రేవంత్‌కు తెలంగాణలో కరువు కనిపించడం లేదు: కేటీఆర్

నిర్మల్ రైతు గర్జన సభలో కాంగ్రెస్, బీజేపీ ప్రభుత్వాలపై విమర్శలు

(న్యూస్ఇన్, ఆదిలాబాద్)

తెలంగాణలో రైతులు కరువు కష్టాలతో అల్లాడుతుంటే ముఖ్యమంత్రి రేవంత్ రెడ్డికి కరువు పరిస్థితులు కనిపించడం లేదని బీఆర్ఎస్ వర్కింగ్ ప్రెసిడెంట్ కేటీఆర్ విమర్శించారు. రైతుల సంక్షేమాన్ని పక్కనపెట్టి రాజకీయ ప్రయోజనాలకే ప్రాధాన్యం ఇస్తున్నారని మండిపడ్డారు. నిర్మల్‌లో నిర్వహించిన రైతు గర్జన సభలో ఆయన మాట్లాడుతూ.. కరువు కారణంగా ఉపాధి కోల్పోయిన ప్రతి వ్యవసాయ కూలీకి నెలకు రూ.1,000 చొప్పున 36 నెలలకు రూ.36 వేల ఆర్థిక సాయం అందించాలని డిమాండ్ చేశారు. రైతులకు పెండింగ్‌లో ఉన్న నాలుగు విడతల రైతుబంధు నిధులను వెంటనే విడుదల చేయాలని, కరువు నేపథ్యంలో బ్యాంకు రుణాలను రీషెడ్యూల్ చేయాలని కోరారు. మిగిలిన రైతు రుణమాఫీని కూడా పూర్తి చేయాలని ప్రభుత్వాన్ని డిమాండ్ చేశారు. రైతులకు నీరు, విద్యుత్‌పై భరోసా కల్పించడంలో ప్రభుత్వం విఫలమైందని ఆరోపించారు.

క‌రువును ప‌ట్టించుకోవ‌డం లేదు….

కేంద్ర ప్రభుత్వంపైనా కేటీఆర్ విమర్శలు గుప్పించారు. తెలంగాణలో ఓట్లు, సీట్లు కావాలి కానీ రాష్ట్రానికి నిధులు ఇచ్చే ఆలోచన లేదా అని ప్రశ్నించారు. తెలంగాణలో కరువు పరిస్థితులపై కేంద్రం స్పందించడం లేదని, బీజేపీ నేతలకు చిత్తశుద్ధి ఉంటే ప్రధాని మోదీ ఇంటి ముందు ధర్నా చేయాలని సవాల్ విసిరారు.కాంగ్రెస్ ప్రభుత్వం రైతుబంధు, రైతుబీమా పథకాలను నిర్వీర్యం చేసిందని, సాగునీటి ప్రాజెక్టుల పనులను నిర్లక్ష్యం చేస్తోందని ఆరోపించారు. పాలమూరు ప్రాజెక్టును పట్టించుకోవడం లేదని, కాళేశ్వరం ప్రాజెక్టుపై రాజకీయ కక్షతో వ్యవహరిస్తోందని విమర్శించారు.

బీఆర్ఎస్ ను గెలిపించండి…..

గత బీఆర్ఎస్ ప్రభుత్వ హయాంలో రైతుబంధు, రైతుబీమా, మిషన్ కాకతీయ, నిరంతర విద్యుత్ వంటి పథకాలతో వ్యవసాయ రంగానికి మేలు జరిగిందని కేటీఆర్ పేర్కొన్నారు. కాంగ్రెస్ పాలనలో గ్రామీణ అభివృద్ధి నిలిచిపోయిందని ఆరోపించారు. వచ్చే ఎన్నికల్లో కాంగ్రెస్‌కు బుద్ధి చెప్పి కేసీఆర్ నాయకత్వంలోని బీఆర్ఎస్‌ను మళ్లీ గెలిపించాలని ప్రజలకు పిలుపునిచ్చారు.