ఆన్‌లైన్ ఆఫర్లతో జాగ్రత్త.. క్రెడిట్, డెబిట్ కార్డు మోసాలపై TGCSB హెచ్చరిక
-బ్యాంకు రివార్డులు, భారీ డిస్కౌంట్ల పేరుతో సైబర్ నేరగాళ్ల వల
-లింకులు, APK ఫైళ్లకు దూరంగా ఉండాలని సూచన
(హైదరాబాద్, క్రైంబ్యూరో)
ఆన్‌లైన్ షాపింగ్‌లో భారీ డిస్కౌంట్లు, బ్యాంకు రివార్డులు, క్రెడిట్ కార్డు పరిమితి పెంపు పేరుతో జరుగుతున్న సైబర్ మోసాల పట్ల ప్రజలు అప్రమత్తంగా ఉండాలని తెలంగాణ సైబర్ సెక్యూరిటీ బ్యూరో (TGCSB) హెచ్చరించింది. నకిలీ ప్రకటనలతో పాటు క్రెడిట్, డెబిట్ కార్డు వివరాలను తస్కరించి అక్రమ లావాదేవీలకు పాల్పడుతున్నట్లు వెల్లడించింది. ఈ తరహా ఫిర్యాదులు ఇటీవల 20 నుంచి 30 రోజులుగా పెరిగాయని తెలిపింది.నవంబర్ 2026 సైబర్ అవగాహన ప్రచారంలో భాగంగా ఈ మోసాలపై ప్రత్యేక హెచ్చరికలు జారీ చేసింది. ‘మీ డబ్బు.. మీ క్లిక్.. మీ ఎంపిక’ నినాదంతో ప్రజల్లో అవగాహన కల్పిస్తోంది.
70 శాతం డిస్కౌంట్ పేరుతో మోసం
ఇన్‌స్టాగ్రామ్, ఫేస్‌బుక్, వాట్సాప్‌లలో బ్రాండెడ్ వస్తువులు, ఎలక్ట్రానిక్స్, దుస్తులు, హాలిడే ప్యాకేజీలపై భారీ తగ్గింపులు ప్రకటిస్తూ నకిలీ ప్రకటనలు పెడుతున్నారు. వీటిని నమ్మి UPI, డిజిటల్ వాలెట్లు లేదా బ్యాంకు బదిలీల ద్వారా డబ్బులు చెల్లించిన తర్వాత నకిలీ ఆర్డర్ ధ్రువీకరణలు పంపుతున్నారు. ఆపై డెలివరీ పేరుతో కాలయాపన చేసి చివరకు ఫోన్ నంబర్లు బ్లాక్ చేస్తున్నారు. ఇలాంటి విక్రేతలను నమ్మి ముందస్తు చెల్లింపులు చేయవద్దని TGCSB సూచించింది.
బ్యాంకు రివార్డుల పేరుతో కార్డు వివరాల చోరీ
క్యాష్‌బ్యాక్, బ్యాంకు రివార్డులు, కార్డు పరిమితి పెంపు పేరుతో ఫిషింగ్ లింకులు, హానికరమైన APK ఫైళ్లను పంపిస్తున్నారు. వాటిని క్లిక్ చేయడం లేదా ఇన్‌స్టాల్ చేయడం ద్వారా కార్డు నంబర్, CVV, PIN, OTP వంటి వివరాలు సేకరిస్తున్నారు. కొన్ని సందర్భాల్లో మాల్‌వేర్ సాయంతో SMS అలర్ట్‌లను కూడా అడ్డుకుంటున్నారు. అనంతరం బాధితుల అనుమతి లేకుండానే దేశీయ, అంతర్జాతీయ లావాదేవీలు జరుపుతున్నారు.తెలియని లింకులు, APK ఫైళ్లను తెరవవద్దని, కార్డు వివరాలను ఎవరికీ వెల్లడించవద్దని TGCSB సూచించింది. బ్యాంకు ఆఫర్లను అధికారిక యాప్ లేదా కస్టమర్ కేర్ ద్వారా మాత్రమే నిర్ధారించుకోవాలని స్పష్టం చేసింది.
మోసానికి గురైతే 1930కు కాల్ చేయండి
అనుమానాస్పద లావాదేవీ గుర్తించిన వెంటనే కార్డును బ్లాక్ చేసి బ్యాంకుకు సమాచారం ఇవ్వాలి. సైబర్ ఆర్థిక మోసానికి గురైతే ఆలస్యం చేయకుండా 1930 హెల్ప్‌లైన్‌కు ఫోన్ చేయాలి. అలాగే www.cybercrime.gov.in వెబ్‌సైట్‌లో ఫిర్యాదు నమోదు చేయవచ్చు. అప్రమత్తతే సైబర్ మోసాల నుంచి రక్షణ అని TGCSB డైరెక్టర్ శిఖా గోయెల్, ఐపీఎస్ సూచించారు.