ఏపీ అభివృద్ధిపై టైమ్ ప్రత్యేక ప్రశంసలు.. ఆరు నెలల్లో గూగుల్ ప్రాజెక్టుకు శంకుస్థాపన

(విశాఖపట్నం,న్యూస్ఇన్‌)

ఆంధ్రప్రదేశ్‌లో జరుగుతున్న అభివృద్ధి, పెట్టుబడుల ఆకర్షణ, ప్రాజెక్టుల వేగవంతమైన అమలుపై అంతర్జాతీయ మీడియా సంస్థ ‘టైమ్’ ప్రత్యేక ప్రశంసలు కురిపించింది. రాష్ట్ర ప్రగతి నమూనాను ప్రపంచానికి పరిచయం చేస్తామని ‘టైమ్’ ఇంటర్నేషనల్ మేనేజింగ్ డైరెక్టర్ డామియన్ డగ్లస్ వెల్లడించారు.సీఐఐ పార్టనర్‌షిప్ సమ్మిట్ సందర్భంగా గురువారం రాత్రి విశాఖపట్నంలోని ది పార్క్ హోటల్‌లో నిర్వహించిన ‘టైమ్ ఇంపాక్ట్ డిన్నర్’లో ముఖ్యమంత్రి చంద్రబాబు నాయుడు పాల్గొన్నారు. డామియన్ డగ్లస్‌తో జరిగిన ప్రత్యేక ముఖాముఖిలో రాష్ట్ర అభివృద్ధి, పెట్టుబడులు, పారిశ్రామిక ప్రగతిపై తన అభిప్రాయాలను పంచుకున్నారు. ఈ కార్యక్రమానికి సుమారు 100 మంది పారిశ్రామికవేత్తలు, వ్యాపార, ప్రభుత్వ రంగ ప్రతినిధులు హాజరయ్యారు.

ఈజ్ ఆఫ్ డూయింగ్ నుంచి స్పీడ్ ఆఫ్ డూయింగ్ బిజినెస్….

ఆంధ్రప్రదేశ్‌లో పెట్టుబడులకు అనుకూల వాతావరణం కల్పించడంతోపాటు, పరిశ్రమల స్థాపన, ప్రాజెక్టుల అమలుకు ప్రభుత్వం అత్యంత ప్రాధాన్యత ఇస్తోందని చంద్రబాబు తెలిపారు. ‘ఈజ్ ఆఫ్ డూయింగ్ బిజినెస్’ నుంచి ‘స్పీడ్ ఆఫ్ డూయింగ్ బిజినెస్’ దిశగా రాష్ట్రం ముందుకు సాగుతోందన్నారు.గూగుల్ సంస్థ 2025 అక్టోబర్‌లో ఏపీలో ఏఐ హబ్ ఏర్పాటును ప్రకటించగా, కేవలం ఆరు నెలల్లోనే 2026 ఏప్రిల్‌లో శంకుస్థాపన జరిగిందని వివరించారు. ప్రభుత్వ నిర్ణయాల్లో వేగం, పెట్టుబడుల కార్యరూపంలో చిత్తశుద్ధికి ఇదే నిదర్శనమని పేర్కొన్నారు.

ఏపీ విజయగాథను ప్రపంచానికి పరిచయం చేస్తాం……

రాష్ట్రంలో జరుగుతున్న అభివృద్ధి, మౌలిక సదుపాయాల కల్పన, పెట్టుబడుల పురోగతిని అంతర్జాతీయ స్థాయిలో ప్రచారం చేయాలని చంద్రబాబు ‘టైమ్’ ప్రతినిధులను కోరారు. వచ్చే ఏడాది మరోసారి ఏపీకి వచ్చి అభివృద్ధిని స్వయంగా పరిశీలించాలని ఆహ్వానించారు.

డామియన్ డగ్లస్ మాట్లాడుతూ చంద్రబాబు నాయకత్వం, రాష్ట్రంలో చోటుచేసుకుంటున్న అసాధారణ అభివృద్ధి తనను ఆకట్టుకున్నాయని తెలిపారు. ఏపీ విజయాలు అద్భుత నాయకత్వం, దార్శనికతకు నిదర్శనమని పేర్కొన్నారు. రాష్ట్ర అభివృద్ధి నమూనాను ప్రపంచానికి చాటుతామని స్పష్టం చేశారు.

వృద్ధి అవకాశాలపై ప్యానెల్ చర్చ…

అనంతరం ‘బిల్డ్ ద నెక్స్ట్ చాప్టర్ ఆఫ్ గ్రోత్’ అంశంపై ప్యానెల్ చర్చ జరిగింది. వరాహ క్లైమేట్‌ఏజీకి చెందిన మధుర్ జైన్, పబ్లిసిస్ గ్రూప్ సీఈఓ అనుప్రియ ఆచార్య, ఇసుజు మోటార్స్ ఇండియా ఎండీ రాజేష్ మిట్టల్, ఆసియా అభివృద్ధి బ్యాంకు ప్రతినిధి మియో ఓకా పాల్గొన్నారు. భవిష్యత్ పెట్టుబడులు, ప్రపంచ వృద్ధికి భాగస్వామ్యాలు, సుస్థిర అభివృద్ధి అవకాశాలపై చర్చించారు.