పిల్లలు టపాసులు కాల్చేటప్పుడు పెద్దలు పర్యవేక్షించాలి

రాష్ట్రవ్యాప్తంగా భద్రతా ఏర్పాట్లపై అగ్నిమాపక శాఖ సమీక్ష

అగ్నిప్రమాదాల నివారణకు ప్రజలు సహకరించాలి: డీజీ విక్రమ్ సింగ్ మన్

(న్యూస్ఇన్‌,హైద‌రాబాద్‌)

దీపావ‌ళి సంద‌ర్బంగా పిల్ల‌లు ట‌పాసులు కాలుస్తున్ప‌ప్పుడు పెద్ద‌లు ప‌ర్య‌వేక్షించాల‌ని అగ్నిమాప‌క శాఖ కోరుతోంది. దీపావళి పండుగను ప్రజలందరూ సురక్షితంగా జరుపుకోవాలని తెలంగాణ అగ్నిమాపక శాఖ డైరెక్టర్ జనరల్ విక్రమ్ సింగ్ మాన్ సూచించారు. పండుగ నేపథ్యంలో రాష్ట్రవ్యాప్తంగా చేపట్టిన అగ్నిమాపక భద్రతా ఏర్పాట్లను ఆయన సమీక్షించి, అధికారులు అప్రమత్తంగా ఉండాలని ఆదేశించారు.

పాఠ‌శాల‌లో అవగాహ‌న‌….

దీపావళి సందర్భంగా అగ్నిప్రమాదాలు, ప్రమాదవశాత్తు జరిగే గాయాలను నివారించేందుకు రాష్ట్రంలోని పాఠశాలల్లో ప్రత్యేక అవగాహన కార్యక్రమాలు నిర్వహించారు. బాణసంచాను సురక్షితంగా వినియోగించడం, టపాసులు కాల్చే సమయంలో తీసుకోవాల్సిన జాగ్రత్తలపై విద్యార్థులకు అవగాహన కల్పించారు. పెద్ద సంఖ్యలో చిన్నారులకు భద్రతా సూచనలు అందించారు.రాష్ట్రవ్యాప్తంగా బాణసంచా విక్రయాలకు సంబంధించి అగ్నిమాపక శాఖ 7,601 లైసెన్సులు జారీ చేసింది. నిర్దేశించిన భద్రతా నిబంధనలు అమలయ్యేలా, పండుగ సమయంలో అగ్నిప్రమాదాల ముప్పును తగ్గించేందుకు అవసరమైన చర్యలు చేపట్టింది.

బ‌హిరంగంగానే బాణా సంచా కాల్చాలి….

బాణసంచాను అధీకృత విక్రయదారుల వద్ద మాత్రమే కొనుగోలు చేయాలని, బహిరంగ ప్రదేశాల్లోనే కాల్చాలని డీజీ సూచించారు. టపాసులు కాల్చేటప్పుడు తగినంత సురక్షిత దూరం పాటించాలని, పిల్లలు బాణసంచా కాల్చే సమయంలో పెద్దలు తప్పనిసరిగా పర్యవేక్షించాలని కోరారు. సమీపంలో నీరు లేదా ఇతర అగ్నిమాపక ఏర్పాట్లు అందుబాటులో ఉంచుకోవాలని తెలిపారు.అసురక్షిత పద్ధతులకు దూరంగా ఉంటూ అగ్నిప్రమాదాల నివారణలో అగ్నిమాపక శాఖకు ప్రజలు సహకరించాలని విక్రమ్ సింగ్ మన్ విజ్ఞప్తి చేశారు. ప్రాణ, ఆస్తి నష్టాలను నివారించేందుకు ప్రతి ఒక్కరూ బాధ్యతాయుతంగా వ్యవహరించాలని సూచించారు. రాష్ట్ర ప్రజలకు సురక్షితమైన, సంతోషకరమైన దీపావళి శుభాకాంక్షలు తెలిపారు.