దానం అనర్హత - ఖైరతాబాద్‌ ఉప ఎన్నిక.. !

మారనున్న రాజకీయ సమీకరణాలు

(న్యూస్ఇన్‌,హైద‌రాబాద్)

ఖైరతాబాద్ అసెంబ్లీ ఉప ఎన్నిక అనివార్యంగా మారింది. 2023 ఎన్నిక‌ల్లో ఎమ్మెల్యేగా ఎన్నికైన దానం నాగేందర్ పార్టీ ఫిరాయింపు విష‌యంలో కోర్టు తీర్పులు తెలంగాణా రాజ‌కీయాల్లో కీల‌కంగా మారాయి. హై కోర్టు తీర్పు పై దానం సుప్రీం కోర్టుకు వెళ్లి ఉప ఎన్నిక‌ల‌కు వెన‌క‌డుగు వేసినా….సుప్రీం కోర్టులో దానంకు చుక్కెదురైంది. ఫలితంగా నియోజకవర్గానికి ఉప ఎన్నిక జరగాల్సిన పరిస్థితి ఏర్పడింది.

2023 అసెంబ్లీ ఎన్నికల్లో బీఆర్ ఎస్ అధికారంలోకి రాకుండా కాంగ్రెస్ అధికారంలోకి రావ‌డంతో…..ఆయన కాంగ్రెస్‌లో చేరారు. సికింద్రాబాద్ లోక్‌సభ స్థానం నుంచి కాంగ్రెస్ అభ్యర్థిగా పోటీ చేశారు. ఎమ్మెల్యే పదవికి రాజీనామా చేయకుండా మరో పార్టీ అభ్యర్థిగా లోక్‌సభ ఎన్నికల్లో పోటీ చేయడాన్ని సవాల్ చేస్తూ దాఖలైన అనర్హత పిటిషన్లపై వివాదం కొనసాగింది. ఫిరాయింపు ఎమ్మెల్యే విష‌యంలో స్పీకర్ తీర్పు ఫిరాయింపు ఎమ్మెల్యేల‌కు ఉప శ‌మ‌నం ల‌భించినా….అది ఎక్కువ రోజులు నిల‌బ‌డ‌లేదు. ఈ నిర్ణ‌యంతో విబేధించినా హైకోర్టు దానం నాగేందర్‌ను ఎమ్మెల్యే పదవికి అనర్హుడిగా ప్రకటించింది.

హైకోర్టు తీర్పును దానం నాగేంద‌ర్ స్వాగ‌తించారు. కానీ ఒక్క రోజు తిర‌గ‌క ముందే దానం నాగేందర్ సుప్రీంకోర్టును ఆశ్రయించారు. ఆయనకు తాత్కాలిక ఊరట లభించలేదు. సుప్రీంకోర్టు ఆ పిటిషన్‌ను కొట్టివేసి హైకోర్టు తీర్పులో జోక్యం చేసుకునేందుకు స‌రైన‌ కారణం లేదని స్పష్టం చేసింది. దీంతో ఖైరతాబాద్ స్థానానికి ఉప ఎన్నిక అనివార్యంగా మారింది.

ఉప ఎన్నికపై పార్టీల దృష్టి….

సుప్రీం తీర్పుతో ప్రధాన రాజకీయ పార్టీల దృష్టి ఖైరతాబాద్‌పై పెట్టాయి. అధికార కాంగ్రెస్‌కు ఉప ఎన్నిక‌ల ప్ర‌తిష్టాత్మ‌కంగా మారింది. బీఆర్ఎస్‌కు సిట్టింగ్ స్థానాన్ని త‌మ ఖాతాలో వేసుకునేందుకు అవకాశం ఏర్పడింది. బీజేపీ కూడా ఉప ఎన్నికను ప్రతిష్టాత్మకంగా తీసుకుంటామ‌ని సంకేతాలు ఇస్తోంది.

అయితే అధికార పార్టీలో దానం నాగేందర్ మళ్లీ పోటీ చేసే అంశం రాజకీయంగా తీవ్ర చ‌ర్చ జ‌రుగుతోంది. సుప్రీంకోర్టు తీర్పు అనంతరం దానం నాగేందర్ తాను ఎన్నికలను ఎదుర్కొనేందుకు సిద్ధంగా ఉన్నానని ప్రకటించారు. గతంలో ఖైరతాబాద్ నుంచి ఎమ్మెల్యేగా గెలిచిన అనుభవం, క్షేత్ర స్థాయిలో ఉన్న ప‌ట్టు కార‌ణంగా పూర్తి ధీమాతో దానం ఉన్నా….కాంగ్రెస్ పార్టీ టికెట్ దానం నాగేంద‌ర్ కు కేటాయిస్తుందా లేదా అన్న దానిపై పెద్ద ఎత్తున ఊహాగానాలు వినిపిస్తున్నాయి.

బీఆర్ఎస్ ఇప్పటికే ఖైరతాబాద్ ఉప ఎన్నికపై కసరత్తు ప్రారంభించింది. దానం నాగేందర్ అనర్హత నేపథ్యంలో పార్టీ తరఫున బలమైన అభ్యర్థిని ఎంపిక చేయడంపై చర్చలు జరుగుతున్నాయి. నియోజకవర్గంలో పార్టీ కార్యకలాపాలు, స్థానిక నాయకుల బలం, అభ్యర్థి సామాజిక మరియు రాజకీయ పరిచయాలను పరిగణనలోకి తీసుకుని నిర్ణయం తీసుకునే అవకాశం ఉంది. త్వ‌ర‌లో నియోజ‌క‌వ‌ర్గంలో స‌ర్వే జ‌రిపి అభ్య‌ర్థి ఎంపిక‌పై బీఆర్ ఎస్ క‌స‌ర‌త్తు మొద‌లు పెట్ట‌నుంది.

సుప్రీంకోర్టు తీర్పును బీజేపీ నేతలు స్వాగతించారు. కేంద్ర మంత్రి జి. కిషన్ రెడ్డి ఉప ఎన్నికలో బీజేపీ పోటీ చేస్తుందని, పార్టీకి అనుకూల ఫలితం వస్తుందన్నధీమా వ్యక్తం చేశారు.గ‌తంలో ఈ స్థానం బీజేపీ ఖాతాలో ఉంద‌న్న అంశాన్ని బీజేపీ నేత‌లు ప్ర‌స్తావిస్తున్నారు.

అభ్యర్థుల ఎంపికే కీలకం….

ఖైరతాబాద్ ఉప ఎన్నికలో ప్రధాన పార్టీలకు అభ్యర్థుల ఎంపిక కీలక అంశంగా మారనుంది. కాంగ్రెస్ దానం నాగేందర్‌నే కొనసాగిస్తుందా? లేక కొత్త ముఖాన్ని రంగంలోకి దింపుతుందా? బీఆర్ఎస్ ఎవరిని బరిలోకి దింపుతుంది? బీజేపీ వ్యూహం ఏమిటి? అనే ప్రశ్నలు రాజ‌కీయంగా చ‌ర్చ‌కు వస్తున్నాయి.

తీర్పు తర్వాత బీఆర్ఎస్ లో జోష్…..

2023 ఎన్నిక‌ల్లో గులాబీ పార్టీ ఎమ్మెల్యేలు 37 మంది విజ‌యం సాధించారు. కాంగ్రెస్ పార్టీ అధికారంలోకి రావ‌డంతో ఎమ్మెల్యేల సంఖ్య 27కు త‌గ్గింది. పార్టీ ఫిరాయింపుల‌ను సీరియ‌స్ గా తీసుకున్న బీఆర్ఎస్ పెద్ద‌లు రాజ‌కీయంగా స్పీక‌ర్ పై వ‌త్తిడి తెస్తూనే…న్యాయ ప‌రంగా బ‌ల‌మైన పోరాటం చేశారు. ఫిరాయింపు ఎమ్మెల్యేలు పార్టీ మారిన‌ట్లు ఆధారాలు స‌మ‌ర్పించారు. దానం విష‌యంలో గులాబీ పార్టీ వ్యూహం స‌క్సెస్ కావ‌డంతో….ఇక మిగిలిన ఫిరాయింపు ఎమ్మెల్యేల్లో టెన్ష‌న్ పెరిగింది. గులాబీ పార్టీలో మాత్రం కోర్టు తీర్పులు కొత్త జోష్ ఇస్తున్నాయి.

FALLO US ON…..https://whatsapp.com/channel/0029Vb7fQokJENxuemz6EL3X