గోదావరి నీటితో జలాశయాలు నింపాలి: హరీశ్‌రావు
(న్యూస్ఇన్‌,హైదరాబాద్)
గోదావరిలో భారీగా వరద నీటిని ఎత్తిపోసి జలాశయాలను నింపాలని మాజీ మంత్రి, బీఆర్‌ఎస్‌ ఎమ్మెల్యే హరీశ్‌రావు డిమాండ్ చేశారు. నీటిపారుదల శాఖ మంత్రి ఉత్తమ్‌కుమార్‌రెడ్డికి ఆయన లేఖ రాశారు.వర్షాభావ పరిస్థితుల కారణంగా పంటలు ఎండిపోతున్న సమయంలో గోదావరిలో వరద నీరు అందుబాటులో ఉన్నప్పటికీ దాన్ని రిజర్వాయర్లకు మళ్లించకపోవడం ఆందోళనకరమని హరీశ్‌రావు పేర్కొన్నారు. కాళేశ్వరం ప్రాజెక్టులో భాగంగా నిర్మించిన రిజర్వాయర్లను వరద సమయంలో నింపితే రైతులకు ప్రయోజనం చేకూరుతుందని తెలిపారు.
అన్నపూర్ణ, రంగనాయక సాగర్ రిజర్వాయర్లు డెడ్‌స్టోరేజీలో ఉన్నాయని, మల్లన్న సాగర్‌లో 50 టీఎంసీల సామర్థ్యానికి గాను ప్రస్తుతం 13 టీఎంసీల నీరు మాత్రమే ఉందని లేఖలో పేర్కొన్నారు. కొండపోచమ్మ సాగర్‌లో 15 టీఎంసీలకు గాను 6 టీఎంసీలే ఉన్నాయని తెలిపారు. ఎల్లంపల్లి నుంచి నీటిని ఎత్తిపోస్తే మిడ్‌మానేరు సహా పలు రిజర్వాయర్లను నింపడంతో పాటు హైదరాబాద్ తాగునీటి అవసరాలకు కూడా ఉపయోగపడుతుందనన్నారు.
మిడ్‌మానేరు దిగువన ఉన్న లోయర్‌ మానేరు డ్యాంలోనూ ప్రస్తుతం 11 టీఎంసీల నీరు మాత్రమే ఉందని హరీశ్‌రావు తెలిపారు. ఈ రిజర్వాయర్లను నింపడం ద్వారా పలు జిల్లాల్లో సాగు, తాగునీటి అవసరాలకు ప్రయోజనం కలుగుతుందని పేర్కొన్నారు. ఎల్‌నినోను సాకుగా చూపకుండా గోదావరి వరద నీటిని సద్వినియోగం చేసుకోవాలని, అన్ని మోటార్లను 24 గంటలు నడిపి జలాశయాలను నింపాలని మంత్రి ఉత్తమ్‌కుమార్‌రెడ్డిని హరీశ్‌రావు కోరారు.