హైకోర్టు అనర్హత తీర్పుపై .... సుప్రీం కోర్టు కు దానం నాగేంద‌ర్

(న్యూస్ఇన్‌,హైద‌రాబాద్)

హై కోర్టు తీర్పును స‌వాల్ చేస్తూ ఖైర‌తాబాద్ ఎమ్మెల్యే దానం నాగేంద‌ర్ సుప్రీం కోర్టు త‌లుపు త‌ట్టారు. హై కోర్టు తీర్పును నిలిపి వేయాల‌ని పీటిష‌న్ దాఖ‌లు చేశారు. నిన్నటి వ‌ర‌కు సుప్రీం కోర్టుకు వెళ్లేది లేద‌ని స్ప‌ష్టం చేసిన దానం నాగేంద‌ర్ అన‌ర్హ‌త‌ను త‌ప్పించుకునే ప్ర‌య‌త్నాలు మొద‌లు పెట్టారు. మీడియాతో ప‌లు ద‌ఫాలుగా మాట్లాడిన సీనియ‌ర్ నేత హై కోర్టు తీర్పుతో డిఫెన్స్ లో ప‌డ్డారు. స్పీక‌ర్ తీర్పు త‌రువాత కోర్టులో కూడా త‌న‌కు అనుకూలంగా తీర్పు వ‌స్తుంద‌ని భావించిన నాగేంద‌ర్ కు చుక్కెదురైంది.

హై కోర్టు తీర్పు అనంత‌రం సీఎం రేవంత్ రెడ్డిని క‌లిసిన దానం హై కోర్టుపై సుప్రీం కోర్టుకు వెళ్లే ఆలోచ‌న లేద‌ని ప్ర‌క‌టించారు. కాని పార్టీ హై క‌మాండ్ సూచ‌న‌ల‌తో సుప్రీం త‌లుపు త‌ట్టిన‌ట్లు తెలుస్తోంది. 2023 ఎన్నిక‌ల్లో ఖైర‌తాబాద్ అసెంబ్లీ స్థానం నుంచి బీఆర్ ఎస్ అభ్య‌ర్థిగా పోటీ చేసి విజ‌యం ద‌క్కించుకున్నారు. కాంగ్రెస్ అధికారంలోకి రావ‌డంతో…ఆ వెంట‌నే పార్టీ ఫిరాయించారు. పార్ల‌మెంట్ ఎన్నిక‌ల్లో కాంగ్రెస్ పార్టీ అభ్య‌ర్థిగా దానం సికింద్రాబాద్ నియోజ‌క‌వ‌ర్గం నుంచి ఎంపీగా పోటీ చేసినా…విజ‌యం ద‌క్కించుకోలేక‌పోయారు. పార్టీ ఫిరాయించిన నాటి నుంచి అన్ని వేదిక‌ల‌పై బీఆర్ ఎస్ దానం నాగేంద‌ర్ పై అన‌ర్హ‌త వేటు వేయాల‌ని ఫిర్యాదు చేసింది. దాదాపు మూడున్న‌రేళ్ల‌కు బీఆర్ ఎస్ కు జోష్ నింపే విధంగా హై కోర్టు తీర్పు చెప్పింది.

ఉప ఎన్నిక‌ల‌ను ఎదుర్కొనేందుకు సిద్ధంగా ఉన్నాన‌ని ప్ర‌క‌టించిన దానం నాగేంద‌ర్…సాయంత్రానికి సుప్రీం కోర్టుకు వెళ్లారు. ఈ ప‌రిణామాల‌ను ప‌రిశీలిస్తే…కాంగ్రెస్ పార్టీ ఈ ప‌రిస్థితుల్లో రిస్క్ తీసుకునేందుకు వెనుక‌డుగు వేసింద‌న్న సంకేతాలు ఇచ్చిన‌ట్ల‌యింది. గ్రేట‌ర్ ఎన్నిక‌లు జ‌రుగ‌నున్న నేప‌థ్యంలో ఖైర‌తాబాద్ అసెంబ్లీ ఎన్నిక‌ల‌ను ఎదుర్కోవ‌డం రాజ‌కీయంగా క‌లిసి వ‌స్తుందా లేదా అన్న‌దానిపైనే పార్టీలో చ‌ర్చించిన‌ట్లు తెలుస్తోంది. దానం నాగేంద‌ర్ గ‌తంలో కూడా రాజీనామా చేసి ఓ సారి చేయి కాల్చుకున్నారు. టిడీపీ ఎమ్మెల్యేగా పోటీ విజ‌యం సాధించిన దానం….కాంగ్రెస్ పార్టీ అధికారంలోకి రావ‌డంతో ఆ వెంట‌నే ఎమ్మెల్యే ప‌ద‌వికి రాజీనామా చేసి కాంగ్రెస్ పార్టీలో చేరారు.

ఆ త‌రువాత ఎదుర్కొన్న ఉప ఎన్నిక‌ల్లో దానం ఓట‌మి పాల‌య్యారు. అదే సీన్ ఇప్పుడు రిపీట్ అయితే గ్రేట‌ర్ ఎన్నిక‌ల‌తో పాటు సాధార‌ణ ఎన్నిక‌ల‌కు ముందు పార్టీకి బిగ్ షాక్ త‌గిలిన‌ట్ల‌వుతుంద‌న్న అనుమానాలు పార్టీ నేత‌లో వ్య‌క్తం అవుతున్నాయి. ఈ కార‌ణంగానే సుప్రీం కోర్టుకు వెళ్ల‌డం మంచిద‌న్న పార్టీ నేత‌ల సూచ‌న‌ల‌తో తన నిర్ణ‌యాన్ని మార్చుకున్న‌ట్లు తెలుస్తోంది. మొత్తం మీద దానం మాట మార్చ‌డం… కాంగ్రెస్ ను డిఫెన్స్ లో వేసింద‌న్న చ‌ర్చ బ‌ల‌ప‌డుతుంది.