(న్యూస్ఇన్,అమరావతి)
సీఐఐ పార్టనర్షిప్ సమ్మిట్–2026కు ముందు ఐదు ప్రాంతాల్లో రీజినల్ కాన్ఫరెన్సులు నిర్వహించాలని ముఖ్యమంత్రి నారా చంద్రబాబు నాయుడు అధికారులను ఆదేశించారు. రాష్ట్రంలో పెట్టుబడుల ఆకర్షణకు ఊతమిచ్చేలా రాష్ట్ర ప్రభుత్వం కార్యాచరణ అమలు చేస్తోంది. నవంబర్ 12, 13 తేదీల్లో జరగనున్న 31వ సదస్సుపై సీఎం సమీక్ష నిర్వహించారు.
ఐదు నగరాల్లో ప్రాంతీయ సదస్సులు…..
విశాఖపట్నం, కాకినాడ, గుంటూరు, అనంతపురం, తిరుపతిలో అక్టోబర్ 7 నుంచి 26 వరకు రీజినల్ కాన్ఫరెన్సులు జరగనున్నాయి. ఆయా ప్రాంతాల ప్రత్యేకతలు, పెట్టుబడి అవకాశాలకు అనుగుణంగా రంగాలను ఎంపిక చేశారు. రీజినల్ కాన్ఫరెన్సుల్లోనే ఎంవోయూలు కుదుర్చుకునేలా ఏర్పాట్లు చేస్తున్నారు. ప్రధాన ప్రాజెక్టులకు సంబంధించిన ఒప్పందాలను మాత్రం విశాఖ సదస్సులో చేసుకునేలా ప్రణాళిక రూపొందించారు.
ఎంఎస్ఎంఈలు, స్టార్టప్లకు ప్రాధాన్యత…
ప్రతి రీజినల్ కాన్ఫరెన్స్లో ఎంఎస్ఎంఈ షోకేస్ నిర్వహించాలని సీఎం సూచించారు. స్టార్టప్లలో పెట్టుబడులను ప్రోత్సహించేందుకు ‘షార్క్ ట్యాంక్’ తరహా విధానాన్ని తీసుకురావాలని చెప్పారు. రతన్ టాటా ఇన్నోవేషన్ హబ్లను కాన్ఫరెన్సులతో అనుసంధానించాలని ఆదేశించారు. మరో 30 నియోజకవర్గాల్లో ఎంఎస్ఎంఈ పార్కులకు సమ్మిట్కు ముందే శంకుస్థాపన చేయాలని సూచించారు. విద్యార్థుల్లో వ్యాపార ఆలోచనలను పెంచేలా 7వ తరగతి నుంచే ఎంట్రప్రెన్యూర్షిప్ పాఠ్యాంశాలను ప్రవేశపెట్టాలని పేర్కొన్నారు.
పెట్టుబడుల గ్రౌండింగ్పై దృష్టి…
2024 జూన్ నుంచి ఇప్పటివరకు రూ.22.57 లక్షల కోట్ల పెట్టుబడులకు సంబంధించి 714 ప్రాజెక్టులకు ఎంవోయూలు కుదిరినట్లు అధికారులు సీఎంకు వివరించారు. వీటిలో రూ.16.6 లక్షల కోట్ల విలువైన 473 ప్రాజెక్టులు కన్వర్ట్ కాగా, 247 ప్రాజెక్టులు గ్రౌండింగ్ అయినట్లు తెలిపారు. అక్టోబర్ చివరి నాటికి 80 శాతం పెట్టుబడి ప్రతిపాదనలను కన్వర్ట్ చేసి, కన్వర్ట్ అయిన వాటిలో 75 శాతం ప్రాజెక్టులను గ్రౌండింగ్ చేయాలని సీఎం లక్ష్యంగా నిర్దేశించారు.
దేశ, విదేశాల్లో రోడ్షోలు….
సమ్మిట్కు పెట్టుబడిదారులను ఆకర్షించేందుకు దేశీయంగా చెన్నై, కోయంబత్తూరు, బెంగళూరులో రోడ్షోలు నిర్వహించారు. అహ్మదాబాద్, హైదరాబాద్, ముంబైలోనూ కార్యక్రమాలు చేపట్టనున్నారు. సింగపూర్, కొరియా, తైవాన్లో అంతర్జాతీయ రోడ్షోలు పూర్తయ్యాయి. స్వీడన్, జపాన్, చైనాలోనూ రోడ్షోలు నిర్వహించనున్నారు. ‘ట్రేడ్, టెక్నాలజీ, ట్రస్ట్, థాట్ లీడర్షిప్’ను సమ్మిట్ ప్రధాన థీమ్గా నిర్ణయించారు.
FALLOW US ON……https://whatsapp.com/channel/0029Vb7fQokJENxuemz6EL3X
Leave a Reply