ఛత్ పూజకు దక్షిణ మధ్య రైల్వే ప్రత్యేక ఏర్పాట్లు.. 400 ప్రత్యేక రైళ్లు

పండుగ రద్దీని తట్టుకునేందుకు చర్యలు
ప్రధాన స్టేషన్లలో రోజుకు 4.6 లక్షల మంది ప్రయాణికుల రాకపోకల అంచనా

(హైదరాబాద్, న్యూస్ ఇన్)

ఛత్ పూజ పండుగ నేపథ్యంలో పెరగనున్న ప్రయాణికుల రద్దీని దృష్టిలో ఉంచుకుని దక్షిణ మధ్య రైల్వే ప్రత్యేక ఏర్పాట్లు చేపట్టింది. ప్రయాణికులకు సురక్షితమైన, సౌకర్యవంతమైన ప్రయాణాన్ని అందించడంతోపాటు రద్దీని నియంత్రించేందుకు నవంబర్ నెలలో దాదాపు 400 ప్రత్యేక రైళ్లను నడుపుతోంది. ప్రధాన రైల్వే స్టేషన్లలో రోజువారీ ప్రయాణికుల రాకపోకలు 4.6 లక్షలకు చేరుకునే అవకాశం ఉందని అంచనా వేస్తోంది.ఛత్ పూజను బీహార్, ఉత్తరప్రదేశ్, జార్ఖండ్ తదితర రాష్ట్రాల్లో ఘనంగా నిర్వహిస్తారు. ఈ నేపథ్యంలో ఆయా ప్రాంతాలకు వెళ్లే ప్రయాణికుల సౌకర్యార్థం ప్రత్యేక రైళ్లను అందుబాటులోకి తెచ్చింది. దర్భంగా, పాట్నా, ఛప్రా, ససారం, దానాపూర్, గోరఖ్‌పూర్, ప్రయాగ్‌రాజ్, షాలిమార్, హౌరా వంటి అధిక రద్దీ ఉండే ప్రాంతాలకు ఈ రైళ్లను నడుపుతోంది. పెరుగుతున్న డిమాండ్‌కు అనుగుణంగా అందుబాటులో ఉన్న వనరులను వినియోగిస్తూ మరిన్ని ప్రత్యేక రైళ్లను నడిపేందుకు కూడా రైల్వే సిద్ధంగా ఉంది.

స్టేషన్లలో రద్దీ నియంత్రణకు ప్రత్యేక చర్యలు

ప్రయాణికుల రాకపోకలు సజావుగా సాగేందుకు ప్రధాన స్టేషన్లలో టికెట్ తనిఖీ సిబ్బంది, రైల్వే రక్షణ దళం (ఆర్‌పీఎఫ్) సిబ్బందిని తగిన సంఖ్యలో మోహరించింది. రైళ్లలోకి ఎక్కే సమయంలో ప్రయాణికులు క్యూ పద్ధతి పాటించేలా చర్యలు చేపట్టింది. ప్లాట్‌ఫారాలపై తోపులాట, గందరగోళం లేకుండా సిబ్బంది పర్యవేక్షిస్తున్నారు.
రైళ్ల రాకపోకల సమయాలు, రైలు నంబర్లు, కోచ్‌ల స్థానాలపై ఎప్పటికప్పుడు ప్రకటనలు చేస్తున్నారు. అవసరమైన చోట మెగాఫోన్ల ద్వారా ప్రయాణికులకు మార్గదర్శనం కల్పిస్తున్నారు. రద్దీ ఎక్కువగా ఉండే స్టేషన్లలో ప్రత్యేక హోల్డింగ్ ప్రాంతాలను ఏర్పాటు చేసి, ప్రయాణికులను అక్కడి నుంచి క్రమపద్ధతిలో ప్లాట్‌ఫారాలపైకి అనుమతిస్తున్నారు.

టికెట్ల కొనుగోలుకు అదనపు సౌకర్యాలు

టికెట్ల కోసం కౌంటర్ల వద్ద రద్దీ తగ్గించేందుకు ఆటోమేటిక్ టికెట్ వెండింగ్ మెషీన్లను అందుబాటులో ఉంచారు. అన్‌రిజర్వ్‌డ్ టికెట్లను సులభంగా పొందేందుకు యూటీఎస్ మొబైల్ యాప్ వినియోగాన్ని ప్రోత్సహిస్తున్నారు. ఇందుకోసం టికెట్ కౌంటర్లు, ఇతర ముఖ్యమైన ప్రదేశాల్లో క్యూఆర్ కోడ్‌లను ఏర్పాటు చేశారు. స్టేషన్లలో తగినంత తాగునీరు అందుబాటులో ఉండేలా చర్యలు తీసుకున్నారు.

రైల్వే మౌలిక వసతుల విస్తరణపై దృష్టి

రైళ్ల సంఖ్యను భవిష్యత్తులో మరింత పెంచేందుకు రైల్వే మార్గాల డబ్లింగ్, ట్రిప్లింగ్, క్వాడ్రుప్లింగ్ పనులు చేపడుతున్నారు. వీటితో మార్గాల సామర్థ్యం పెరిగి అదనపు రైళ్ల నిర్వహణకు అవకాశం కలుగుతుందని దక్షిణ మధ్య రైల్వే తెలిపింది.జనరల్ మేనేజర్ సంజయ్ కుమార్ శ్రీవాస్తవ పరిస్థితులను ఎప్పటికప్పుడు సమీక్షిస్తున్నారు. ప్రయాణికులకు అవసరమైన అన్ని సౌకర్యాలు కల్పిస్తూ, రద్దీని సమర్థంగా నియంత్రించాలని అధికారులను ఆదేశించారు.