డీఎస్పీలు ప్రజల విశ్వాసాన్ని నిలబెట్టాలి: సీఎం రేవంత్ రెడ్డి

తెలంగాణ భవిష్యత్తు మీ చేతుల్లోనే ఉంది..

నియామకాల్లో పూర్తి పారదర్శకత పాటించాం

(హైదరాబాద్,న్యూస్ఇన్‌)

పోలీసు శాఖలో డీఎస్పీలుగా బాధ్యతలు చేపట్టనున్న నూతన అధికారులు ప్రజల విశ్వాసాన్ని నిలబెట్టేలా నిజాయితీ, నిబద్ధతతో విధులు నిర్వహించాలని ముఖ్యమంత్రి రేవంత్ రెడ్డి సూచించారు. రాబోయే 30 ఏళ్లలో తెలంగాణ భవిష్యత్తును ఏ దిశగా నడిపించాలనే అంశంలో డీఎస్పీల పాత్ర కీలకమని అన్నారు. ప్రజలతో ప్రత్యక్ష సంబంధాలు కలిగిన బాధ్యతాయుతమైన హోదాలో ఉన్న అధికారులు తమ అధికారాలను వ్యక్తిగత ప్రయోజనాల కోసం కాకుండా ప్రజా సమస్యల పరిష్కారానికి వినియోగించాలని స్పష్టం చేశారు. మంగళవారం ఎంసీఆర్ హెచ్‌ఆర్‌డీలో నిర్వహించిన కార్యక్రమంలో ఆయన మాట్లాడారు.

తెలంగాణలో సంక్లిష్ట పరిస్థితుల మధ్య డీఎస్పీల నియామక ప్రక్రియను పూర్తి చేశామని సీఎం తెలిపారు. నోటిఫికేషన్ నుంచి నియామకాల వరకు ప్రభుత్వమే బాధ్యత తీసుకుందని పేర్కొన్నారు. 2011 తర్వాత దాదాపు 13 ఏళ్ల పాటు గ్రూప్-1 నియామకాలు జరగలేదని గుర్తుచేశారు. గతంలో టీజీపీఎస్సీ ద్వారా నిర్వహించిన పరీక్షల్లో ప్రశ్నాపత్రాల లీకేజీలు, ఇతర గందరగోళాల కారణంగా నిరుద్యోగులు తీవ్రంగా నష్టపోయారని అన్నారు.

తాను ముఖ్యమంత్రిగా బాధ్యతలు చేపట్టిన వెంటనే టీజీపీఎస్సీని ప్రక్షాళన చేయాలని నిర్ణయించుకున్నట్లు వెల్లడించారు. యూపీఎస్సీ విధానాలను అధ్యయనం చేసి, పోటీ పరీక్షల నిర్వహణలో అనుభవం, చిత్తశుద్ధి ఉన్నవారిని బోర్డులో నియమించామని చెప్పారు. తొలుత రిటైర్డ్ డీజీ మహేందర్ రెడ్డిని ఛైర్మన్‌గా నియమించామని, ప్రస్తుతం సీనియర్ ఐఏఎస్ అధికారి వెంకటేశం ఆ బాధ్యతలు నిర్వహిస్తున్నారని తెలిపారు.

563 పోస్టులకు నోటిఫికేషన్ ఇవ్వగా 562 మంది విధుల్లో చేరారని, 112 మంది డీఎస్పీల నియామకం కూడా పారదర్శకంగా పూర్తి చేశామని చెప్పారు. ఈ నియామకాలపై వచ్చిన ఆరోపణల నేపథ్యంలో అభ్యర్థుల్లో ఆందోళన నెలకొందని, వారి తరఫున రాష్ట్ర ప్రభుత్వం సుప్రీంకోర్టు వరకు వెళ్లి న్యాయపోరాటం చేసిందని వివరించారు.

ప్రజల సమస్యలను ఓపికగా వినాలి

డీఎస్పీలు తమ సామాజిక నేపథ్యాన్ని, పోలీసు శాఖలో చేరిన లక్ష్యాన్ని ఎప్పటికీ మరిచిపోవద్దని సీఎం సూచించారు. బాధితులు పోలీస్ స్టేషన్‌కు వచ్చినప్పుడు వారిని గౌరవంగా కూర్చోబెట్టి, సమస్యను ఓపికగా విని అర్థం చేసుకోవాలని చెప్పారు. సమస్య పరిష్కారానికి సమయం, వనరులు, సాంకేతిక పరిజ్ఞానం కీలకమని పేర్కొన్నారు.ప్రస్తుతం నేరాల స్వరూపం మారుతోందని, సైబర్ నేరాలు, డ్రగ్స్ సరఫరా పోలీసులకు కొత్త సవాళ్లుగా మారాయని అన్నారు. డ్రగ్స్ నియంత్రణ కోసం ఈగల్ ఫోర్స్‌ను ఏర్పాటు చేసి కఠిన చర్యలు తీసుకుంటున్నామని తెలిపారు. ఫుడ్ సేఫ్టీ, ట్రాఫిక్, డ్రగ్స్ నియంత్రణ, సైబర్ క్రైమ్ విభాగాల్లో ఆధునిక వ్యవస్థలను తీసుకొస్తున్నట్లు వెల్లడించారు.

అవసరమైతే నూతన డీఎస్పీలను విదేశాలకు పంపించి ఆధునిక పోలీసింగ్ విధానాలపై అధ్యయనం చేయిస్తామని చెప్పారు. అధికారులు విధులతో పాటు శారీరక దృఢత్వంపైనా దృష్టి పెట్టాలని సూచించారు. పోలీసు వ్యవస్థపై ప్రజలకు ఉన్న నమ్మకాన్ని కాపాడటం ప్రతి అధికారి బాధ్యతని సీఎం రేవంత్ రెడ్డి స్పష్టం చేశారు.