పెద్ద శేష వాహనంపై మలయప్పస్వామి దర్శనం
-తిరుమాడ వీధుల్లో వైభవంగా వాహన సేవ
(తిరుమల,న్యూస్ఇన్)
నాగుల చవితి పర్వదినాన్ని పురస్కరించుకుని తిరుమలలో శుక్రవారం రాత్రి పెద్ద శేష వాహనంపై శ్రీదేవి, భూదేవి సమేత శ్రీ మలయప్పస్వామివారు భక్తులకు దర్శనమిచ్చారు. రాత్రి 7 గంటలకు ప్రారంభమైన వాహన సేవలో స్వామివారు తిరుమాడ వీధుల్లో ఊరేగుతూ భక్తులకు అభయమిచ్చారు. ఈ వేడుకను తిలకించేందుకు పెద్ద సంఖ్యలో భక్తులు తరలివచ్చారు.
పురాణాల ప్రకారం సర్పరాజైన ఆదిశేషుడు శ్రీమహావిష్ణువుకు నివాస భూమిగా, శయన తల్పంగా, సింహాసనంగా సేవలందిస్తాడు. రామావతారంలో లక్ష్మణుడిగా, కృష్ణావతారంలో బలరాముడిగా స్వామివారికి అత్యంత సన్నిహితుడిగా ఆదిశేషుడు నిలిచాడు. శ్రీవైకుంఠంలోని నిత్యసూరుల్లో ఆదిశేషుడు ప్రముఖుడు.
దాసభక్తికి ప్రతిరూపమైన ఆదిశేషుడిపై ఉభయ దేవేరులతో కలిసి స్వామివారు విహరించడం భక్తులకు శరణాగతి తత్వాన్ని చాటిచెబుతుంది. అందుకే శ్రీవారి బ్రహ్మోత్సవాల్లోనూ తొలి ప్రాధాన్యత ఆదిశేషునికే కల్పించడం విశేషం.
