రాష్ట్రంలో 86 బస్ స్టేష‌న్లు మోడ‌ల్ స్టేష‌న్లుగా ఆధునీక‌ర‌ణ
(హైద‌రాబాద్, న్యూస్ఇన్‌)
రాష్ట్రంలో 96 బస్ స్టేషన్లను ఆధునీక‌రించి మోడ‌ల్ బ‌స్టాండ్లుగా తీర్చి దిద్దాల‌ని ఆర్టీసీ నిర్ణ‌యం తీసుకుంది.
బస్ స్టేషన్లలో రద్దీని దృష్టిలో ఉంచుకుని అవసరమైన సదుపాయాలను ఏర్పాటు చేసేలా ప‌నులు మొద‌లు పెట్ట‌నుంది. ప్రయాణీకుల రాకపోకలు సజావుగా సాగేలా చూడటంతో పాటు రాష్ట్రవ్యాప్తంగా ఉన్న ప్రధాన బస్ స్టేషన్లలో అన్ని వసతులను క‌ల్పించ‌డం, స‌మ‌ద‌ర్ధ‌వంతంగా నిర్వ‌హించ‌డంపై ఆర్టీసి దృష్టి సారించింది.
ఇందులో భాగంగా తెలంగాణ వ్యాప్తంగా ప్రతిరోజూ 5,000 మందికి పైగా ప్రయాణికుల రద్దీ ఉండే 86 ప్రధాన బస్ స్టేషన్లను ఆర్టీసి గుర్తించింది.ఈ 86బస్ స్టేషన్లన్నింటిలోనూ ప్రయాణికుల అవసరం కోసం ఒక కంట్రోలర్ ను నియ‌మించ‌డంతో పాటూ ప్రత్యేక విచారణ, సంప్రదింపు నంబర్లను ఏర్పాటు చేయనున్నారు. దీనివల్ల ప్రయాణికులు తమకు కావలసిన బస్సు సర్వీసులు మరియు సమయాలకు సంబంధించిన వివరాలను సులువుగా తెలుసుకునే అవ‌కాశం ఉంటుంది. టైమ్‌టేబుల్ బోర్డులను కూడా అన్ని బస్ స్టేషన్లలో త్వరలోనే ఏర్పాటు చేయనున్నారు.
సీసీటీవీల ఏర్పాటు….
ప్రయాణీకుల భద్రత, బస్ స్టాండ్లలో రద్దీ నిర్వహణ కోసం ఆ బస్ స్టేషన్లలో సీసీటీవీలను ఏర్పాటు చేయ‌నుంది. ఈ ప్రతిపాదిత సీసీటీవీ వ్యవస్థలను సంబంధిత ప్రాంతీయ కార్యాలయాలు, ప్రధాన కార్యాలయానికి నేరుగా అనుసంధానం చేస్తారు. ఉన్న‌తాధికారులు వీటిని ప‌రిశీలించి ఎప్ప‌టిక‌ప్పుడు నిర్ణ‌యాలు తీసుకునే అవ‌కాశం ఉంటుంది. ప్రయాణికుల‌కు ర‌వాణా సేవలను స‌మ‌ర్ధ‌వంతంగా అమ‌లు చేయడానికి టీజీఎస్ఆర్టీసీ అత్యంత ప్రాధాన్య‌త‌గా తీసుకుంటుంద‌ని ఎండీ వై.నాగిరెడ్డి అన్నారు.