హైదరాబాద్‌లో పీఆర్టీఎస్‌కు సీఎం గ్రీన్‌సిగ్నల్.. డిసెంబర్‌లోగా టెండర్లు పూర్తి చేయాలి
నగరంలో రెండు ప్రధాన కారిడార్ల ఏర్పాటు
ఏడాదిలో ప్రాజెక్టు పూర్తి చేయాలి సీఎం ఆదేశం
(హైదరాబాద్, న్యూస్‌ఇన్‌)
నగరంలో ట్రాఫిక్ సమస్యలకు పరిష్కారం చూపడంతో పాటు ప్రజా రవాణా వ్యవస్థను మరింత మెరుగుపరిచే దిశగా తెలంగాణ ప్రభుత్వం కీలక అడుగులు వేస్తోంది. ఇందులో భాగంగా పర్సనల్ ర్యాపిడ్ ట్రాన్సిట్ సిస్టమ్ (పీఆర్టీఎస్) ఏర్పాటుపై ముఖ్యమంత్రి రేవంత్ రెడ్డి దృష్టి సారించారు. ఈ ప్రాజెక్టుకు సంబంధించి డిసెంబర్ నాటికి టెండర్ల ప్రక్రియ పూర్తి చేయాలని, ఏడాదిలోగా ప్రతిపాదిత మార్గాన్ని అందుబాటులోకి తీసుకురావాలని అధికారులను ఆదేశించారు.ఎంసీఆర్ హెచ్‌ఆర్డీ బోధి పెవిలియన్‌లో పీఆర్టీఎస్‌పై సీఎం సమీక్ష నిర్వహించారు. ఈ సమావేశానికి సీఎంవో కార్యదర్శి మాణిక్ రాజ్, హైదరాబాద్ మెట్రో ఎండీ సర్ఫరాజ్ అహ్మద్, అదనపు ఎండీ అజిత్ రెడ్డి, సైబరాబాద్ మున్సిపల్ కమిషనర్ సృజన, జీహెచ్‌ఎంసీ కమిషనర్ కర్ణన్, ఫ్యూచర్ సిటీ డెవలప్‌మెంట్ అథారిటీ కమిషనర్ శశాంక తదితరులు హాజరయ్యారు.
నగరంలో రెండు ప్రధాన కారిడార్లు
ఎల్బీ స్టేడియం నుంచి అంబేద్కర్ విగ్రహం, ఇందిరా పార్క్, లోయర్ ట్యాంక్ బండ్ మీదుగా రాణిగంజ్ బస్ స్టాండ్ వరకు ఒక పీఆర్టీఎస్ లైన్ ఏర్పాటు చేయాలని సీఎం సూచించారు. మరో మార్గాన్ని అసెంబ్లీ మెట్రో స్టేషన్ నుంచి రవీంద్రభారతి, సచివాలయం మీదుగా ఐమాక్స్ నుంచి బేగంపేట వరకు అనుసంధానించేలా రూపొందించాలని ఆదేశించారు.
ఐటీ కారిడార్‌కు ప్రత్యేక ప్రాధాన్యం
కేపీహెచ్‌బీ మెట్రో స్టేషన్ నుంచి దుర్గం చెరువు, రహేజా మైండ్‌స్పేస్, బయోడైవర్సిటీ మెట్రో స్టేషన్ వరకు పీఆర్టీఎస్ మార్గాన్ని వెంటనే చేపట్టాలని సీఎం స్పష్టం చేశారు. ఐటీ కారిడార్‌లో ప్రయాణికులకు మెరుగైన రవాణా సదుపాయం కల్పించడమే లక్ష్యంగా ఈ మార్గాన్ని ప్రతిపాదించారు.
నెక్లెస్ రోడ్, గచ్చిబౌలిలో డిపోలు
నెక్లెస్ రోడ్‌లో మల్టీలెవల్ పార్కింగ్ నిర్మించి, అందులోనే పీఆర్టీఎస్ డిపో ఏర్పాటు చేయాలని సూచించారు. అలాగే గచ్చిబౌలిలోని ఐకియా సమీపంలోనూ మల్టీలెవల్ పార్కింగ్‌తో పాటు మరో డిపో ఏర్పాటు చేయాలని అధికారులకు దిశానిర్దేశం చేశారు. ప్రాజెక్టు పనుల్లో జాప్యం లేకుండా నిర్ణీత గడువులో పూర్తి చేసేందుకు కార్యాచరణ సిద్ధం చేయాలని సీఎం ఆదేశించారు.