విశాఖలో 31వ సీఐఐ భాగస్వామ్య సదస్సు.. 58 దేశాల ప్రతినిధుల రాక
- 12, 13 తేదీల్లో విశాఖపట్నం వేదికగా ప్రతిష్ఠాత్మక పెట్టుబడుల సదస్సు
- ‘నేవిగేటింగ్ న్యూ వరల్డ్ ఆర్డర్: ట్రేడ్, టెక్నాలజీ, ట్రస్ట్’ ప్రధాన ఇతివృత్తం
- 58 దేశాల నుంచి ప్రభుత్వ, పారిశ్రామిక రంగాల ప్రతినిధులు
- 16 మంది విదేశీ మంత్రులు, 40 మంది అంతర్జాతీయ ప్రముఖులు హాజరు
- ముఖ్య అతిథులుగా అమిత్ షా, చంద్రబాబు, పీయూష్ గోయల్, పవన్ కల్యాణ్
- 13న ఉపరాష్ట్రపతి సి.పి. రాధాకృష్ణన్ చేతుల మీదుగా ముగింపు కార్యక్రమం
- రెండు రోజుల పాటు 400కు పైగా వ్యాపార సమావేశాలు
(అమ‌రావ‌తి,న్యూస్ఇన్‌)
విశాఖపట్నంలో 31వ సీఐఐ భాగస్వామ్య సదస్సు నిర్వహణకు రాష్ట్ర ప్రభుత్వం సర్వం సిద్ధం చేసింది. నవంబర్ 12, 13 తేదీల్లో రెండు రోజుల పాటు జరగనున్న ఈ అంతర్జాతీయ సదస్సుకు 58 దేశాల నుంచి ప్రభుత్వ, పారిశ్రామిక రంగాలకు చెందిన ప్రతినిధులు హాజరుకానున్నారు.‘నేవిగేటింగ్ న్యూ వరల్డ్ ఆర్డర్: ట్రేడ్, టెక్నాలజీ, ట్రస్ట్’ అనే ఇతివృత్తంతో ఈ సదస్సును నిర్వహిస్తున్నారు. మారుతున్న ప్రపంచ ఆర్థిక పరిస్థితులు, అంతర్జాతీయ వాణిజ్య సంబంధాలు, సాంకేతిక పరిజ్ఞానం, పెట్టుబడుల అవకాశాలపై ఇందులో ప్రధానంగా చర్చించనున్నారు. ప్రపంచ మార్కెట్లతో ఏపీ పరిశ్రమలను అనుసంధానించడంతో పాటు రాష్ట్రానికి భారీ పెట్టుబడులను ఆకర్షించడమే ఈ సదస్సు ప్రధాన ఉద్దేశం.
అమిత్ షా, చంద్రబాబు సహా ప్రముఖుల హాజరు
ఈ సదస్సుకు కేంద్ర హోంమంత్రి అమిత్ షా, ముఖ్యమంత్రి చంద్రబాబు నాయుడు, కేంద్ర వాణిజ్య, పరిశ్రమల శాఖ మంత్రి పీయూష్ గోయల్, ఉప ముఖ్యమంత్రి పవన్ కల్యాణ్ తదితరులు ముఖ్య అతిథులుగా హాజరుకానున్నారు. 16 మంది విదేశీ మంత్రులతో పాటు 40 మంది అంతర్జాతీయ స్థాయి ప్రతినిధులు కూడా పాల్గొననున్నారు.నవంబర్ 13న భారత ఉపరాష్ట్రపతి సి.పి. రాధాకృష్ణన్ చేతుల మీదుగా సదస్సు ముగింపు కార్యక్రమం జరగనుంది.
ఆరు కీలక అంశాలపై చర్చలు
రెండు రోజుల పాటు జరిగే సదస్సులో ఆరు ప్రధాన రంగాలకు సంబంధించిన అంశాలపై ప్రత్యేక చర్చలు నిర్వహించనున్నారు. వాణిజ్యం, పెట్టుబడులు, అంతర్జాతీయ సరఫరా గొలుసులు, భౌగోళిక ఆర్థిక పరిస్థితులు, ప్రపంచ దేశాల మధ్య సహకారం, వ్యవసాయం, ఆహార భద్రత, జీవ ఆధారిత ఆర్థిక వ్యవస్థ వంటి అంశాలకు ప్రాధాన్యం ఇవ్వనున్నారు. ప్రతిభ, నైపుణ్యాభివృద్ధి, అంతర్జాతీయ ఉపాధి అవకాశాలు, సాంకేతికత, ఆవిష్కరణలు, భవిష్యత్ పరిశ్రమలు, స్వచ్ఛ ఇంధనం, సుస్థిర అభివృద్ధిపై కూడా చర్చలు జరగనున్నాయి. ప్రపంచ ఆర్థిక వ్యవస్థలో వస్తున్న మార్పులకు అనుగుణంగా ఏపీ పారిశ్రామిక రంగానికి కొత్త దిశానిర్దేశం చేయడంపై దృష్టి సారించనున్నారు.
మహిళా పారిశ్రామికవేత్తలకు ప్రత్యేక వేదిక
సీఐఐ భాగస్వామ్య సదస్సుకు సమాంతరంగా ఏపీ ఉమెన్ అండ్ గ్రోత్ సమ్మిట్–2026 నిర్వహించనున్నారు. పారిశ్రామిక రంగంలో మహిళల భాగస్వామ్యం, మహిళా సాధికారత, ఆర్థిక వృద్ధి వంటి అంశాలపై ఈ వేదిక ద్వారా చర్చించనున్నారు.మహిళా పారిశ్రామికవేత్తలకు పెట్టుబడుల అవకాశాలు కల్పించడం, వ్యాపారాలను విస్తరించేందుకు అవసరమైన సహకారం అందించడం, అంతర్జాతీయ మార్కెట్లతో అనుసంధానం చేయడం ఈ ప్రత్యేక సదస్సు లక్ష్యంగా పెట్టుకుంది.
రూ.86,522 కోట్ల పెట్టుబడులకు ఒప్పందాలు
ప్రధాన సదస్సుకు ముందుగానే రాష్ట్రంలోని వివిధ ప్రాంతాల్లో ప్రాంతీయ సన్నాహక పెట్టుబడుల సదస్సులను ప్రభుత్వం నిర్వహించింది. ఇప్పటికే ఐదు ప్రాంతాల్లో జరిగిన సన్నాహక సమావేశాల ద్వారా రూ.86,522 కోట్ల పెట్టుబడులకు ఒప్పందాలు కుదిరినట్లు వెల్లడించింది.ఇక విశాఖలో జరిగే ప్రధాన సదస్సులో రెండు రోజుల వ్యవధిలో 400కు పైగా వ్యాపార సమావేశాలు నిర్వహించనున్నారు. ప్రభుత్వాలు, పారిశ్రామిక సంస్థల మధ్య బిజినెస్ టు గవర్నమెంట్ (B2G) సమావేశాలతో పాటు అంతర్జాతీయ పారిశ్రామిక దిగ్గజాలు, పెట్టుబడిదారులు, సాంకేతిక నిపుణులతో చర్చలు జరగనున్నాయి.