కృష్ణా జలాల్లో తెలంగాణకు న్యాయమైన వాటా సాధించాలి
డిండి, అచ్చంపేట ఎత్తిపోతల పనులు వేగవంతం చేయాలి..
అధికారులకు సీఎం రేవంత్ రెడ్డి ఆదేశం
(హైదరాబాద్, న్యూస్ఇన్‌)
కృష్ణా జలాల పంపిణీలో తెలంగాణకు దక్కాల్సిన న్యాయమైన వాటాను సాధించేందుకు న్యాయపరంగా గట్టిగా పోరాడాలని ముఖ్యమంత్రి రేవంత్ రెడ్డి అధికారులను ఆదేశించారు. ఆంధ్రప్రదేశ్‌తో నెలకొన్న జల వివాదాలకు సంబంధించి అన్ని అంశాలపై సమగ్ర ఆధారాలను సేకరించి సుప్రీంకోర్టులో సమర్థవంతంగా వాదనలు వినిపించాలని సూచించారు. ఈ నెల 18వ తేదీ తర్వాత సుప్రీంకోర్టులో కేసు విచారణకు రానున్న నేపథ్యంలో న్యాయ నిపుణులతో సీఎం ప్రత్యేకంగా చర్చించారు.
ఎంసీఆర్ హెచ్‌ఆర్‌డీలోని బోధి పెవిలియన్‌లో ముఖ్యమంత్రి రేవంత్ రెడ్డి నీటిపారుదల శాఖపై సమీక్ష నిర్వహించారు. ఈ సమావేశంలో మంత్రి ఎన్. ఉత్తమ్ కుమార్ రెడ్డి, నీటిపారుదల సలహాదారు ఆదిత్యనాథ్ దాస్, సీఎంఓ కార్యదర్శి మాణిక్ రాజ్, నీటిపారుదల శాఖ కార్యదర్శి ఈ. శ్రీధర్, జాయింట్ సెక్రటరీ కె. శ్రీనివాస్, అడ్వకేట్ జనరల్ సుదర్శన్ రెడ్డి, సుప్రీంకోర్టు సీనియర్ న్యాయవాది సి.ఎస్. వైద్యనాథన్ తదితరులు పాల్గొన్నారు.
డిండి, అచ్చంపేట పనులకు వేగం….
డిండి, అచ్చంపేట ఎత్తిపోతల పథకాల పనులను వేగవంతం చేయాలని ముఖ్యమంత్రి ఇంజనీరింగ్ అధికారులను ఆదేశించారు. ఇప్పటికే నిర్ణయించిన ప్రణాళిక ప్రకారం ఏదుల నుంచి ఈ రెండు పథకాలకు నీటిని అందించాలని స్పష్టం చేశారు. ఇందుకోసం అవసరమైన 0.6 టీఎంసీల నీటిని నార్లపూర్ నుంచి ఏదుల వరకు తరలించే ప్రక్రియలో ఎలాంటి ఆటంకాలు లేకుండా చూడాలన్నారు.నీటి తరలింపునకు ఎక్కడ టన్నెళ్లు, ఎక్కడ కాలువలు అవసరమో క్షేత్రస్థాయిలో పరిశీలించి సమగ్ర ప్రాజెక్టు నివేదిక (డీపీఆర్) సిద్ధం చేయాలని సూచించారు. నివేదిక ఆధారంగా పనులు ప్రారంభించి ప్రాజెక్టులను త్వరితగతిన పూర్తి చేసేలా చర్యలు తీసుకోవాలని ఆదేశించారు.
కాళేశ్వరం అదనపు టీఎంసీపై తొందర వద్దు….
కాళేశ్వరం ప్రాజెక్టు అదనపు టీఎంసీ పనుల విషయంలో తొందరపాటు నిర్ణయాలు తీసుకోవద్దని ముఖ్యమంత్రి అధికారులకు స్పష్టం చేశారు. గత ప్రభుత్వం చేసిన తప్పులు పునరావృతం కాకుండా అన్ని అంశాలను క్షుణ్ణంగా పరిశీలించిన తర్వాతే ముందడుగు వేయాలని సూచించారు.ప్రస్తుతం ఉన్న రెండు టీఎంసీల నీటిని కూడా పూర్తిస్థాయిలో తరలించలేని పరిస్థితులు ఉన్నాయని పేర్కొన్న సీఎం.. అదనపు టీఎంసీ పనుల విషయంలో బాధ్యతాయుతంగా వ్యవహరించాలని ఆదేశించారు. ముందుగా సుప్రీంకోర్టులో పెండింగ్‌లో ఉన్న కేసుల పురోగతిని పరిశీలించాలని, అనంతరం భూసేకరణ ప్రక్రియ చేపట్టాలని సూచించారు.అలాగే కేంద్ర జల సంఘం నుంచి అవసరమైన అన్ని అనుమతులు పొందడంతో పాటు సమగ్ర ప్రాజెక్టు నివేదిక సిద్ధం చేసుకోవాలని నీటిపారుదల శాఖ అధికారులకు సీఎం రేవంత్ రెడ్డి దిశానిర్దేశం చేశారు.