం అక్రమ రవాణా …ఆరోపణలు… విచారణకు కేంద్రం ఆదేశం
అనంతపురం రెడ్‌క్రాస్‌, తిరుపతి ఎన్‌టీఆర్‌ బ్లడ్‌ సెంటర్ల‌పై ఫిర్యాదు
రెండు వారాల్లో నివేదిక ఇవ్వాలని ఏపీ ఎస్‌బీటీసీకి కేంద్రం ఆదేశాలు
(న్యూఢిల్లీ, న్యూస్‌ఇన్‌)
రక్తదాన శిబిరాల్లో సేకరించిన మానవ రక్తాన్ని అక్రమంగా ఇతర రాష్ట్రాలకు తరలించి, బ్లాక్‌ మార్కెట్‌లో విక్రయిస్తున్నారన్న ఆరోపణలు ఆంధ్రప్రదేశ్‌లో కలకలం రేపుతున్నాయి. అనంతపురం ఇండియన్‌ రెడ్‌క్రాస్‌ సొసైటీ, తిరుపతిలోని ఎన్‌టీఆర్‌ బ్లడ్‌ సెంటర్లకు సంబంధించిన ఈ వ్యవహారంపై వచ్చిన ఫిర్యాదును కేంద్ర ప్రభుత్వం తీవ్రంగా పరిగణించింది. ఆరోపణలపై సమగ్ర విచారణ జరిపి, రెండు వారాల్లో నివేదిక సమర్పించాలని ఆంధ్రప్రదేశ్‌ రాష్ట్ర రక్త మార్పిడి మండలి (ఎస్‌బీటీసీ)ని ఆదేశించింది.
రాష్ట్రపతికి ఫిర్యాదు చేసిన విజిల్‌బ్లోయర్‌
అనంతపురం జిల్లా కళ్యాణదుర్గానికి చెందిన ఐ. సుధీర్‌ ఈ ఏడాది అక్టోబర్‌ 4న రాష్ట్రపతికి ఫిర్యాదు చేశారు. ఈ ఫిర్యాదు ప్రతిని కేంద్ర ఆరోగ్య, కుటుంబ సంక్షేమ మంత్రిత్వశాఖకు కూడా పంపించారు. ఏప్రిల్‌ 20, 2026న నిర్వహించిన రక్తదాన శిబిరంలో సేకరించిన మానవ రక్తాన్ని అక్రమంగా ఇతర రాష్ట్రాలకు తరలించి, వాణిజ్యపరంగా బ్లాక్‌ మార్కెటింగ్‌కు పాల్పడినట్లు అందులో ఆరోపించారు.
అక్టోబర్‌ 31న కేంద్రం కీలక లేఖ
ఫిర్యాదును పరిశీలించిన కేంద్ర ఆరోగ్య, కుటుంబ సంక్షేమ మంత్రిత్వశాఖ పరిధిలోని ఆరోగ్య సేవల డైరెక్టర్‌ జనరల్‌ కార్యాలయం (ఎన్‌బీటీసీ/బీటీఎస్‌ విభాగం) అక్టోబర్‌ 31న ఏపీ ఎస్‌బీటీసీ ప్రాజెక్ట్‌ డైరెక్టర్‌ కమ్‌ మెంబర్‌ సెక్రటరీకి అధికారిక లేఖ పంపింది. రక్తం అక్రమ రవాణా, వాణిజ్యపరమైన బ్లాక్‌ మార్కెటింగ్‌కు సంబంధించిన ఆరోపణలు తీవ్రమైనవని పేర్కొంటూ తక్షణమే సమగ్ర విచారణ చేపట్టాలని ఆదేశించింది.
రెండు వారాల్లో చర్యల నివేదిక
విచారణలో వెల్లడైన వాస్తవాలు, తీసుకున్న చర్యల వివరాలతో కూడిన నివేదికను లేఖ జారీ చేసిన తేదీ నుంచి రెండు వారాల్లోగా కేంద్రానికి సమర్పించాలని స్పష్టం చేసింది. ఫిర్యాదుదారు ఐ. సుధీర్‌కు సైతం లేఖ ప్రతిని పంపించింది.రక్తదాన శిబిరాల్లో సేకరించే రక్తం అవసరమైన రోగులకు చేరాల్సి ఉండగా, దాని తరలింపు, విక్రయాల్లో అక్రమాలు జరిగాయన్న ఆరోపణలు ప్రాధాన్యం సంతరించుకున్నాయి. అయితే ఇవి ఇంకా నిర్ధారణ కావాల్సి ఉంది. కేంద్రం ఆదేశించిన విచారణతో ఈ వ్యవహారంలో వాస్తవాలు వెలుగులోకి రావాల్సి ఉంది.