హైదరాబాద్ లో కాంగ్రెస్ నిర్వహించేది యాంటి భారత్ సమ్మిట్ : బీజేపీ
(న్యూస్ఇన్, హైదరాబాద్)
హైదరాబాద్‌లో కాంగ్రెస్ పార్టీ నిర్వహిస్తున్న ‘భారత్ సమ్మిట్’ అసలు భారత్ సమ్మిట్టే కాదు.. ఇది పక్కా ‘యాంటీ భారత్ సమ్మిట్’ అని బీజేపీ రాష్ట్ర అధ్యక్షుడు ఎన్ రామచంద్రరావు ఆరోపించారు.భారతదేశానికి వ్యతిరేకంగా కుట్రలు చేసే దేశాలు, వ్యక్తులంతా కలిసి ‘ప్రోగ్రెసివ్ అలయెన్స్’గా ఏర్పడ్డారు.. అందులో రాహుల్ గాంధీ కూడా సభ్యుడే అని విమర్శించారు.గతంలో జరిగిన గ్లోబల్ సమ్మిట్‌లో.. ఇదే ప్రోగ్రెసివ్ అలయెన్స్‌కు చెందిన నాయకుడు రాహుల్ గాంధీతో దిగిన ఫొటోలను ఒక్కసారి పరిశీలిస్తే వీరి సంబంధాలు స్పష్టంగా అర్థమవుతాయన్నారు.
ప్రోగ్రెసివ్ ఇంటర్నేషనల్ అనే సంస్థ ప్రతినిధుల బృందంతో ఏఐసీసీ అధ్యక్షుడు మల్లికార్జున ఖర్గే న్యూఢిల్లీలో భేటీ అయ్యారు.. 10 జనపథ్‌లో సోనియా గాంధీ కూడా వారితో ప్రత్యేకంగా సమావేశం అయినట్లు తెలిపారు.ఈ ప్రోగ్రెసివ్ ఇంటర్నేషనల్ వెనుక భారత వ్యతిరేక శక్తులైన జార్జ్ సోరోస్ వంటి వ్యక్తులు ఉన్నారన్నారు.
ప్రపంచవ్యాప్తంగా ప్రజాస్వామ్యబద్ధంగా ఎన్నికైన ప్రభుత్వాలను కూలదోయడానికి ‘రెజీమ్ చేంజ్’ (ప్రభుత్వాల మార్పు) అనే కుట్రపూరిత నినాదంతో ఈ సంస్థలు పని చేస్తున్నాయని రామచంద్రరావు ఘాటుగా విమర్శించారు.ఇదే ప్రోగ్రెసివ్ అలయెన్స్ స్పెయిన్, ఫ్రాన్స్, అల్బేనియా, నేపాల్, శ్రీలంక, బంగ్లాదేశ్ వంటి దేశాల్లో తీవ్ర అలజడులు సృష్టించింది.. ఇప్పుడు సోనియా, రాహుల్ సభ్యులుగా ఉన్న ఇదే కూటమిని భారతదేశంలోకి తెచ్చే ప్రయత్నాలు మొదలు చేస్తున్నారని ఆరోపించారు.
ఇలాంటి ప్రోగ్రెసివ్ ఇంటర్నేషనల్ అలయెన్స్ ఆధ్వర్యంలో హైదరాబాద్‌లో ‘భారత్ సమ్మిట్’ పేరుతో ఈ సదస్సు నిర్వహిస్తున్నారు.. దీని వెనుక అసలు ఉద్దేశం విఫలమైన రాహుల్ గాంధీని రాజకీయంగా రీలాంచ్ చేయడమే అన్నారు.
రాష్ట్రంలో పెట్టుబడుల కోసం ప్రభుత్వం ‘గ్లోబల్ సమ్మిట్’ నిర్వహిస్తే మాకేమీ అభ్యంతరం లేదు.. కానీ భారతదేశానికి వ్యతిరేకంగా కుట్రలు చేసే దేశద్రోహ శక్తులతో సమ్మిట్లు పెట్టడం సరికాదన్నారు.
ఈ ప్రోగ్రెసివ్ అలయెన్స్‌లో ఉన్న దేశాల్లో 42 దేశాలు ఇస్లామిక్ దేశాలు కాగా.. మిగతావన్నీ లెఫ్టిస్ట్ భావజాలం ఉన్న దేశాలే అని వెల్లడించారు.
భారతదేశంలో శాంతిభద్రతలకు విఘాతం కలిగించి, తీవ్ర అలజడి సృష్టించడానికే ఈ విదేశీ శక్తులన్నీ రేపు హైదరాబాద్‌ను అడ్డాగా మార్చుకునేందుకు కుట్ర పన్నుతున్నాయన్నారు.హైదరాబాద్‌లో భారత్ సమ్మిట్ పేరుతో రాహుల్ గాంధీ విజన్ వినాలని కాంగ్రెస్ నేతలు చెబుతున్నారు.. భారతదేశంలో ఇప్పటికే ప్రజల చేతిలో ఘోరంగా ఫెయిలైన రాహుల్ గాంధీని, 100 దేశాల నుంచి వచ్చిన విదేశీ ప్రతినిధుల ముందు ‘ప్రధానమంత్రి మెటీరియల్’గా లాంచ్ చేస్తారట.
దేశ ప్రజల మద్దతు కోల్పోయిన రాహుల్ గాంధీని.. ఇప్పుడు విదేశీ శక్తులు, 100 దేశాల ప్రతినిధులను అడ్డుపెట్టుకొని లాంచ్ చేయాలని చూడటం హాస్యాస్పదంగా ఉందన్నారు.
భారత వ్యతిరేక శక్తులు, ప్రోగ్రెసివ్ అలయెన్స్ వెన్నుదన్నుతో హైదరాబాద్ గడ్డపై నిర్వహిస్తున్న ఈ సమ్మిట్‌ను బీజేపీ తీవ్రంగా వ్యతిరేకిస్తోందని రామచంద్రరావు వ్యాఖ్యానించారు.