(న్యూస్ఇన్,హైదరాబాద్)
తెలంగాణలో భారీ పెట్టుబడులను ఆకర్షించే లక్ష్యంతో నిర్వహించనున్న ఇన్వెస్ట్ తెలంగాణ–తెలంగాణ రైజింగ్ గ్లోబల్ సమ్మిట్ 2026 సన్నాహకాలపై రాష్ట్ర ప్రభుత్వ ప్రధాన కార్యదర్శి సంజయ్ జాజు ఉన్నతాధికారులతో సమీక్ష నిర్వహించారు. సచివాలయంలో జరిగిన సమావేశంలో సమ్మిట్ నిర్వహణకు సంబంధించిన ఏర్పాట్లు, ఆహ్వానాల ప్రక్రియ, వివిధ శాఖల సమన్వయంపై సీఎస్ అధికారులకు దిశానిర్దేశం చేశారు.
గ్లోబల్ సమ్మిట్కు దేశ, విదేశాలకు చెందిన ప్రముఖులు, అంతర్జాతీయ పెట్టుబడిదారులు, పారిశ్రామికవేత్తలు, వివిధ రంగాల ప్రతినిధులు, సీఈఓలు, సీఏక్స్ఓలు, దౌత్యవేత్తలను పెద్ద సంఖ్యలో ఆహ్వానించాలని సీఎస్ సూచించారు. ఇందుకోసం అధికారిక ఈ-మెయిల్ ఆహ్వానాలను వెంటనే పంపించే ప్రక్రియను ప్రారంభించాలని ఆదేశించారు.
సంబంధిత శాఖలు పరస్పర సమన్వయంతో పనిచేస్తూ ఆహ్వానితుల జాబితాను రూపొందించాలని, ఆహ్వానాల పంపిణీని వేగవంతం చేయాలని సంజయ్ జాజు స్పష్టం చేశారు. సమ్మిట్కు వచ్చే ప్రతినిధులకు తెలంగాణలోని పెట్టుబడి అవకాశాలను సమగ్రంగా వివరించేలా కార్యాచరణ రూపొందించాలని సూచించారు.
తెలంగాణను ప్రపంచస్థాయి పెట్టుబడుల గమ్యస్థానంగా నిలపడం** ‘ఇన్వెస్ట్ తెలంగాణ’ గ్లోబల్ సమ్మిట్ ప్రధాన లక్ష్యాల్లో ఒకటని సీఎస్ పేర్కొన్నారు. రాష్ట్రంలో పెట్టుబడులకు అనుకూలమైన వాతావరణం, అందుబాటులో ఉన్న మౌలిక వసతులు, వివిధ రంగాల్లో ఉన్న అవకాశాలను అంతర్జాతీయ పెట్టుబడిదారులకు సమర్థవంతంగా పరిచయం చేయాలని అధికారులకు సూచించారు.
ముఖ్యంగా ఫ్యూచర్ సిటీ, ఐటీ, ఆర్టిఫిషియల్ ఇంటెలిజెన్స్ (ఏఐ), ఫార్మాస్యూటికల్స్, డిఫెన్స్ అండ్ ఏరోస్పేస్, ఎలక్ట్రానిక్స్, సెమీకండక్టర్లు, క్లీన్ ఎనర్జీ, అధునాతన తయారీ, మౌలిక వసతులు, ఆవిష్కరణలు** వంటి రంగాల్లో తెలంగాణకు ఉన్న అవకాశాలను సమ్మిట్ వేదికగా ప్రపంచానికి చాటిచెప్పేలా ప్రణాళిక రూపొందించాలని సీఎస్ ఆదేశించారు.
సమ్మిట్ను ప్రతిష్టాత్మకంగా నిర్వహించేందుకు అన్ని శాఖలు సమన్వయంతో పనిచేయాలని, అంతర్జాతీయ స్థాయిలో తెలంగాణ పెట్టుబడి సామర్థ్యాన్ని మరింత బలోపేతం చేసే విధంగా ఏర్పాట్లు ఉండాలని ఆయన సూచించారు.
Leave a Reply