మహిళా భద్రతకు భరోసా కేంద్రం అండ
- సైబరాబాద్‌లో నూతన భరోసా కేంద్రం ప్రారంభం
- ‘సైబరాబాద్ మూవ్స్‌’ పేరిట ప్రత్యేక సమావేశాలు
(హైదరాబాద్, క్రైంబ్యూరో)
మహిళలు, బాలికల భద్రతకు మరింత భరోసా కల్పించే లక్ష్యంతో సైబరాబాద్‌లో నూతనంగా నిర్మించిన భరోసా కేంద్రం అందుబాటులోకి వచ్చింది. ఈ కేంద్రం పూర్తికావడానికి ఏడేళ్ల సమయం పట్టిందని, ఇన్నాళ్ల నిరీక్షణ తర్వాత కేంద్రం ప్రారంభం కావడం సంతోషంగా ఉందని డీజీపీ సీవీ ఆనంద్‌ పేర్కొన్నారు. మహిళలపై జరిగే లైంగిక దాడులు, ఇతర నేరాల బాధితులకు వైద్య పరీక్షలు, మానసిక కౌన్సెలింగ్‌, న్యాయపరమైన సహాయం, అవసరమైన సంప్రదింపులను ఒకే వేదికపై అందించడం భరోసా కేంద్రాల ప్రత్యేకత అని వివరించారు.
దేశంలోనే ప్రత్యేకమైన విధానంలో భరోసా కేంద్రాలు పనిచేస్తున్నాయని డీజీపీ తెలిపారు. సుమారు పదేళ్ల క్రితం ప్రారంభమైన ఈ వ్యవస్థ ద్వారా బాధిత మహిళలకు కేవలం పోలీసు సహాయమే కాకుండా, వారు ఎదుర్కొన్న మానసిక వేదన నుంచి కోలుకునేందుకు అవసరమైన కౌన్సెలింగ్‌ కూడా అందిస్తున్నట్లు చెప్పారు. వైద్య పరీక్షలతో పాటు బాధితులకు అవసరమైన అన్ని రకాల సహాయాన్ని ఒకే చోట అందించడం వల్ల కేసుల దర్యాప్తు, న్యాయ ప్రక్రియ మరింత సమర్థంగా సాగుతున్నాయని పేర్కొన్నారు. హైదరాబాద్ లో ప్రత్యేక పోక్సో కోర్టు ఏర్పాటు కూడా నేరస్తులకు శిక్షలు పడే రేటు పెరగడానికి దోహదపడుతోందన్నారు.
ట్రాఫిక్ సమస్యకు వినూత్న పరిష్కారాలు….
సైబరాబాద్‌లో పెరుగుతున్న వాహనాల సంఖ్యతో ట్రాఫిక్ సమస్య తీవ్రతరం అవుతోందని డీజీపీ అన్నారు. ముఖ్యంగా ఐటీ సంస్థలు, ఆసుపత్రులు ఉన్న ప్రాంతాల్లో రద్దీ సమయాల్లో వాహనాల రాకపోకలు ఇబ్బందికరంగా మారుతున్నాయని చెప్పారు. ఈ సమస్యకు శాశ్వత పరిష్కారాలు కనుగొనే ఉద్దేశంతో నవంబర్‌ 26- 28 తేదీల్లో మూడు రోజులపాటు ‘సైబరాబాద్ మూవ్స్‌’ పేరిట ప్రత్యేక సమావేశాలు నిర్వహించనున్నట్లు వెల్లడించారు.
ఐటీ కంపెనీలు, ఆసుపత్రులు, కార్పొరేట్‌ సంస్థలు, బస్‌ రవాణా నిర్వాహకులు, ఎస్‌ సి ఎస్‌సీ ప్రతినిధులు సమన్వయంతో పనిచేయాలని సూచించారు. కార్‌పూలింగ్‌, ప్రజా రవాణా వినియోగం, ఉద్యోగుల ప్రయాణ సమయాల నిర్వహణ వంటి అంశాలపై వినూత్న ఆలోచనలతో ముందుకు రావాలని కోరారు. ట్రాఫిక్ నియంత్రణకు కొత్త ప్రయోగాలు చేసేందుకు పోలీసు శాఖ సిద్ధంగా ఉందని, ఐటీ రంగం నుంచి వచ్చే ఆచరణాత్మక ప్రతిపాదనలకు పూర్తి సహకారం అందిస్తామని తెలిపారు.
వెరిఫికేష‌న్ లో ప్రత్యేకత…
పాస్‌పోర్టు సేవల్లోనూ సైబరాబాద్ కమిషనరేట్‌ దేశస్థాయిలో ప్రత్యేక గుర్తింపు సాధించిందని సైబరాబాద్ సీపీ ర‌మేష్ చెప్పారు. గతంలో పాస్‌పోర్టు దరఖాస్తు ప్రక్రియకు 57 రోజులు పట్టేదని, సీవీ ఆనంద్‌ సైబరాబాద్ పోలీస్‌ కమిషనర్‌గా ఉన్న సమయంలో ‘వేరి ఫాస్ట్’ కార్యక్రమం ద్వారా ఆ వ్యవధిని కేవలం ఎనిమిది రోజులకు తగ్గించారని గుర్తుచేశారు. ఈ విధానం రాష్ట్రస్థాయిలో సైబరాబాద్‌కు అగ్రస్థానాన్ని తెచ్చిపెట్టిందని, గత 14 ఏళ్లుగా పాస్‌పోర్టు వెరిఫికేషన్‌లో దేశంలోనే మొదటి స్థానంలో కొనసాగడం అభినందనీయమని అన్నారు. ఈ ఘనతకు సీవీ ఆనంద్‌ కృషి కూడా కారణమని పేర్కొన్నారు.
పోలీసు సేవలు అభినందనీయం…..
ఈ సందర్భంగా శేరిలింగంపల్లి ఎమ్మెల్యే అరికెపూడి గాంధీ మాట్లాడుతూ.. ఈ రోజు శుభదినమని, సీవీ ఆనంద్‌ భవనాన్ని ప్రారంభించడం సంతోషంగా ఉందన్నారు. ఐటీ రంగంతోపాటు సేవా రంగానికి చెందిన సంస్థలు సమాజ అభివృద్ధిలో కీలక పాత్ర పోషిస్తున్నాయని చెప్పారు. కరోనా సమయంలో ఐటీ సంస్థలు అందించిన సహకారం మరువలేనిదన్నారు. పోలీసు శాఖ అందిస్తున్న సేవలు ప్రశంసనీయమని, పోలీసుల పట్ల ప్రజల్లో సానుకూల దృక్పథం పెరుగుతోందని అన్నారు.