(న్యూస్ఇన్,హైదరాబాద్)
రాష్ట్ర వ్యాప్తంగా గణేష్ నిమజ్జనాలు ప్రశాంతంగా కొనసాగుతున్నాయని డీజీపీ సి.వి. ఆనంద్ తెలిపారు. శుక్రవారం సాయంత్రం డీజీపీ కార్యాలయంలో ఏర్పాటు చేసిన మీడియా సమావేశంలో నిమజ్జన ఏర్పాట్లు, పోలీసు బందోబస్తు, నిమజ్జనాల వివరాలను వెల్లడించారు.
రాష్ట్రవ్యాప్తంగా గణేష్ పోర్టల్లో 1.24 లక్షల విగ్రహాలు నమోదయ్యాయని డీజీపీ తెలిపారు. గతేడాది 1.15 లక్షల విగ్రహాలు నమోదయ్యాయని, ఈసారి సంఖ్య పెరిగిందన్నారు. ఇళ్లు, అపార్ట్మెంట్లు, వ్యక్తిగత ప్రదేశాల్లో ఏర్పాటు చేసిన విగ్రహాలను కలిపితే మొత్తం సంఖ్య 3.5 నుంచి 4 లక్షల వరకు ఉండొచ్చన్నారు.
శుక్రవారం ఉదయం వరకు రాష్ట్రవ్యాప్తంగా సుమారు 88 వేల విగ్రహాల నిమజ్జనం పూర్తయిందని, మిగిలిన ప్రక్రియను శనివారం ఉదయం 10.30 గంటల్లోపు పూర్తి చేసేలా చర్యలు తీసుకుంటున్నామని వెల్లడించారు. హైదరాబాద్లో భారీ సంఖ్యలో విగ్రహాలు తరలిరావడంతో కొంత ఆలస్యం జరుగుతోందని తెలిపారు.
నిమజ్జనాల సందర్భంగా హైదరాబాద్లో 25 వేల మందికి పైగా పోలీసులతో బందోబస్తు ఏర్పాటు చేసినట్లు డీజీపీ చెప్పారు. టీజీఎస్పీ, ఆర్ఏఎఫ్, ఎన్డీఆర్ఎఫ్, ఆక్టోపస్ బలగాలతోపాటు అదనపు బలగాలను మోహరించినట్లు తెలిపారు. ప్రధాన ప్రాంతాల్లో సీసీటీవీలతో పరిస్థితిని పర్యవేక్షిస్తున్నామని, క్రేన్లు, అత్యవసర సేవలను అందుబాటులో ఉంచామని వివరించారు.
గణేష్ ఉత్సవాల సందర్భంగా గత పది రోజుల్లో 13 మంది మృతి చెందడం బాధాకరమని, ప్రమాదాల్లో 26 మంది గాయపడ్డారని డీజీపీ తెలిపారు. శబ్ద కాలుష్యాన్ని తగ్గించి నిబంధనలు పాటించాలని కోరారు.గణేష్ నిమజ్జనాలు ప్రశాంతంగా సాగడం తెలంగాణ ప్రజల ఐక్యత, సోదరభావానికి నిదర్శనమన్నారు. నిమజ్జనానికి వచ్చే విగ్రహాలను ఆలస్యం చేయకుండా తరలించి, ట్రాఫిక్ నియంత్రణలో పోలీసులకు సహకరించాలని కోరారు.
FALLOW US ON….https://whatsapp.com/channel/0029Vb7fQokJENxuemz6EL3X
Leave a Reply