కోకాపేట భూములకు భారీ డిమాండ్.... !

ఈ-వేలంలో రికార్డు బిడ్లు….!

(న్యూస్ఇన్‌,హైద‌రాబాద్)

హైద‌రాబాద్ న‌గ‌ర శివారుల్లోని కోకాపేట భూముల‌కు భారీ డిమాండ్ కొన‌సాగుతోంది. మ‌రోసారి ఈ ప్రాంతంలో రికార్డు స్థాయిలో బిడ్లు వేశారు. HMDA నిర్వహించిన విలువైన భూముల ఈ-వేలానికి బిడ్డర్ల నుంచి భారీ స్పందన వ‌చ్చింది. నియోపోలిస్ లేఅవుట్, గోల్డెన్ మైల్ సైట్-1లోని ప్లాట్లకు జరిగిన వేలంలో భారీగా బిడ్లు నమోదయ్యాయి.
గండిపేట్ మండలం కోకాపేట్ గ్రామ పరిధిలోని రెండు ప్రాంతాల్లో HMDA ఈ-వేలం నిర్వహించింది. గోల్డెన్ మైల్ సైట్-1లోని 0.70 ఎకరాల ప్లాట్ కు అత్యధిక స్థాయిలో పోటీ ఏర్ప‌డింది.ఈ ప్లాట్‌ ఎకరాకు రూ.70 కోట్లను అప్‌సెట్ ధరగా నిర్ణయించగా వేలంలో అత్యధిక బిడ్ ఎకరాకు రూ.115 కోట్లకు చేరింది. హైదరాబాద్ పశ్చిమ ప్రాంతంలోని ప్రీమియం భూములపై ఉన్న డిమాండ్‌కు ఈ బిడ్ మ‌రోసారి నిరూపించింది.

నియోపోలిస్ ప్లాట్‌కు రూ.120 కోట్ల బిడ్….నియోపోలిస్ లోని ప్లాట్ నంబర్ 17, 4.59 ఎకరాల విస్తీర్ణానికి ఒకే బిడ్ దాఖ‌లైంది. ఈ బిడ్డ‌ర్ ఎక‌రాకు 120 కోట్ల రుపాయ‌లుగా వేశారు. నియోపోలిస్, గోల్డెన్ మైల్ ప్రాంతాలకు ఉన్న మౌలిక సదుపాయాలు, రవాణా సౌక‌ర్యం ఔటర్ రింగ్ రోడ్ (ORR), ఫైనాన్షియల్ డిస్ట్రిక్ట్, గచ్చిబౌలి, HITEC సిటీ వంటి కీలక ప్రాంతాలకు కోకాపేట్ నుంచి కనెక్టివిటీ ఉంది.