ఖైరతాబాద్ అసెంబ్లీ స్థానం ఖాళీ.. ఉప ఎన్నికకు రంగం సిద్ధం

(న్యూస్ఇన్,హైద‌రాబాద్)

ఖైరతాబాద్ అసెంబ్లీ నియోజకవర్గ ఉప ఎన్నికకు అధికారికంగా రంగం సిద్ధమైంది. ఎమ్మెల్యే దానం నాగేందర్ అనర్హత నేపథ్యంలో ఖైరతాబాద్ అసెంబ్లీ స్థానం ఖాళీ అయినట్లు తెలంగాణ శాసనసభ కార్యదర్శి గెజిట్ నోటిఫికేషన్ జారీ చేశారు. దీంతో ఖైరతాబాద్ నియోజకవర్గానికి కొత్తగా ఎమ్మెల్యేను ఎన్నుకునేందుకు ఎన్నికల ప్రక్రియను ఎన్నిక‌ల సంఘం మొద‌లు పెట్ట‌నుంది.

2023 అసెంబ్లీ ఎన్నికల్లో దానం నాగేందర్ బీఆర్‌ఎస్ అభ్యర్థిగా ఖైరతాబాద్ నుంచి విజయం సాధించారు. అనంతరం 2024 లోక్‌సభ ఎన్నికల సమయంలో ఆయన కాంగ్రెస్ అభ్యర్థిగా సికింద్రాబాద్ పార్లమెంట్ స్థానం నుంచి పోటీ చేశారు. పార్టీ మార్పు, ఫిరాయింపు అంశాలపై ఆయనపై అనర్హత పిటిషన్లు దాఖలయ్యాయి.

ఈ వ్యవహారంపై విచారణ జరిపిన తెలంగాణ హైకోర్టు సెప్టెంబర్ 18న కీలక తీర్పు ఇచ్చింది. దానం నాగేందర్‌ను ఎమ్మెల్యే పదవికి అనర్హుడిగా ప్రకటించడంతో పాటు, 2024 ఏప్రిల్ 23 నుంచి ఆయన అనర్హత అమల్లోకి వస్తుందని పేర్కొంది. అదే తేదీ నుంచి ఖైరతాబాద్ అసెంబ్లీ స్థానం ఖాళీగా పరిగణించాలని హైకోర్టు స్పష్టం చేసింది.

హైకోర్టు తీర్పును సవాల్ చేస్తూ దానం నాగేందర్ సుప్రీంకోర్టును ఆశ్రయించారు. అయితే సెప్టెంబర్ 24న సుప్రీంకోర్టు ఆయన పిటిషన్‌ను కొట్టివేసింది. దీంతో హైకోర్టు ఇచ్చిన అనర్హత తీర్పు అమల్లో కొనసాగింది. ఫలితంగా ఖైరతాబాద్ అసెంబ్లీ స్థానంపై ఉన్న న్యాయపరమైన అనిశ్చితికి తెరపడింది.

తాజాగా అసెంబ్లీ గెజిట్ నోటిఫికేషన్ జారీ కావడంతో ఖైరతాబాద్ స్థానం ఖాళీగా ఉన్నట్లు అధికారికంగా గుర్తించిన‌ట్లు అయింది. దీంతో తదుపరి దశలో ఎన్నికల సంఘం ఉప ఎన్నిక నిర్వహణకు సంబంధించిన ప్రక్రియను మొద‌లు పెట్టాల్సి ఉంటుంది.

గెజిట్ విడుదలతో ఖైరతాబాద్‌లో రాజకీయం వేడెక్క‌నుంది.ప్రధాన రాజకీయ పార్టీలు తమ అభ్యర్థుల ఎంపికపై దృష్టి సారించనున్నాయి. మరోవైపు నియోజకవర్గంలో ఓటర్ల జాబితా, ఎన్నికల నిర్వహణకు అవసరమైన ఏర్పాట్లు కూడా ప్రాధాన్యం సంతరించుకోనున్నాయి. స‌ర్ ప్ర‌క్రియ కొన‌సాగుతుండ‌డంతో ఈ ప్ర‌క్రియ అనంత‌రం ఎన్నిక‌ల షెడ్యూల్ వెలువ‌డే అవ‌కాశం ఉన్న‌ట్లు తెలుస్తోంది.ఉప ఎన్నిక నిర్వ‌హ‌ణ‌పై ఎన్నిక‌ల సంఘం షెడ్యూల్ ప్ర‌క‌టించాల్సి ఉంటుంది.