ప్రధాని మోదీతో సీఎం రేవంత్ రెడ్డి భేటీ..!
-తెలంగాణకు రూ.30 వేల కోట్ల సాయం కోరిన ముఖ్యమంత్రి
(న్యూఢిల్లీ,న్యూస్ఇన్)
తెలంగాణ ముఖ్యమంత్రి రేవంత్ రెడ్డి ఢిల్లీ పర్యటనలో భాగంగా ఆదివారం ప్రధానమంత్రి నరేంద్ర మోదీతో సమావేశమయ్యారు. రాష్ట్రానికి సంబంధించిన కీలక సమస్యలు, కేంద్రం నుంచి అందాల్సిన ఆర్థిక సహాయం, సాగునీటి ప్రాజెక్టులపై ప్రధానితో చర్చించారు. ముఖ్యంగా ఎల్నినో ప్రభావంతో రాష్ట్రంలో నెలకొన్న వర్షాభావ పరిస్థితులు, వ్యవసాయ రంగంపై పడుతున్న ప్రభావాన్ని ప్రధాని దృష్టికి తీసుకెళ్లారు.

మంత్రులు ఎన్. ఉత్తమ్కుమార్రెడ్డి, వాకిటి శ్రీహరితో కలిసి ప్రధానిని కలిసిన ముఖ్యమంత్రి.. కరువు పరిస్థితులను ఎదుర్కొనేందుకు తెలంగాణకు రూ.30 వేల కోట్ల ఆర్థిక సాయం అందించాలని కోరినట్లు సమాచారం. ఇప్పటికే రాష్ట్రంలోని 31 జిల్లాల్లో 365 మండలాలను కరువు ప్రభావిత ప్రాంతాలుగా ప్రభుత్వం ప్రకటించింది. రైతులకు ఉపశమనం కల్పించేందుకు కేంద్రం తక్షణమే సహకరించాలని సీఎం విజ్ఞప్తి చేశారు.
సాగునీటి ప్రాజెక్టులకు సంబంధించి తుమ్మిడిహెట్టి బ్యారేజీ నిర్మాణానికి మహారాష్ట్ర అనుమతులు, సమ్మక్కసాగర్ ప్రాజెక్టుకు ఛత్తీస్గఢ్ నుంచి అవసరమైన సమ్మతి పొందే విషయంలో కేంద్రం చొరవ తీసుకోవాలని కోరినట్లు తెలుస్తోంది. గోదావరి-కావేరీ నదుల అనుసంధానం, సీతమ్మసాగర్ బ్యారేజీకి పర్యావరణ అనుమతులు వంటి అంశాలను కూడా చర్చకు తీసుకొచ్చారు.
డిసెంబరు 7 నుంచి 9 వరకు హైదరాబాద్లో నిర్వహించనున్న తెలంగాణ గ్లోబల్ ఇన్వెస్టర్స్ సమ్మిట్కు, డిసెంబరు 11 నుంచి 22 వరకు జరగనున్న ఖేలో ఇండియా యూత్ గేమ్స్కు హాజరుకావాలని ప్రధాని మోదీని రేవంత్ రెడ్డి ఆహ్వానించారు.
