తెలంగాణలో వచ్చే ఏడాది నుంచి 12వ తరగతి వరకు విద్యావిధానం సీఎం ఆదేశాలు

విద్యార్థుల ప్రయోజనాలే లక్ష్యంగా విద్యా రంగంలో సంస్కరణలు
9 నుంచి 12వ తరగతి వరకు సీనియర్ సెకండరీ విధానం
అద్దె భవనాల్లో సంక్షేమ హాస్టళ్లు, రెసిడెన్షియల్ పాఠశాలలు ఉండకూడదు
యూనివర్సిటీల్లో ప్రొఫెసర్ల నియామకాలు వేగవంతం చేయాలి

(హైదరాబాద్,న్యూస్ఇన్‌)

తెలంగాణలో వ‌చ్చే ఏడాది నుంచి 12వ తర‌గ‌తి విద్యావిధానాన్ని అమ‌లు చేయాల‌ని సీఎం రేవంత్ రెడ్డి ఆధికారుల‌ను ఆదేశించారు. విద్యా రంగాన్ని మరింత పటిష్టం చేసేందుకు ప్రభుత్వం కీలక సంస్కరణలకు సిద్ధమవుతోంది. విద్యార్థుల ప్రయోజనాలే ప్రధాన లక్ష్యంగా నర్సరీ నుంచి యూనివర్సిటీ స్థాయి వరకు విద్యా వ్యవస్థలో మార్పులు తీసుకొస్తామని ముఖ్యమంత్రి ఎ. రేవంత్ రెడ్డి స్పష్టం చేశారు. ఆధునిక ప్రపంచ అవసరాలకు అనుగుణంగా విద్యార్థులకు నాణ్యమైన విద్య, భాషా పరిజ్ఞానం, సమాచార నైపుణ్యాలు అందించడంపై దృష్టి సారించినట్లు తెలిపారు. విద్యాశాఖపై నిర్వహించిన సమీక్షలో ముఖ్యమంత్రి పలు కీలక ఆదేశాలిచ్చారు.

నాలుగు దశల్లో విద్యావిధానం

కొత్త విద్యా విధానంలో భాగంగా నర్సరీ నుంచి నాలుగో తరగతి వరకు ప్రాథమిక విద్య, ఐదు నుంచి ఎనిమిదో తరగతి వరకు సెకండరీ విద్య, తొమ్మిది నుంచి 12వ తరగతి వరకు సీనియర్ సెకండరీ విధానాన్ని అమలు చేయాలని సీఎం సూచించారు. 12వ తరగతి పూర్తయ్యే నాటికి విద్యార్థులు భాషా, సమాచార నైపుణ్యాల్లో పూర్తి పట్టు సాధించేలా బోధన ఉండాలని పేర్కొన్నారు.ఇంటర్మీడియట్ స్థాయి వరకు చదువు కొనసాగించిన అనంతరం విద్యార్థులు తమ ఆసక్తికి అనుగుణంగా సబ్జెక్టులను ఎంచుకుని ఆయా రంగాల్లో నిపుణులుగా ఎదిగే అవకాశం కల్పించాలన్నారు.

చదువు మధ్యలోనే మానేస్తున్న విద్యార్థులపై ఆందోళన

పదో తరగతి తర్వాత ఎక్కువ‌ మంది విద్యార్థులు చదువుకు దూరమవుతున్నారని సీఎం రేవంత్ రెడ్డి పేర్కొన్నారు. వీరిలో అత్యధికులు బాలికలు, దళిత, గిరిజన, మైనారిటీ వర్గాలకు చెందిన విద్యార్థులే ఉంటున్నారని తెలిపారు.12వ తరగతి వరకు విద్య కొనసాగించే కేంద్రీయ విద్యాలయాలు, నవోదయ విద్యాలయాలు, కస్తూర్బా గాంధీ బాలికా విద్యాలయాల్లో చదువు మధ్యలో మానేసే వారి సంఖ్య చాలా తక్కువగా ఉందని వివరించారు. దేశంలోని 18 రాష్ట్రాల్లో ఇప్పటికే 12వ తరగతి వరకు విద్యావిధానం అమల్లో ఉందని గుర్తుచేశారు.విద్యార్థుల భవిష్యత్తును దృష్టిలో పెట్టుకునే ఈ నిర్ణయం తీసుకుంటున్నామని, జూనియర్ కళాశాలల్లో పనిచేస్తున్న లెక్చరర్లు, బోధనేతర సిబ్బంది ఉద్యోగ, పదవీ విరమణ ప్రయోజనాలకు ఎలాంటి ఇబ్బందులు కలగకుండా చూస్తామని సీఎం భరోసా ఇచ్చారు.

అద్దె భవనాల్లో ఉండకూడదు

రాష్ట్రంలోని సంక్షేమ వసతి గృహాలు, రెసిడెన్షియల్ పాఠశాలలు ఇకపై ఎట్టి పరిస్థితుల్లోనూ అద్దె భవనాల్లో కొనసాగకూడదని ముఖ్యమంత్రి స్పష్టం చేశారు. అన్ని వసతులతో శాశ్వత భవనాల నిర్మాణానికి వెంటనే కార్యాచరణ ప్రారంభించాలని ఆదేశించారు. ఇందుకు అవసరమైన నిధులు విడుదల చేస్తామని తెలిపారు.
పాఠశాలలు, హాస్టళ్లు, రెసిడెన్షియల్ విద్యాసంస్థల్లో మరుగుదొడ్ల నిర్మాణంతో పాటు నిరంతర నీటి సౌకర్యం కల్పించాలని అధికారులకు సూచించారు.

యంగ్ ఇండియా రెసిడెన్షియల్ స్కూళ్ల నిర్మాణంపై సమీక్ష

యంగ్ ఇండియా ఇంటిగ్రేటెడ్ రెసిడెన్షియల్ స్కూళ్ల (YIIRS) నిర్మాణ పురోగతిని సీఎం సమీక్షించారు. నిర్మాణ పనుల్లో వేగం పెంచి నిర్ణీత గడువులోగా పూర్తి చేయాలని ఇంజినీరింగ్ అధికారులను ఆదేశించారు.పాఠశాలల్లో ల్యాండ్‌స్కేపింగ్, ఇంటీరియర్ డిజైన్, డిజిటల్ పరికరాలు, క్రీడా సామగ్రి, వంటగది పరికరాల సమీకరణకు అత్యుత్తమ సంస్థలను ఎంపిక చేయాలని సూచించారు. నిర్మాణం నుంచి సదుపాయాల కల్పన వరకు ఎక్కడా నాణ్యత విషయంలో రాజీ పడకూడదని స్పష్టం చేశారు.క్యూఆర్ పరిధిలో నిర్మిస్తున్న పాఠశాలల పనుల పురోగతిని కూడా సమీక్షించిన సీఎం, నిర్మాణాలపై సంతృప్తి వ్యక్తం చేశారు. ఇంకా ఎక్కడైనా అదనపు నిర్మాణాలు చేపట్టాల్సి ఉంటే ప్రత్యేక దృష్టి సారించాలని అధికారులను ఆదేశించారు.

ఐటీఐల తరహాలో పాలిటెక్నిక్‌ల ఆధునికీకరణ

ఐటీఐలను అడ్వాన్స్‌డ్ టెక్నాలజీ సెంటర్లుగా (ఏటీసీలు) ఆధునికీకరించిన తర్వాత విద్యార్థుల నమోదు పెరిగిందని సీఎం తెలిపారు. అక్కడ శిక్షణ పొందిన వారందరికీ ఉద్యోగ అవకాశాలు లభించాయని పేర్కొన్నారు. ఇదే తరహాలో పాలిటెక్నిక్ కళాశాలల ఆధునికీకరణకు అవసరమైన నిధుల విడుదలను వేగవంతం చేయాలని ఆదేశించారు.ఈ ప్రక్రియలో శాఖాపరమైన సమస్యలు ఎదురైతే వెంటనే తన దృష్టికి తీసుకురావాలని అధికారులకు సూచించారు.

యూనివర్సిటీల్లో అధ్యాపక నియామకాలకు వేగం

రాష్ట్రంలోని యూనివర్సిటీల్లో అసిస్టెంట్ ప్రొఫెసర్లు, అసోసియేట్ ప్రొఫెసర్లు, ఇతర అధ్యాపకుల నియామక ప్రక్రియను వేగవంతం చేయాలని సీఎం రేవంత్ రెడ్డి ఆదేశించారు. నియామకాల్లో నిబంధనలను కచ్చితంగా పాటించాలని సూచించారు.ఈ విషయంలో ఉన్నత విద్యామండలి ఛైర్మన్‌తో పాటు యూనివర్సిటీల వైస్‌ ఛాన్సలర్లు ప్రత్యేక శ్రద్ధ తీసుకోవాలని సీఎం స్పష్టం చేశారు.