ఏపీలో పెట్టుబడులకు భరోసా.. అనుమతుల్లో వేగం
- పెట్టుబడిదారుల ప్రయోజనాల కోసం ఇన్వెస్ట్‌మెంట్ ప్రొటెక్షన్ యాక్ట్
- అమరావతిని బ్లూ గ్రీన్ సిటీగా తీర్చిదిద్దుతాం.. తిరుపతిని గ్లోబల్ సెమీకండక్టర్ హబ్‌గా అభివృద్ధి చేస్తాం: సీఎం చంద్రబాబు
(విశాఖపట్నం,న్యూస్ఇన్)
ఆంధ్రప్రదేశ్‌ను దేశంలోనే పెట్టుబడులకు అత్యంత అనుకూలమైన రాష్ట్రంగా తీర్చిదిద్దడమే లక్ష్యంగా తమ ప్రభుత్వం పనిచేస్తోందని ముఖ్యమంత్రి చంద్రబాబు నాయుడు స్పష్టం చేశారు. పారిశ్రామికవేత్తలకు అనుమతులు వేగంగా మంజూరు చేయడంతో పాటు, పెట్టుబడులకు పూర్తి భద్రత కల్పించే విధానాలను అమలు చేస్తున్నామని తెలిపారు. రాజకీయ మార్పులు, వైరుధ్యాల కారణంగా పెట్టుబడిదారులు ఇబ్బందులు పడకూడదనే ఉద్దేశంతో ఇన్వెస్ట్‌మెంట్ ప్రొటెక్షన్ యాక్ట్‌ను తీసుకొస్తున్నట్లు ప్రకటించారు.
విశాఖపట్నంలో ప్రారంభమైన 31వ సీఐఐ పార్టనర్‌షిప్ సమ్మిట్‌లో ముఖ్యమంత్రి చంద్రబాబు ప్రసంగించారు. ఈ కార్యక్రమంలో కేంద్ర మంత్రులు పీయూష్ గోయల్, కింజరాపు రామ్మోహన్ నాయుడు, ఉప ముఖ్యమంత్రి పవన్ కల్యాణ్, మంత్రి నారా లోకేష్‌తో పాటు వివిధ పారిశ్రామిక సంస్థల ఛైర్మన్లు, ప్రతినిధులు పాల్గొన్నారు.
అనుమతుల్లో వేగమే ఏపీ ప్రత్యేకత….
రాష్ట్రంలో స్పీడ్ ఆఫ్ డూయింగ్ బిజినెస్ విధానాన్ని అమలు చేస్తున్నామని చంద్రబాబు తెలిపారు. పరిశ్రమలకు అవసరమైన అనుమతులను రియల్‌టైమ్‌లో మంజూరు చేసే వ్యవస్థను తీసుకొచ్చామని చెప్పారు. దీనికి కియా కార్ల తయారీ యూనిట్ మంచి ఉదాహరణగా పేర్కొన్నారు. ఆమ్కా డిఫెన్స్ ప్రాజెక్టుకు కేవలం 36 రోజుల్లోనే అనుమతులు ఇచ్చి భూమి కేటాయించామని వెల్లడించారు. ఎల్జీ ఎలక్ట్రానిక్స్ సంస్థ కూడా 19 నెలల్లోనే ఉత్పత్తి ప్రారంభించేందుకు సిద్ధమవుతోందని తెలిపారు. వేగవంతమైన అనుమతుల విషయంలో ఇదే తమ ప్రభుత్వ పనితీరుకు నిదర్శనమన్నారు.ప్రధాని నరేంద్ర మోదీ ఇచ్చిన జన్ విశ్వాస్ పిలుపునకు అనుగుణంగా పారిశ్రామిక రంగంలో విశ్వసనీయత, పారదర్శకత పెంచేందుకు చర్యలు తీసుకుంటున్నామని చెప్పారు.
పెట్టుబడులకు చట్టపరమైన రక్షణ….
పారిశ్రామిక ప్రోత్సాహకాలను సకాలంలో అందించేందుకు ఎస్క్రో ఖాతా విధానాన్ని అమలు చేయాలని నిర్ణయించినట్లు ముఖ్యమంత్రి వెల్లడించారు. ఈ విధానం గురువారం నుంచే పనిచేయడం ప్రారంభిస్తుందని తెలిపారు. పెట్టుబడిదారులకు ప్రభుత్వం నుంచి రావాల్సిన ప్రోత్సాహకాలు, రాయితీల విషయంలో స్పష్టత, భరోసా కల్పించడమే దీని ఉద్దేశమన్నారు.ఇన్వెస్ట్‌మెంట్ ప్రొటెక్షన్ యాక్ట్‌ను ఆంధ్రప్రదేశ్ నుంచే ప్రారంభిస్తున్నామని, భవిష్యత్తులో దేశవ్యాప్తంగా ఈ విధానాన్ని అనుసరించే పరిస్థితి వస్తుందని ఆశాభావం వ్యక్తం చేశారు. ప్రభుత్వాలు మారినప్పటికీ పెట్టుబడిదారుల ప్రయోజనాలకు నష్టం కలగకూడదని, రాజకీయ వైరుధ్యాలకు పారిశ్రామికవేత్తలు బలికాకూడదనే లక్ష్యంతో ఈ చట్టాన్ని తీసుకొస్తున్నట్లు వివరించారు.
అమరావతి.. బ్లూ గ్రీన్ సిటీ
రాజధాని అమరావతిని బ్లూ గ్రీన్ సిటీగా అభివృద్ధి చేస్తున్నామని చంద్రబాబు తెలిపారు. అత్యాధునిక సాంకేతిక పరిజ్ఞానంతో ఐకానిక్ భవనాలు, అంతర్జాతీయ ప్రమాణాలతో నగర నిర్మాణాన్ని చేపడుతున్నామని చెప్పారు. పారిశ్రామికవేత్తలు అమరావతిని తమ రెండో నివాసంగా మార్చుకోవాలని ఆయన కోరారు.రాష్ట్రంలో ఇప్పటికే ఆరు పోర్టులు కార్యకలాపాలు నిర్వహిస్తున్నాయని, విమానాశ్రయాలు, హైస్పీడ్ రైలు నెట్‌వర్క్, విస్తృతమైన రహదారి అనుసంధానంతో ఏపీ అత్యుత్తమ లాజిస్టిక్స్ కేంద్రంగా ఎదిగే అవకాశాలున్నాయని పేర్కొన్నారు.
గోదావరి-కావేరీ అనుసంధానంతో వాటర్ గ్రిడ్
రాష్ట్ర అభివృద్ధిలో నీటి లభ్యత కీలకమని పేర్కొన్న చంద్రబాబు.. నదుల అనుసంధానంపై తమ ప్రభుత్వం ప్రత్యేక దృష్టి సారించిందన్నారు. సాగు, తాగునీటితో పాటు పారిశ్రామిక అవసరాలకు కూడా నీరు అందించేలా కార్యాచరణ రూపొందిస్తున్నామని చెప్పారు.గోదావరి కుడి, ఎడమ కాలువల ద్వారా విశాఖపట్నం, అమరావతికి నీటిని అందించడంతో పాటు, పొరుగు రాష్ట్రంలోని కావేరీ నదికి కూడా నీటిని తరలించే అవకాశాలున్నాయని వివరించారు. గోదావరి-కావేరీ నదుల అనుసంధానం ద్వారా ఐదు రాష్ట్రాల నీటి అవసరాలను తీర్చే అవకాశం ఉందన్నారు. దేశంలో విద్యుత్ గ్రిడ్ తరహాలోనే వాటర్ గ్రిడ్ ఏర్పాటు చేస్తే ప్రజలకు ఎంతో ప్రయోజనం కలుగుతుందని అభిప్రాయపడ్డారు.
తిరుపతిని సెమీకండక్టర్ హబ్‌గా తీర్చిదిద్దుతాం
పారిశ్రామిక అభివృద్ధిని రాష్ట్రంలోని వివిధ ప్రాంతాలకు విస్తరించేలా 25 సెక్టోరల్ పార్కులను ఏర్పాటు చేస్తున్నామని ముఖ్యమంత్రి తెలిపారు. తిరుపతిని ప్రపంచస్థాయి సెమీకండక్టర్ చిప్ డిజైన్ కేంద్రంగా అభివృద్ధి చేయాలని లక్ష్యంగా పెట్టుకున్నట్లు చెప్పారు. ఎలక్ట్రానిక్స్, రక్షణ రంగం, సాంకేతిక పరిశ్రమలకు రాష్ట్రంలో విస్తృత అవకాశాలు కల్పిస్తున్నామని పేర్కొన్నారు.
సామాజిక భద్రతకు ప్రాధాన్యం
అభివృద్ధి అంటే కేవలం పరిశ్రమలు, పెట్టుబడులకే పరిమితం కాదని, ప్రజల జీవన ప్రమాణాలు కూడా మెరుగుపడాలని చంద్రబాబు అన్నారు. యాక్సెస్ టు ఈక్వాలిటీ ఇండెక్స్‌లో ఆంధ్రప్రదేశ్ రెండో స్థానంలో ఉందని తెలిపారు. సామాజిక, ఆర్థిక భద్రతకు తమ ప్రభుత్వం ప్రాధాన్యం ఇస్తోందని, పేదల జీవన ప్రమాణాలను పెంచే దిశగా కార్యక్రమాలు అమలు చేస్తున్నామని వివరించారు.పెట్టుబడులు, మౌలిక సదుపాయాలు, పారిశ్రామిక అభివృద్ధి, సామాజిక భద్రతను సమన్వయం చేస్తూ ఆంధ్రప్రదేశ్‌ను దేశంలోనే అగ్రగామి రాష్ట్రంగా నిలబెట్టడమే తమ లక్ష్యమని ముఖ్యమంత్రి స్పష్టం చేశారు.