ఏపీ లో ఫుడ్ ప్రాసెసింగ్ పెట్టుబడులకు ఆహ్వానం.. యూఏఈతో చంద్రబాబు చర్చలు
రాయలసీమను గ్లోబల్ హార్టికల్చర్ హబ్‌గా తీర్చిదిద్దుతున్నాం
ఫుడ్ క్లస్టర్‌లో పెట్టుబడులకు 12 యూఏఈ కంపెనీల ఆసక్తి
(న్యూస్ఇన్, విశాఖప‌ట్నం)
ఏపీలోఫుడ్ ప్రాసెసింగ్, వ్యవసాయ ఉత్పత్తుల సేకరణ, ప్రాసెసింగ్, ఎగుమతుల రంగాల్లో పెట్టుబడులకు అపార అవకాశాలు ఉన్నాయని ముఖ్యమంత్రి చంద్రబాబు నాయుడు తెలిపారు. యూఏఈ ఆర్థిక, పర్యాటక శాఖ మంత్రి అబ్దుల్లా బిన్ తౌక్ అల్ మర్రీతో బుధవారం విశాఖపట్నంలో ఆయన సమావేశమయ్యారు.
రాయలసీమలో పండించే పండ్లు ఇప్పటికే విదేశాలకు ఎగుమతి అవుతున్నాయని, రూ.లక్ష కోట్లతో ఆ ప్రాంతాన్ని గ్లోబల్ హార్టికల్చర్ హబ్‌గా అభివృద్ధి చేస్తున్నామని సీఎం వివరించారు. యూఏఈ ఏర్పాటు చేయనున్న ఫుడ్ క్లస్టర్‌లో ఆ దేశానికి చెందిన అగ్రిఫుడ్ సంస్థ సిలాల్ పెట్టుబడులు పెట్టాలని ఆహ్వానించారు. చిత్తూరు జిల్లాలో దుబాయ్‌కు చెందిన ఫ్లోర్‌మాస్టర్ పరిశ్రమ ఏర్పాటుపైనా చర్చించారు.మారిటైమ్, ఏరోస్పేస్, డిఫెన్స్ రంగాల్లోనూ ఇరు ప్రాంతాలు కలిసి పనిచేయాలని చంద్రబాబు ప్రతిపాదించారు.
పెట్టుబడులకు కీలక కేంద్రం: యూఏఈ మంత్రి
భోగాపురం విమానాశ్రయం అద్భుతంగా ఉందని యూఏఈ మంత్రి ప్రశంసించారు. భారత తూర్పు తీరంలో పెట్టుబడులకు ఏపీ కీలక కేంద్రంగా మారుతుందని అభిప్రాయపడ్డారు. గూగుల్ వంటి సంస్థల డేటా సెంటర్ల ఏర్పాటు శుభపరిణామమన్నారు.ఏపీ నుంచి రొయ్యలు, ఇతర ఆక్వా ఉత్పత్తులను దిగుమతి చేసుకునే అంశాన్ని పరిశీలిస్తున్నట్లు యూఏఈ ప్రతినిధులు తెలిపారు. రాష్ట్రంలో ఏర్పాటు చేయనున్న ఫుడ్ క్లస్టర్‌లో పెట్టుబడులు పెట్టేందుకు మరో 12 యూఏఈ కంపెనీలు ఆసక్తి చూపుతున్నట్లు వెల్లడించారు.