జూన్ 2 నాటికి టిమ్స్ ఆసుపత్రుల్లో పూర్తి స్థాయి వైద్య సేవలు: సీఎం రేవంత్ రెడ్డి
ఏడాదిలోగా అందుబాటులోకి ఉస్మానియా
వైద్యులు, సిబ్బంది నియామకాలకు వేగం
(హైదరాబాద్, న్యూస్‌ఇన్‌)
తెలంగాణలో ప్రభుత్వ వైద్య సేవలను మరింత విస్తరించడంపై ముఖ్యమంత్రి ఎ.రేవంత్ రెడ్డి దృష్టి సారించారు. వచ్చే ఏడాది జూన్ 2 నాటికి అల్వాల్, ఎల్‌బీ నగర్ టిమ్స్ ఆసుపత్రులతో పాటు వరంగల్ సూపర్ స్పెషాలిటీ ఆసుపత్రి, నిమ్స్ విస్తరణ పనులు పూర్తి చేసి పూర్తి స్థాయి వైద్య సేవలు అందుబాటులోకి తీసుకురావాలని అధికారులను ఆదేశించారు. ఉస్మానియా నూతన ఆసుపత్రి నిర్మాణాన్ని వచ్చే ఏడాది డిసెంబరులోగా పూర్తి చేసి ప్రజలకు అందుబాటులోకి తీసుకురావాలని స్పష్టం చేశారు.ఎంసీఆర్‌హెచ్‌ఆర్డీలో వైద్య, ఆరోగ్య శాఖపై నిర్వహించిన సమీక్షలో సీఎం ఈ ఆదేశాలు జారీ చేశారు. ఆసుపత్రుల నిర్మాణం, వైద్య పరికరాల కొనుగోలు, వైద్యులు, సిబ్బంది నియామకాలను సమాంతరంగా పూర్తి చేయాలని సూచించారు.
మూడు టిమ్స్‌లకు ఏకీకృత నియామక విధానం
సనత్‌నగర్, అల్వాల్, ఎల్‌బీ నగర్ టిమ్స్‌లలో వైద్యులు, ఇతర సిబ్బంది నియామకాలకు ఏకీకృత విధానం అమలు చేయాలని సీఎం ఆదేశించారు. అవసరాలకు అనుగుణంగా మూడు ఆసుపత్రుల మధ్య వైద్యులు, సిబ్బంది బదిలీలు జరిగేలా చూడాలన్నారు. టిమ్స్‌ల పర్యవేక్షణకు గ్రూప్‌-1 అధికారులను, హౌస్‌కీపింగ్ సిబ్బంది పర్యవేక్షణకు విశ్రాంత సైనికాధికారులను నియమిస్తామని తెలిపారు. వైద్యుల నియామకాలు పూర్తయ్యే వరకు తాత్కాలికంగా బయటి నుంచి వైద్యులను తీసుకోవాలని, ఇందుకు అవసరమైన నిధులు విడుదల చేస్తామని చెప్పారు.
నిమ్స్‌తో టిమ్స్ సమన్వయం
నిమ్స్‌లో శస్త్రచికిత్సలకు ఎక్కువ సమయం పడుతున్న నేపథ్యంలో సనత్‌నగర్ టిమ్స్‌ను పూర్తిస్థాయిలో వినియోగించుకోవాలని సీఎం సూచించారు. నిమ్స్‌లో పడకలు అందుబాటులో లేకపోయినా, శస్త్రచికిత్సలు ఆలస్యమైనా టిమ్స్ సేవలను ఉపయోగించుకోవాలన్నారు. ఈ రెండు ఆసుపత్రుల డైరెక్టర్లు, వైద్యారోగ్య శాఖ అధికారులు నిరంతరం సమన్వయం చేసుకోవాలని ఆదేశించారు.
ఆసుపత్రుల్లో ఏఐతో హాజరు పర్యవేక్షణ
ప్రభుత్వ ఆసుపత్రుల్లో వైద్యులు, సిబ్బంది హాజరును బయోమెట్రిక్ విధానంలో నమోదు చేయాలని, విధులకు వచ్చిన, వెళ్లిన సమయాలను ఏఐ సాయంతో పర్యవేక్షించాలని సీఎం ఆదేశించారు. నిర్మాణంలో ఉన్న 79 డయాలసిస్ కేంద్రాలను త్వరగా పూర్తి చేయాలని సూచించారు.మూడేళ్లలో ప్రభుత్వ ఆసుపత్రుల్లో పడకల సంఖ్య 30 వేల నుంచి 38 వేలకు పెరిగిందని అధికారులు వివరించారు. ఇదే సమయంలో ఓపీ రోగుల సంఖ్య 7 లక్షల నుంచి 9 లక్షలకు చేరింది. వైద్యులు, నర్సులు, ఏఎన్‌ఎంలు, పారామెడికల్ సిబ్బంది కలిపి 13,401 నియామకాలు పూర్తయ్యాయని, మరో 5,640 నియామకాలు కొనసాగుతున్నాయని సీఎం తెలిపారు. ప్రజారోగ్యానికి అవసరమైన నిధులను ఎంతైనా విడుదల చేస్తామని స్పష్టం చేశారు.