TG-TMARS ఏర్పాటు.. రోడ్డు భద్రత, ట్రాఫిక్ నిర్వహణ

(న్యూస్ఇన్,హైద‌రాబాద్)

రాష్ట్రంలో ట్రాఫిక్ నిర్వహణ, రోడ్డు ప్రమాదాల నియంత్రణకు తెలంగాణ ప్రభుత్వం TG-TMARS పేరుతో ప్రత్యేక వ్యవస్థను ఏర్పాటు చేసింది. తెలంగాణ ట్రాఫిక్ మేనేజ్‌మెంట్, రోడ్ అండ్ రైల్ సేఫ్టీ బ్యూరో ను ఏర్పాటు చేస్తూ ప్రభుత్వం ఉత్తర్వులు జారీ చేసింది. సీఎం రేవంత్‌రెడ్డి అధ్యక్షతన ఉన్న రాష్ట్ర రోడ్డు భద్రతా మండలి పరిధిలో ఈ బ్యూరో పనిచేయనుంది.

హైదరాబాద్ కేంద్రంగా TG-TMARS

హైదరాబాద్ కేంద్రంగా పనిచేసే TG-TMARSకు ADGP లేదా IGP స్థాయి అధికారి ప‌ర్య‌వేక్ష‌ణ‌లో ప‌నిచేయ‌నుంది.
రాష్ట్రవ్యాప్తంగా ట్రాఫిక్ నిర్వహణ, అమలు, రోడ్డు ప్రమాదాల దర్యాప్తు, హైవే పెట్రోలింగ్ తదితర అంశాలను ఒకే వ్యవస్థ కిందకు తీసుకురావడం బ్యూరో ప్రధాన ఉద్దేశం. 32 వేల కిలోమీటర్లకు పైగా ఉన్న రహదారులు, 1.8 కోట్లకు పైగా నమోదైన వాహనాల రాకపోకలపై ఈ వ్యవస్థ పర్యవేక్షణ ఉంటుంది. మెట్రో, రైల్వే భద్రతకు సంబంధించిన బాధ్యతలు కూడా TG-TMARS పరిధిలోకి తెస్తూ స‌ర్కార్ నిర్ణ‌యం తీసుకుంది.రోడ్డు ప్రమాదాల్లో క్షతగాత్రులకు సకాలంలో వైద్యం అందించేందుకు ప్రతి పోలీస్ స్టేషన్‌లో రోడ్ యాక్సిడెంట్ రెస్పాన్స్ ఆఫీసర్ ను అందుబాటులో ఉండేలా ప్ర‌భుత్వం చ‌ర్య‌లు చేప‌ట్ట‌నుంది.

ORR, హైవేలపై ప్రత్యేక పెట్రోలింగ్

ఔటర్ రింగ్ రోడ్‌తో పాటు హైవేలపై ప్రత్యేక హైవే పెట్రోలింగ్ యూనిట్లు అందుబాటులోకి రానున్నాయి. స్పీడ్ డిటెక్టర్లు, అధునాతన కెమెరాల సాయంతో ప్ర‌మాదాల నివార‌ణ‌కు నిరంతరం పర్యవేక్షించే విధంగా ఏర్పాట్లు చేయ‌నుంది.

ట్రాఫిక్ జరిమానాలతో ప్రత్యేక నిధి

TG-TMARS నిర్వహణ కోసం ట్రాఫిక్ మేనేజ్‌మెంట్ ఫండ్ ఏర్పాటు చేశారు. పోలీసులకు వచ్చే ట్రాఫిక్ జరిమానాల మొత్తంలో 40 శాతం ఈ నిధికి మళ్లించనున్నారు. సిబ్బంది శిక్షణ, ఆధునిక సాంకేతిక పరిజ్ఞానం, పెట్రోలింగ్ వాహనాలు, అత్యవసర రోడ్డు మరమ్మతులకు ఈ నిధులను వినియోగించనున్నారు.