ఒప్పందాల నుంచి అభివృద్ధి లక్ష్యాల వైపు అడుగులు వేయాలి: ఉపరాష్ట్రపతి
(విశాఖపట్నం,న్యూస్ఇన్‌)
పెట్టుబడుల ఒప్పందాలు చేసుకోవడంతోనే ఆగిపోకుండా, వాటిని కార్యరూపంలోకి తీసుకొచ్చి అభివృద్ధి లక్ష్యాల దిశగా ముందుకు సాగాలని ఉపరాష్ట్రపతి సీపీ రాధాకృష్ణన్ పిలుపునిచ్చారు. విశాఖపట్నంలో జరిగిన 31వ సీఐఐ భాగస్వామ్య సదస్సులో ఆయన ప్రసంగించారు. రెండు రోజుల పాటు జరిగిన ఈ సదస్సులో పెట్టుబడులకు సంబంధించిన ఒప్పందాలతో పాటు వివిధ రంగాల అభివృద్ధిపై విస్తృతంగా చర్చలు జరిగాయని పేర్కొన్నారు.
ఏపీ అభివృద్ధి ప్రయాణం అభినందనీయం
రాష్ట్ర విభజన తర్వాత ఎదురైన ఇబ్బందులను అధిగమిస్తూ ఆంధ్రప్రదేశ్ అభివృద్ధి పథంలో దూసుకుపోతోందని ఉపరాష్ట్రపతి అన్నారు. శ్రీకాకుళం నుంచి అనంతపురం వరకు వివిధ ప్రాంతాల్లో అభివృద్ధి కార్యక్రమాలు సాగుతున్నాయని తెలిపారు. 2024 జూన్ నుంచి ఇప్పటివరకు రూ.22 లక్షల కోట్ల పెట్టుబడులను రాష్ట్రం ఆకర్షించడం అసాధారణ విజయమని అభివర్ణించారు. వచ్చే ఏడాది జరిగే సదస్సుకు కూడా పారిశ్రామికవేత్తలను ముఖ్యమంత్రి చంద్రబాబు ఇప్పుడే ఆహ్వానించడం ఆయన ఆత్మవిశ్వాసానికి నిదర్శనమన్నారు.పోర్టులు, విమానాశ్రయాలు, ఎలక్ట్రానిక్స్, అంతరిక్షం, రక్షణ, పర్యాటకం వంటి రంగాల్లో ఏపీ పెట్టుబడులను ఆకర్షిస్తోందని చెప్పారు. వికసిత్ భారత్ లక్ష్యంలో భాగంగా స్వర్ణాంధ్ర సాధన దిశగా రాష్ట్రం ముందుకు సాగుతోందన్నారు.
టెక్నాలజీతోనే భవిష్యత్ వృద్ధి
సమీప భవిష్యత్తులో సాంకేతిక రంగం దేశ ఆర్థిక వృద్ధికి కీలక చోదకశక్తిగా మారుతుందని రాధాకృష్ణన్ పేర్కొన్నారు. కృత్రిమ మేధ (ఏఐ) వంటి ఆధునిక సాంకేతికతను పాలన, పౌర సేవలకు వినియోగించడం అభినందనీయమన్నారు. డిజిటల్ పబ్లిక్ ఇన్‌ఫ్రాస్ట్రక్చర్ అభివృద్ధిపై దృష్టి పెట్టాలని సూచించారు.
దేశీయ తయారీ రంగం, పరిశ్రమలు అంతర్జాతీయ పోటీని తట్టుకునేలా ఎదగాలని, ఎంఎస్ఎంఈలకు ప్రోత్సాహం అందించాలని అన్నారు. మానవ వనరుల నైపుణ్యాలను పెంపొందించి భారతీయ మేధోసంపత్తిని ప్రపంచానికి చాటాలని పిలుపునిచ్చారు.
కోవిడ్ సమయంలో భారత్ అభివృద్ధి చేసిన వ్యాక్సిన్‌ను 100 దేశాలకు అందించి తన సామర్థ్యాన్ని నిరూపించుకుందని గుర్తుచేశారు. ప్రభుత్వం, పరిశ్రమలు, విద్యారంగం, ఆవిష్కర్తలు సమన్వయంతో పనిచేస్తే దేశ రూపాంతరం సాధ్యమవుతుందని చెప్పారు. సదస్సులో పాల్గొన్న విదేశీ ప్రతినిధులు, పారిశ్రామికవేత్తలకు అభినందనలు తెలిపిన ఆయన.. ‘కలిసి పనిచేద్దాం, కలిసి ఎదుగుదాం, సమృద్ధిని పంచుకుందాం’ అనే స్ఫూర్తితో ముందుకు సాగాలని పిలుపునిచ్చారు.