ఖైరతాబాద్ ఉప ఎన్నికపై పార్టీల కసరత్తు....!

బీఆర్‌ఎస్‌లో అభ్యర్థి వేట, కాంగ్రెస్‌లో దానంపైనే చర్చ

(న్యూస్ఇన్‌,హైద‌రాబాద్)

ఖైరతాబాద్ అసెంబ్లీ స్థానానికి ఉప ఎన్నిక అనివార్యమయ్యే పరిస్థితి నేపథ్యంలో ప్రధాన రాజకీయ పార్టీల్లో కసరత్తు మొదలైంది. తెలంగాణ హైకోర్టు దానం నాగేందర్‌పై అనర్హత వేటు వేయడం, సుప్రీంకోర్టును ఆశ్రయించినా ఫ‌లితం ద‌క్క‌లేదు ఈ పరిణామాలతో ఖైరతాబాద్ రాజకీయాలు రాష్ట్ర వ్యాప్తంగా అంద‌రి దృష్టిని ఆక‌ర్షిస్తున్నాయి. ఉప ఎన్నిక జరిగితే ఎవరిని బరిలోకి దింపాలన్న దానిపై బీఆర్‌ఎస్‌, కాంగ్రెస్‌, బీజేపీ పార్టీల్లో అంత‌ర్గ‌తంగా చ‌ర్చ‌లు మొద‌ల‌య్యాయి.

కాంగ్రెస్‌లో దానం కు స్థానం ఉంటుందా?

కాంగ్రెస్‌లో మాత్రం దానం నాగేందర్‌ అభ్యర్థిత్వంపైనే ప్రధానంగా చర్చ సాగుతోంది. ఆయ‌న స్థానంలో ముఖ్య‌మంత్రి రేవంత్ రెడ్డి మ‌రో అభ్య‌ర్థిని రంగంలోకి దించుతార‌న్న ప్ర‌చారం జోరుగా జ‌రుగుతోంది. తుది నిర్ణయం పార్టీ అధిష్ఠానానిదేనని టీపీసీసీ అధ్యక్షుడు మహేశ్‌కుమార్‌ గౌడ్‌ స్పష్టం చేశారు. ఉప ఎన్నిక వ‌స్తే దానంతో పాటు పీజేఆర్ కూతురు విజ‌యారెడ్డి, రోహిణ్ రెడ్డిల పేర్లు తెర‌పైకి వ‌స్తున్నాయి. ఈ నేప‌థ్యంలో పార్టీ హై క‌మాండ్ ఎవ‌రిని అభ్య‌ర్థిగా ఖ‌రారు చేస్తుందో అన్న చ‌ర్చ ఇప్పుడే మొద‌లైంది.

బీఆర్‌ఎస్‌లో ఎవరిపై చర్చ ?

దానం నాగేందర్ 2023లో బీఆర్‌ఎస్‌ అభ్యర్థిగా ఖైరతాబాద్ నుంచి గెలిచి అనంతరం కాంగ్రెస్‌లో చేరారు. దీంతో ఉప ఎన్నిక జరిగితే ఆయనకు దీటుగా అభ్యర్థిని ఎంపిక చేయాలని బీఆర్‌ఎస్‌ భావిస్తున్నట్లు సమాచారం. ప్రస్తుతం ఎమ్మెల్సీ దాసోజు శ్రవణ్‌ కుమార్‌, తలసాని శ్రీనివాస్‌ యాదవ్‌ తనయుడు సాయికిరణ్‌ యాదవ్‌ పేర్లు పార్టీ వర్గాల్లో వినిపిస్తున్నాయి. కాని అధికార పార్టీ…దానం నాగేంద‌ర్ లాంటి బ‌ల‌మైన అభ్య‌ర్థిని ప‌రిగ‌ణ‌లోకి తీసుకుంటే బీఆర్ ఎస్ పార్టీ ఆ స్థాయిలో ఎవ‌ర‌న్న‌ది ఆస‌క్తి రేపుతోంది.ఇక్క‌డ కూడా మాజీ ఎమ్మెల్యే పి. విష్ణువర్ధన్‌రెడ్డి పేరుపైనా గ చర్చ జ‌రుగుతున్న‌ట్లు తెలుస్తోంది. ఖైరతాబాద్‌ రాజకీయాలతో పీజేఆర్‌ కుటుంబానికి ఉన్న పాత పరిచయాలు ఈ చర్చకు కారణంగా కనిపిస్తున్నాయి.

బీఆర్‌ఎస్‌కు అభ్యర్థి ఎంపిక కీలకం….

ఖైరతాబాద్‌లో మూడు ప్ర‌ధాన రాజ‌కీయ పార్టీలు ప్రాతినిథ్యం వ‌హించిన చరిత్ర ఉంది. కాంగ్రెస్, బీఆర్ ఎస్ పార్టీల త‌ర‌పున దానం నాగేంద‌ర్ ఎన్నిక‌వ్వ‌గా బీజేపీ అభ్య‌ర్థిగా 2014 ఎన్నిక‌ల్లో చింతల రాంచంద్రా రెడ్డి విజ‌యం ద‌క్కించుకున్నారు. దీంతో ప్ర‌ధాన రాజ‌కీయ పార్టీల‌నీ ఈ స్థానంపై తీవ్రంగా క‌స‌ర‌త్తు చేసే అవ‌కాశం ఉంది. అయితే బీఆర్ ఎస్ పార్టీకి మాత్రం అభ్య‌ర్థి ఎంపిక పెద్ద స‌వాల్ గా నిలిచే అవ‌కాశం క‌నిపిస్తోంది.

బీజేపీలోనూ ఆశావహులు…..

2014లో ఈ నియోజకవర్గంలో బీజేపీ విజయం సాధించిన నేపథ్యంలో పార్టీకి ఇక్కడి పోటీపై ఆసక్తి ఉంది. ప్రస్తుతం చింతల రామచంద్రారెడ్డి, చీకోటి ప్రవీణ్‌, లంకాల దీప‌క్ రెడ్డి పేర్లు చ‌ర్చ‌లో ఉన్నాయి.ఉప ఎన్నిక తేదీపై అధికారిక ప్రకటన రావాల్సి ఉండగా, మూడు ప్రధాన పార్టీలు మాత్రం ముందుగానే రాజకీయ సమీకరణాలను అంచనా వేస్తున్నాయి. అభ్యర్థుల ఎంపిక, స్థానిక నాయకత్వం, గత ఎన్నికల ఓటింగ్‌ సరళి అభ్య‌ర్థుల ఎంపిక పై స‌ర్వేలు నిర్వ‌హిస్తూ ఎన్నిక‌ల‌కు సిద్ధం అయ్యే ప‌నిలో ప‌డ్డాయి.

FALLOW US ON…..https://whatsapp.com/channel/0029Vb7fQokJENxuemz6EL3X