గ్రామంలో టెన్నిస్ బాల్తో మొదలైన ప్రయాణం.. భారత్ అండర్-19 జట్టు హీరోగా మోహిత్ ఉల్వా
-స్వస్థలం గుజరాత్లోని సురేంద్రనగర్
-జామ్నగర్లో క్రికెట్ శిక్షణ
-రవీంద్ర జడేజాకు కోచింగ్ ఇచ్చిన మహేంద్రసిన్హ్ చౌహాన్ దగ్గర మెళకువలు
-పాక్తో ఫైనల్లో చివరి బంతికి విజయాన్ని అందించిన యువ క్రికెటర్
(స్పోర్ట్స్ బ్యూరో, న్యూస్ఇన్)
గ్రామంలో స్నేహితులు, బంధువులతో కలిసి టెన్నిస్ బాల్తో క్రికెట్ ఆడిన ఓ కుర్రాడు.. ఇప్పుడు దేశం మొత్తం తన గురించి మాట్లాడుకునే స్థాయికి ఎదిగాడు. పాకిస్థాన్తో అండర్-19 ఆసియా కప్ ఫైనల్లో చివరి బంతికి ఫోర్ కొట్టి భారత్కు 2026 ఆసియాకప్ అందించిన మోహిత్ ఉల్వా ప్రయాణం వెనుక పట్టుదల, క్రమశిక్షణ, కుటుంబ ప్రోత్సాహం ఉన్నాయి. 18 ఏళ్ల వయసులోనే కీలక మ్యాచ్లో ఒత్తిడిని తట్టుకుని ఆడిన మోహిత్ యువ క్రికెటర్లలో ప్రత్యేక గుర్తింపు పొందారు.
గుజరాత్లోని సురేంద్రనగర్ నుంచి..

మోహిత్ ఉల్వా గుజరాత్లోని సురేంద్రనగర్ జిల్లా గ్రామీణ ప్రాంతానికి చెందిన క్రికెటర్. తండ్రి రైల్వే ప్రొటెక్షన్ ఫోర్స్ (ఆర్పీఎఫ్)లో పనిచేస్తున్నారు. చిన్నతనంలోనే మోహిత్లో క్రికెట్పై ఆసక్తిని గమనించిన తండ్రి, అతడిని క్రికెట్ అకాడమీలో చేర్పించారు. తండ్రికి కూడా క్రికెట్పై ఆసక్తి ఉండటంతో కొడుకులోని ప్రతిభను గుర్తించి శిక్షణ వైపు ప్రోత్సహించారు. చదువు నుంచి తప్పించుకోవాలనే ఉద్దేశంతో మొదట అకాడమీకి వెళ్లేందుకు అంగీకరించానని మోహిత్ ఓ ఇంటర్వ్యూలో సరదాగా చెప్పాడు.

జామ్నగర్లో కఠిన శిక్షణ
మోహిత్ క్రికెట్ ప్రయాణంలో జామ్నగర్లోని క్రికెట్ బంగ్లా కీలక పాత్ర పోషించింది. అక్కడ మహేంద్రసిన్హ్ చౌహాన్ దగ్గర శిక్షణ తీసుకున్నాడు. భారత క్రికెట్ జట్టు ఆల్రౌండర్ రవీంద్ర జడేజాకు కూడా ఈ కోచ్ శిక్షణ ఇచ్చారు. చౌహాన్ ఆటతో పాటు ఫిట్నెస్కు ఎక్కువ ప్రాధాన్యం ఇచ్చేవారు. శిక్షణలో భాగంగా 24 నుంచి 25 రౌండ్ల పరుగు, స్ప్రింట్లు, ఇతర వ్యాయామాలు చేయించేవారు.మోహిత్ ఆఫ్ స్పిన్ బౌలింగ్ చేసేవాడు. అతడి శరీరాకృతి, పరుగెత్తే సామర్థ్యాన్ని గమనించిన కోచ్ పేస్ బౌలింగ్ ప్రయత్నించమని సూచించారు. అలా కుడిచేతి మీడియం పేసర్గా ఎదిగాడు. బ్యాటింగ్లోనూ మెరుగుపడేందుకు తండ్రి బౌలింగ్ మెషీన్, త్రోడౌన్స్తో సాధన చేయించేవారు.
సౌరాష్ట్ర జట్టు నుంచి భారత జట్టుకు
తండ్రికి రాజ్కోట్కు బదిలీ కావడంతో మోహిత్ కుటుంబం అక్కడికి మారింది. దీంతో సౌరాష్ట్ర క్రికెట్ పోటీల్లో ఆడే అవకాశం వచ్చింది. అండర్-16, అండర్-19 స్థాయిల్లో ఆడుతూ తన ప్రతిభను నిరూపించుకున్నాడు. సౌరాష్ట్ర ప్రీమియర్ లీగ్లోనూ ఆడాడు. ఆ సమయంలో సీనియర్ బౌలర్ జయదేవ్ ఉనద్కత్ నుంచి కూడా కొన్ని బౌలింగ్ మెళకువలు నేర్చుకున్నాడు.2026 జూన్లో శ్రీలంక పర్యటనకు వెళ్లిన భారత అండర్-19 వన్డే జట్టులో మోహిత్కు చోటు దక్కింది. ఆ తర్వాత ఆస్ట్రేలియా అండర్-19 జట్టుతో జరిగిన సిరీస్లోనూ తన సత్తా చాటాడు. రాజ్కోట్లో జరిగిన తొలి యూత్ టెస్టులో తొలి ఇన్నింగ్స్లో మూడు వికెట్లు తీసి, బ్యాటింగ్లో 84 బంతుల్లో 92 పరుగులు చేశాడు. బౌలర్గా మాత్రమే కాకుండా అవసరమైనప్పుడు బ్యాట్తోనూ రాణించగలనని ఈ ప్రదర్శనతో చాటి చెప్పారు.

ఆసియా కప్ ఫైనల్తో దేశవ్యాప్తంగా గుర్తింపు
ఒమన్లో జరిగిన అండర్-19 ఆసియా కప్లో మోహిత్ బౌలింగ్, బ్యాటింగ్ లో కీలకంగా మారాడు. యూఏఈతో మ్యాచ్లో భారత ఇన్నింగ్స్ చివరి బంతికి సిక్స్ కొట్టాడు. పాకిస్థాన్తో గ్రూప్ మ్యాచ్లో రెండు వికెట్లు తీశాడు. అయితే ఫైనల్లో అతడి ప్రదర్శన దేశంతో పాటు క్రికెట్ అభిమానుల దృష్టిని ఆకర్షించింది.
పాకిస్థాన్ నిర్దేశించిన 338 పరుగుల లక్ష్యంతో ఆడిన భారత్ 252 పరుగులకే ఎనిమిది వికెట్లు కోల్పోయి కష్టాల్లో ఉన్న సమయంలో క్రీజులోకి వచ్చిన మోహిత్.. మనల్ చౌహాన్తో కలిసి తొమ్మిదో వికెట్కు 57 పరుగులు జోడించాడు. మనల్ 47 పరుగులు చేసి ఔటైన తర్వాత సీ. వెంకట్ తో కలిసి ఇన్నింగ్స్ను ముందుకు నడిపించాడు. 26 బంతుల్లో అజేయంగా 49 పరుగులు చేసి, చివరి బంతికి ఫోర్ కొట్టి భారత్కు ఒక్క వికెట్ తేడాతో విజయాన్ని అందించాడు.
ఈ ప్రదర్శనకు ప్లేయర్ ఆఫ్ ద మ్యాచ్ అవార్డు దక్కింది.
ఈ విజయం తరువాత కొద్ది గంటల్లోనే మోహిత్కు మరో అవకాశం వచ్చింది. సౌరాష్ట్ర జట్టు అతడి పేరును 2026-27 సయ్యద్ ముస్తాక్ అలీ ట్రోఫీ జట్టులో చేర్చింది. యువ క్రికెటర్గా మొదలైన అతడి ప్రయాణం ఇప్పుడు సీనియర్ దేశవాళీ క్రికెట్ వైపు అడుగులు వేస్తోంది. ఆసియా కప్ ఫైనల్ అతడికి గుర్తింపు తెచ్చిపెట్టినా, భారత క్రికెట్లో మరింత ముందుకు వెళ్లాలంటే ఇదే స్థాయి ప్రదర్శనను నిలకడగా కొనసాగించాలి.
