మూసీ ప్రక్షాళన చేసి తీరుతాం.. సీఎం రేవంత్ రెడ్డి

-చెరువుల పునరుద్ధరణతో హైదరాబాద్‌కు కొత్త రూపు
-తమ్మిడికుంటను 14 నుంచి 30 ఎకరాలకు విస్తరించాం

(హైదరాబాద్,న్యూస్ఇన్‌)

ఆక్రమణలను తొలగించి, మూసీ నదిని ప్రక్షాళన చేసి తీరుతామని ముఖ్యమంత్రి రేవంత్ రెడ్డి స్పష్టం చేశారు. మూసీ పునరుజ్జీవనంలో భాగంగా ఎవరికీ నష్టం జరగకుండా చూసే బాధ్యత ప్రభుత్వానిదేనని భరోసా ఇచ్చారు. తమ్మిడికుంట చెరువు అభివృద్ధి పనుల ప్రారంభోత్సవ కార్యక్రమంలో బుధవారం ఆయన మాట్లాడారు.
కొంతమందికి ఇబ్బందులు ఎదురైనా భవిష్యత్ తరాలకు మంచి వాతావరణం అందించాలనే ఉద్దేశంతో తమ్మిడికుంటను అభివృద్ధి చేశామని సీఎం తెలిపారు. 14 ఎకరాలకు కుంచించుకుపోయిన చెరువును 30 ఎకరాలకు విస్తరించామని చెప్పారు. ఈ పనులకు సహకరించి రెండు ఎకరాల భూమిని ప్రభుత్వానికి అందించిన సినీ నటుడు అక్కినేని నాగార్జునను అభినందించారు. సినిమాల్లోనే కాకుండా నిజ జీవితంలోనూ ఆయన హీరోగా నిలిచారని ప్రశంసించారు.

చెరువుల ఆక్రమణలతో నగరానికి ముప్పు….

హైదరాబాద్‌ను రాక్స్ అండ్ లేక్స్ సిటీగా అభివర్ణించిన సీఎం.. ఒకప్పుడు నగరంలో 1,372 చెరువులు ఉండేవని, వివిధ కారణాలతో వాటిలో సగం మాయమయ్యాయని ఆవేదన వ్యక్తం చేశారు. చెరువుల ఆక్రమణల కారణంగా వర్షాలు కురిసినప్పుడు రహదారులు, కాలనీలు నీటమునుగుతున్నాయని పేర్కొన్నారు. ఈ పరిస్థితిపై ప్రతి ఒక్కరూ ఆలోచించాలని సూచించారు.

మూసీ కాలుష్యంతో నల్లగొండకు ఇబ్బందులు

మూసీ వరదల నుంచి హైదరాబాద్‌ను రక్షించేందుకు నిజాం కాలంలో ఉస్మాన్ సాగర్, హిమాయత్ సాగర్ నిర్మించారని గుర్తుచేశారు. వికారాబాద్ ప్రాంతంలో మొదలయ్యే ముచుకుందా నది, మూసా, ఈసా నదుల సంగమంతో మూసీగా మారుతుందని వివరించారు. ఒకప్పుడు నాగరికతకు నిలయంగా ఉన్న మూసీ నది నేడు కాలుష్యంతో నిండిపోయిందని, దీంతో నల్లగొండ జిల్లా ప్రజలు ఇబ్బందులు పడుతున్నారని అన్నారు.
మూసీ పునరుజ్జీవన తొలి దశ పనులను త్వరలో ప్రారంభిస్తామని ప్రకటించారు. ఇది కేవలం సుందరీకరణ కార్యక్రమం కాదని, నదికి తిరిగి జీవం పోసే ప్రయత్నమని స్పష్టం చేశారు. రాజకీయాలకు అతీతంగా అందరూ ఈ కార్యక్రమానికి సహకరించాలని కోరారు.

తమ్మిడికుంటతో లేక్ ఎకానమీకి ప్రోత్సాహం

తమ్మిడికుంటను నగర ప్రజలకు ఆహ్లాదకరమైన వేదికగా తీర్చిదిద్దడంతో పాటు లేక్ ఎకానమీని అభివృద్ధి చేయాలని సీఎం సూచించారు. చెరువు పరిసరాల్లో భద్రతా ఏర్పాట్లు చేయాలని పోలీసు అధికారులను ఆదేశించారు. చెరువు ఆవరణలో జమ్మి చెట్టు నాటాలని హైడ్రా కమిషనర్ రంగనాథ్‌కు సూచించారు. భవిష్యత్తులో దసరా వేడుకలు, సంప్రదాయ కార్యక్రమాలకు చెరువులు వేదికలుగా మారాలని ఆకాంక్షించారు.
నిన్నటి వరకు శిల్పారామం గురించి మాట్లాడుకున్న నగరవాసులు.. ఇకపై తమ్మిడికుంట గురించి మాట్లాడుకుంటారని, ‘వర్క్ ఫ్రమ్ హోమ్’ తరహాలో ‘వర్క్ ఫ్రమ్ తమ్మిడికుంట’ అనే స్థాయికి ఈ ప్రాంతాన్ని అభివృద్ధి చేయాలని సీఎం ఆకాంక్షించారు.