మహిళా సాధికారతే రాష్ట్ర అభివృద్ధికి చోదకశక్తి : చంద్ర‌బాబు

(విశాఖ‌ప‌ట్నం, న్యూస్ఇన్‌)

మహిళల రాజకీయ, ఆర్థిక సాధికారతకు తమ ప్రభుత్వం పెద్దపీట వేస్తోందని ఆంధ్రప్రదేశ్ ముఖ్యమంత్రి చంద్రబాబు నాయుడు స్పష్టం చేశారు. మహిళలకు ఉచితంగా భూమి, ప్రోత్సాహకాలు అందిస్తూ ప్రత్యేకంగా టెక్ పార్క్ ఏర్పాటు చేస్తామని ప్రకటించారు. రాజకీయ, ఆర్థిక రంగాల్లో మహిళల భాగస్వామ్యం 50 శాతానికి మించినప్పుడే తనకు నిజమైన సంతృప్తి కలుగుతుందని అన్నారు. విశాఖపట్నంలో జరుగుతున్న సీఐఐ భాగస్వామ్య సదస్సులో భాగంగా నిర్వహించిన ‘ఉమెన్ అండ్ గ్రోత్ సమ్మిట్-2026’లో ఆయన ప్రసంగించారు.

‘ది వుమెన్ హూ విల్ షేప్ ది నెక్స్ట్ ఎకానమీ: లీడర్‌షిప్, క్యాపిటల్, యాంబిషన్’ అనే థీమ్‌తో జరిగిన ఈ సదస్సుకు కేంద్ర మాజీ మంత్రి స్మృతి ఇరానీ, సీఐఐ ప్రతినిధులు, పారిశ్రామికవేత్తలు, మహిళా నాయకులు హాజరయ్యారు. మహిళలకు పెట్టుబడులు, మార్కెట్ అవకాశాలు, సాంకేతిక పరిజ్ఞానం, నైపుణ్యాలు కల్పించడంపై చర్చించారు.

డ్వాక్రా మహిళలది విజయవంతమైన ప్రయాణం

మహిళలకు అవకాశాలు కల్పిస్తే అద్భుతమైన ఫలితాలు సాధిస్తారని చంద్రబాబు అన్నారు. రాష్ట్రంలో 1.13 కోట్ల మంది మహిళలు స్వయం సహాయక సంఘాల్లో సభ్యులుగా ఉన్నారని, రూ.30 వేల కోట్ల కార్పస్ ఫండ్‌తో దాదాపు రూ.లక్ష కోట్ల టర్నోవర్ సాధిస్తున్నారని వెల్లడించారు. డ్వాక్రా మహిళలు తీసుకున్న రుణాల్లో 99.6 శాతం తిరిగి చెల్లిస్తున్నారని చెప్పారు. స్వయం ఏపీ బ్రాండ్ ద్వారా మహిళల ఉత్పత్తులకు మార్కెట్ కల్పిస్తున్నామని వివరించారు.విద్య, ఉద్యోగాల్లో మహిళలకు 33 శాతం రిజర్వేషన్లు కల్పించామని, స్థానిక సంస్థల్లో 50 శాతం ప్రాతినిధ్యం కల్పిస్తున్నామని పేర్కొన్నారు. చట్టసభల్లోనూ మహిళలకు 33 శాతం రిజర్వేషన్లు అమలయ్యేలా అన్ని రాజకీయ పార్టీలు కృషి చేయాలని పిలుపునిచ్చారు.

మహిళా ఉద్యోగులకు భారీ అవకాశాలు

ప్రస్తుతం రాష్ట్రంలో మహిళా శ్రామిక శక్తి 35.8 శాతంగా ఉందని, త్వరలోనే దీనిని 50 శాతానికి పెంచుతామని సీఎం ప్రకటించారు. విశాఖలోని బాండెక్స్ దుస్తుల తయారీ కేంద్రంలో 20 వేల మంది మహిళలు పనిచేస్తున్నారని, గ్లోబల్ టాయ్ పార్క్ ద్వారా మరో 30 వేల ఉద్యోగ అవకాశాలు కల్పించనున్నట్లు తెలిపారు. మహిళల భద్రతకు అత్యధిక ప్రాధాన్యత ఇస్తున్నామని చెప్పారు.

పేదరిక నిర్మూలనలో మహిళల పాత్ర కీలకం

పీ4 విధానం ద్వారా సంపన్నులు పేద కుటుంబాలకు అండగా నిలవాలని చంద్రబాబు కోరారు. సమాజంలోని అత్యల్ప ఆదాయ వర్గాల కుటుంబాల జీవన ప్రమాణాలు పెంచడమే లక్ష్యమన్నారు. కుప్పంలో ఇటుకల తయారీ కేంద్రంలో కార్మికురాలిగా పనిచేసిన ఓ మహిళ, అదే సంస్థకు యజమానిగా ఎదిగి ఏడాదికి రూ.25 లక్షల ఆదాయం పొందుతున్నారని ఉదాహరించారు.

ఏఐ, సెమీకండక్టర్లలోనూ మహిళలు ముందుండాలి

మారుతున్న సాంకేతిక పరిజ్ఞానాన్ని మహిళలు అందిపుచ్చుకోవాలని సీఎం సూచించారు. ఏఐ, డేటా సెంటర్లు, క్వాంటం, డ్రోన్లు, ఎలక్ట్రానిక్స్, సెమీకండక్టర్ల రంగాల్లో విస్తృత అవకాశాలు ఉన్నాయని చెప్పారు. మహిళా పారిశ్రామికవేత్తలను ప్రోత్సహించేందుకు ప్రత్యేక రాయితీలు కల్పిస్తామని, వచ్చే సీఐఐ సదస్సులో 50 శాతం మహిళల భాగస్వామ్యం ఉండేలా చర్యలు తీసుకుంటామని ప్రకటించారు.కేంద్ర మాజీ మంత్రి స్మృతి ఇరానీ మాట్లాడుతూ ప్రధాని మోదీ నాయకత్వంలో మహిళలు దేశాభివృద్ధిలో కీలక పాత్ర పోషిస్తున్నారని, అన్ని రంగాల్లో మహిళల సాధికారతకు మరిన్ని అవకాశాలు కల్పించాలని అన్నారు. సీఐఐ అధ్యక్షురాలు సుచిత్రా ఎల్లా మాట్లాడుతూ హైదరాబాద్‌లో ఐటీ రంగం అభివృద్ధి, ఏపీలో బయోటెక్నాలజీ, లైఫ్ సైన్సెస్ పురోగతికి చంద్రబాబు ప్రోత్సాహం కీలకమని పేర్కొన్నారు.