మెడికల్ సీట్ల స్థానికత - విద్యార్థులకు నష్టం: కవిత

(న్యూస్ఇన్‌,హైద‌రాబాద్)

మెడికల్ సీట్ల స్థానికత నిబంధనల్లో మార్పులు చేస్తూ కాంగ్రెస్ ప్రభుత్వం తీసుకొచ్చిన జీవోలు 33, 150 వల్ల తెలంగాణ విద్యార్థులకు తీవ్ర నష్టం జరిగే ప్రమాదం ఉందని తెలంగాణ రక్షణ సేన చీఫ్ కల్వకుంట్ల కవిత అన్నారు. ఈ జీవోలను వెంటనే వెనక్కి తీసుకోవాలని ఆమె డిమాండ్ చేశారు. ఈ మేరకు సోమవారం వీడియో సందేశం విడుదల చేశారు.

మెడికల్ సీట్లలో స్థానికతను నిర్ణయించే విధానంలో మార్పులు చేయడం వల్ల ఇతర రాష్ట్రాల విద్యార్థులకు ప్రయోజనం కలుగుతుందని, తెలంగాణ విద్యార్థులు నష్టపోతారని కవిత పేర్కొన్నారు. తెలంగాణ ప్రయోజనాలకు నష్టం కలిగించే నిబంధనలను ఉపసంహరించాల్సిన ప్రభుత్వం.. సుప్రీంకోర్టులో ఇదే విధానాన్ని సమర్థించడం ఏమిటని ప్రశ్నించారు.

తెలంగాణలో 1 నుంచి 7వ తరగతి వరకు చదివిన వారిని స్థానికులుగా పరిగణించాల్సిన విధానం ఉండగా, 8 నుంచి 12వ తరగతి వరకు ఇక్కడ చదివిన వారికీ స్థానికత కల్పించే విధంగా నిబంధనలు మార్చడంపై ఆమె అభ్యంతరం వ్యక్తం చేశారు. ఈ మార్పుల కారణంగా తమ పిల్లలకు నష్టం జరుగుతోందని విద్యార్థుల తల్లిదండ్రులు ఇప్పటికే ఆవేదన వ్యక్తం చేస్తున్నారని గుర్తు చేశారు.

మెడికల్ సీట్లకు సంబంధించిన స్థానికత విధానాన్ని భవిష్యత్తులో ఇతర రంగాల్లోనూ అమలు చేసే అవకాశం ఉందని కవిత అన్నారు. అదే జరిగితే తెలంగాణ యువతకు మరింత నష్టం వాటిల్లుతుందని ఆందోళన వ్యక్తం చేశారు.

జీవోలు వెనక్కి తీసుకోవాలి……

జీవోలు 33, 150 తెలంగాణకు విపత్తు లాంటివని కవిత వ్యాఖ్యానించారు. ఈ అంశంపై తెలంగాణ సమాజం ప్రశ్నించాలని పిలుపునిచ్చారు. తెలంగాణ ఉద్యమ సమయంలో జేఏసీ చైర్మన్‌గా పనిచేసిన ప్రొఫెసర్ కోదండరామ్ ఈ అంశంపై స్పందించి విద్యార్థులకు జరిగే నష్టాన్ని ప్రభుత్వానికి వివరించాలని కోరారు.

మేధావులు, యువత, విద్యార్థులు కూడా ఈ జీవోలను వ్యతిరేకించాలని ఆమె కోరారు. గ్రూప్-1లో స్థానికత అంశం కారణంగా తెలంగాణ విద్యార్థులు ఇప్పటికే నష్టపోయారని పేర్కొన్నారు. తెలంగాణ ప్రయోజనాలను కాపాడేందుకు ప్రభుత్వం తన వైఖరిని మార్చుకోవాలని కవిత డిమాండ్ చేశారు.